2 Corinthians
2 कुरिन्थियों
1
पौलुस र बाटले जोन माहा परभु र मन ले मसीह यीशु र पेरित आय, आवरी भाई तीमुथियुस र बाटले माहा परभु र हांय कलीसिया र नावं, जोन कुरिन्थुस ने आचे, आवरी सबू अखया र सबू पवितर लोक मनर नावं : 2 हामर बुआ माहा परभु आवरी परभु यीशु मसीह र बाटले तमके अनुगरह आवरी शान्ति मिरते रओ | 3 हामर परभु यीशु मसीह र माहा परभु आवरी बुआ र धनवाद होओं, जोन दया र बुआ आवरी सबू परकार र शान्ति र माहा परभु आय | 4 हांय हामर सबू दुःख ने शान्ति देऊ आय; की हामी हांय शान्ति लागी जोन माहा परभु हामके देऊ आय, हांय मन के बले शान्ति देयके सको जोन कोनी परकार र दुःख मन ने होयसी | 5 कसन की जसन मसीह र दुःख मन ने हामी खूबे भागी होऊ आवं, असनी ची हामी शान्ति ने बले मसीह र बाटले खूबे भागी होऊ आवं | 6 अगर हामी दुःख पाऊ आवं, तो ये तमर शान्ति आवरी उधार काचे आय; आवरी अगर शान्ति पाऊ आवं, तो ये तमर शान्ति काचे आय; जाहार परभाव ले तमी धीरज संगे हांय दुःख मन के सहू आस, जोनके हामी बले सहू आवं | 7 हामर आशा तमर बारे ने मजबूत आय ; कसन की हांमी जानू की तमी जसन हामर दुःख मन ने, असनी शान्ति में भी सहभागी हुआ | 8 हे भाई मन, हामी ना चाहऊ की तमी हामर हांय दुःख ने अनजान राहा जोन आसिया ने हामर उपरे पड़ला ; हामी असन भारी बोझ ले दबी रऊ, जोन हामर सामरत ले बाहरे रये, इती ले की हामी जीवना ले बले हाथ फुसकाय रऊ | 9 मातर हामी आपना मन ने समझी रऊ की हामर उपरे मोरना र आगेया होयला आचे, की हामी आपना भोरशा ना सोंगाऊ मातर माहा परभु र जोन मरला लोक के बाचाऊ आय | 10 हाई ची हामके मोरना र असन बड़े संकट ले बाचायला, आवरी बाचायसी ; आवरी तार उपरे हामर ये आशा आचे की हांय आगे बले बाचायते रयसी | 11 तमी बले मिसी करी पारतना बाटले हामर सायता करबास की जोन बरदान खुबे मनर बाटले हामके मिरला, तार लागी खूबे लोक हामर बाटले धनेबाद करोत | 12 कसन की हामी आपना र बिबेकर ये गवाई ने घमंड करू आवं, की जगत ने आवरी ख़ास करी तमर मंजी, हामर आदत माहा परभु र लाईग असन पवितरता आवरी सत संगे रये, जोन गागर र गिआन ले नाई मातर माहा परभु र अनुगरह र संगे रये | 13 हामी तमके आवरी काई ना लिकू, सिरिप हांय जोन तमी पडू आस नोयले मानू बले आस, आवरी मके आशा आचे की सरा सरी दाय ले बले मानते रबास | 14 जसन तमी मन ने कतक मनमानला आस की हामी तमर घमण्ड र कारण आवं, असनी ची तमी बले परभु यीशु र दीने हामर काचे घमण्ड र कारण होयबास | 15 ई भोरषा करी मय चायते रई की पईले तमर लगे आयबी की तमके गोटक आवरी दान मिरो ; 16 आवरी तमर लगले होई करी मकिदुनिया बाटे जीबी, आवरी पाचे मकिदुनिया ले तमर लगे आयबी ; आवरी तमी मके यहूदिया मन बाटे खिनीक दुरे ले पऊचाहा | 17 ई काचे मय जोन ये गोट करी रली तो मय चंचलता दकायली ?नोयले जोन कारबार चायबी आची काय गागर र असन कारबार चायबी आची की मय गोट ने 'हव, हव' बले करबी आवरी 'नाई नाई' बले करबी ? 18 माहा परभु सतगवा आय की हामर हांय बचन ने जोन तमके बलला 'हव ' आवरी 'नाई ' दुनो ना पाया जिबाय | 19 कसन की माहा परभु र बेटा यीशु मसीह जाहार हामर बाटले जसन मोर आवरी सिल्वानुस आवरी तीमुथियुस र बाटले तमर मंजी ने परचार होयला, हायती 'हव' आवरी 'नई' दुनो ना रयेत, मातर हायती 'हव' ची 'हव' | 20 कसन की माहा परभु र जतक किरिया मन आचे, हांय सबू हाई थाने 'हव' र संगे आचे |हाई काचे हातार बाटले आमेन बले होयला की हामर बाटले माहा परभु महिमा होओं | 21 हाई काचे हातार बाटले आमेन बले होयला की हामर बाटले माहा परभु महिमा होओं | 22 जोन हामर उपरे छापा बले करी देला आचे आवरी बयाने ने आतमा के हामर मन मन ने देला | 23 मय माहा परभु के गवाह करी बलबी आची की मय एबे तक कुरिन्थुस ने ई काचे ना आसली, की मके तमर उपरे तरस आऊ आयबार आय | 24 ये नाई की हामी विश्वास बारे ने तमर उपरे परभुता जतायबार चाऊ आत; मातर तमर आनन्द ने साहायक आय कसन की तमी विश्वास ले ची स्थिर रऊ आस |