2
ये भाई मन जड़ दाय मुय माहा परभू र भेद सूनी करी तमर लगे आयली आची, तेबे सबद नोयले गीयान र उत्मता संगे ना आयला | 2 कसन की मुय ये ठानी रली की तमर मोंजी यीशु मसीह मातर कुरूस उपरे चेगाय लार मसीह के छाड़ी आवरी कोनी गोट के ना जानु | 3 मुय निर्बलता आवरी भय संगे, आवरी खुबे थर -थराय होई तमर संगे रला ; 4 आवरी मोर वचन, आवरी मोर परचार ने गियान लबाव बीती गोत नाई, मातर आतमा आवरी सामरत र प्रमाण रये, 5 ये काजे की तमर विश्वास मनुक र गियान उपरे नाई, मातर माहा परुभु र सामरत उपरे भरसा आय | 6 आवरी बले सिद लोक ने हामी गियान सुनाऊ आंव, मातर ये सोंसार र आवरी ये सोंसार र नाश होयबा बीती अधिकारी र गियान नाई ; 7 मातर हामी माहा परुभु हांय मन र गियान, भेद र नीती ने गोटायते रऊ आत, जोन माहा परुभु र सनातन ले हामर महिमा काजे ठेबायला | 8 जोन ये सोंसार र अधिकारी मन ले कोनी ना जान लाय, कसन की यदि हांय मन जानताय तो तेज मय परुभुर कुरूस उपरे ना चेगाय ताय | 9 मातर जसन लिखला आचे, “जोन गोट आंकी ने ना दखलू आवरी कान ने ना सुनलू, आवरी जोन गोत मनुकर चेत ने ना चेगे, हांय मन ची आय जोन माहा परुभु आपना मया करबा काजे तियार करला आचे |” 10 मातर माहा परुभु हांय मन के आपना र आतमा बाटले हामर उपरे प्रगट करला, कसन की आतमा सबु गोट, मातर माहा परुभु र गड़ गोट के बले जांचू आय | 11 मनुक मन ले कोन काहरी मनुकर गोट जानू आय, केवल मनुकर आतमा जोन हांय थाने ?आसनी ची माहा परुभु र गोंट बले कोनी ना जानेत केवल माहा परुभु र आतमा | 12 मातर हामी सोंसार र आतमा नाई, मातर हांय आतमा पायला आहास जोन माहा परुभु र बाटले आय कि हामी हांय गोट के जाना जोन माहा परुभु र हामके देला आचे | 13 जोन के हामी मनुक मन र गियान के सीखाय लार गोट नाई, मातर आतमा र सिखाय लार गोट ने, आत्मिक गोट आत्मिक गोट मिसाय -मिसाय करी सुनाऊ आत | 14 मातर शारीरिक मनुक माहा परुभु र आतमा र गोट ना अपनायेत, कसन की हांय मन हातार नजर ने मुरकता गोट आय, आवरी ना हांय मन तिके जानके सकुआत कसन की तिकर जांच आत्मिक रिती ले हौऊ आय | 15 आत्मिक लोक सबु काई जांचू आय, मातर हांय आपना काहरी ले जांचा ना जाऐ | 16 ''कसन की परुभु र मन के कोन जानला आचे कि हांके?” मातर हामर ले मसीह मन आय |