1 Corinthians
1 कुरिन्थियों
1
पोलुस र बाटले जोन माहा परबु र मन ले यीशु मसीह र पेरिरित होयबा काचे हाग दिया गला आचे आवरी भई सोस्थिनेस र बाटले, 2 माहा परबु र हांय कलीसिया र नाव जो कुरिन्थुस ने आचे अरथात तिकर नाव जोन मसीह ने पवित्र करा गला आचे, आवरी पवित्र होयबा काचे हाग दिया गला आचे : आवरी हांय सबु र नाव बले जोन सबु जगा हामर आवरी आपना परबु यीशु मसीह र नाव ले परतना करू आंव | 3 हामर बुआ माहा परबु आवरी परबु यीशु मसीह र, बाटले तमके अनुग्रह आवरी शान्ति मिरते रयेत | 4 मुय तमर बिसय ने आपना माहा परबु र धन्यवाद सबु दिन करबी आची ये काचे की माहा परबु र ये अनुग्रह तमर उपरे मसीह यीशु ने होयला 5 हांय थाने होई करी तमि सबु गोटक ने अरथात सबु वचन आवरी सबु गियान ने धनी करा गला - 6 की मसीह र गवई तमर थान ले पक्का निकरो - 7 ये लगले की कोनी बरदान ले तमके घाटा नाई, आवरी तमि हामर परबु यीशु मसीह र प्रगट होयबार बाट दकते रऊ आत | 8 हांय तमके अनन्त दाय ले बरसक बले करसी की तमि हामर परबु यीशु मसीह र दिन ने निर्दोष ठेबा | 9 माहा परबु सते आय जोन तमके आपना बेटा हामर यीशु मसीह र संगेले हाग देला आचे | 10 हे भाई मन मुय तमके परबु यीशु मसीह र नाव ले बिनाबी आची की तमि सबु गोटक ची गोट बोला आवरी तमर थाने फुट ना होओ, मातर गोटक ची मन आवरी गोटक मत होई करी मिसी राहा | 11 कसन की ये मोर भाई मन, खलोए र घराने र लोक मोके तमर बिसय ने सांगला आत की तमि ने झगड़ा होयसी आहे | 12 "मोर बोलबार अरत ते आय की तमर ले कोनी आपना के "" पोलुस र "" कोनी "" अपलोस र ""कोनी "" कैफा र, '' तो कोनी ""मसीह र ""बोलू आत |" 13 काय मसीह बाटा गला आचे ? काय पोलुस र तमर काचे कुरूस उपरे चेगाय गला ? काय तमके पोलुस र नाव ने बपतिस्मा मिरला ? 14 मुय माहा परबु र धन्यवाद कारबी आची की क्रिस्पुस आवरी गयुश के छाड़ी मुय तमर ले कोनी के बले बपतिस्मा ना देली | 15 कोनी थाने असन ना होओत की कोनी बोलोत की तमके मोर नाव ने बपतिस्मा मिरला | 16 आवरी हां मुय स्तिफनास र घराना के बले बपतिस्मा देली : तिके छाड़ी मुय ना जानी की मुय आवरी कोनी के बपतिस्मा देली आची | 17 कसन की मसीह मोके बपतिस्मा देबा काचे नाई मातर सुसमाचार सुनायबा काचे पटायला आचे, ये बले सबद र गियान र अनुसार नाई, असन ना होओ की मसीह र कुरूस अरत ठेबो | 18 कसन की कुरूस र कथा नाश होयबा लोक काचे मुरकता आय, मातर हामि उद्दार पायबा लोक काचे माहा पारबु र सामरत आय | 19 कसन की लिकला आचे, “ मुय गियानवान र काचे गियान के नष्ट करबी आवरी समझदार र समझ के हीन करी देबी |” 20 कोनती रला गियानवान ? कोनती रला शाष्त्री ? कोनती आचेत ये सोंसार र बिवादी ? काय माहा परबु सोंसार र गियान के मुरकता ना ठेबाला ? 21 कसन की जड़दाय माहा परबु र गियान र अनुसार सोंसार र गियान ले माहा परबु के ना जानला, तेबे ये माहा परबु के ये अच्छा लागला की ये परचार र मुरकता बाटले बिश्वास करबा लोक के उद्दार देओ | 22 यहूदी तो चिन डगराऊ आत, आवरी यूनानी गियान र खोज ने आचेत, 23 मातर हामि तो हांय कुरूस उपरे चेगायलार मसीह र परचार कंरू आंव, जोन यहूदी मन काचे ठोकर नार लागी आवरी अन्य जाति मन काचे मुरकता आय | 24 मातर जोन हाग देलार आचे, काय यहूदी काय यूनानी, तिकर लगे मसीह माहा परबु र सामरत आवरी माहा परबु र गियान आचे | 25 कसन की माहा परबु र मुरकता मनुकर गियान ले गियानवान आय, आवरी माहा परबु र निरबलता मनुक र बल ले खुबे बलवान आय | 26 ये भाई मन, आपना के हाग देला टा के तो सोचा की गागर र अनुसार खुबे गियानवान, आवरी ना खुबे सामरती, आवरी ना खुबे कुलीन, हाग दिया गला | 27 मातर माहा परबु जगत र मुरक मन के बाचला आचे की गियानवान मन के लाज करोत ; 28 आवरी माहा परबु जगत र निच आवरी तुच्छ के मातर जोन आचे बले नाई हांके चुनला की तिके जोन आय, व्यरत ठेबालाय | 29 ताकि कोनी जिव माहा परबु र छोमे घमण्ड करके ना पओत | 30 मातर हांय बाटले तमि मसीह यीशु ने आचास, जोन माहा परबु र बाटले हामर काचे गियान ठेबला, अरथात धरम आवरी पवित्रता आवरी, छुटकारा ; 31 ताकि लिकला आचे असनि ची होओ, “जोन घमण्ड करले परबु ने घमण्ड करा |”