8
अबर ये भाई मन, हामि तोमके माहा परबु र हांय अनुग्रह र समाचार देऊ आंव जोन मकी दुनिया र कलीसिया ने होयला आचे | 2 की दुखर बड़े परीक्षा ने तिकर बड़े आनन्द आवरी भारी कंगापन ने तिकर उदार खुबे बड़ला | 3 तिकर बारे ने मोर ये गवई आय की हांय मन आपना र सामरत भरते, मातर सामरत ले बले बाहरे मन ले देला | 4 आवरी ये दान ने आवरी पवित्र लोक मनर सेवा र भागी होयबार अनुग्रह र बारे ने, हामि घन घन खुबे बिनती करलू, | 5 आवरी जसन हामि आशा करी रलू, असनी ची नाई मातर हांय मन परबु क्र आवरी माहा परबु र ईच्छा ले हामके बले आपना के देई देला | 6 हांई काचे हामि तीतुस के समझायलू की जसन हांय पईले शुरू करी रये, असनी ची तोमर मजी ले ये दान र काम के पूरा बले करो | 7 हांई काचे जसन तोमि सबु गोट ने बिसवास, वचन, गियान आवरी सबु असन यत्न ने, आवरी हांय मया ने जोन हामर संगे करू आस बाड़ते जाऊ आस, असनि ची ये दान र काम ने बले बाड़ते जाहा | 8 मुय आगिया र निति ने तो नाई, मातर दुसरा र उत्साह ले तोमर मया र सच्चाई के परकबा काचे बलु आंय | 9 तोमि हामर परबु यीशु मसीह र अनुग्रह के जानास की हांई धनी होई करी बले तोमर काचे कंगाल बनी गला, की हांतार कंगला होयल तोमि धनी होई जाहा | 10 ये गोट ने मोर सला येई आय : ये तोमर काचे अच्छा आय, जोन एक बरस ले ना सिरिप ये काम के करबा ने ची, मातर ये गोट के चलायबा ने बले पईले होई रलाय, 11 हांई काचे अबर ये काम के पूरा की जसन ईच्छा करबा ने तियार रलास, असनी ची आपना आपना पूंजीर असन पूरा बले करा | 12 कसन की अगर मनर तियारी होओ तो दान तार असन गरहण ब्लर होऊ आय जोन तार लगे आचे, ना करी तार असन जोन तार लगे निआय | 13 ये नाई की दूसरा के सुख आवरी आवरी तोमके दुःख मिरो, 14 मातर बरा बर बिचार ले ये समेया ने तोमर बड़बा तिकर घाटा ने काम आसो, की तिकर बाड़बा बले तोमर घाटा ने काम आसो की बरा बर होई जाओ | 15 जसन लिकला आचे, “जोन खुबे सकलला हांतार काई खुबे नानिकरला, आवरी जोन खिंडीक मा सकलला हांतार काई कम ना निकरला |” 16 माहा परबु र धन्यवाद होओ, जोन तोमर काचे हाई उत्साह तीतुस र हिरदय ने भरी देला आचे | 17 की हांय हामर समझबार मानला आवरी खुबे उत्साही होई करी हांय आपना र मन ले तोमर लगे गला आचे | 18 हामि तो संगे हांय भाई के बले पटायलु जंहार नाव सुसमाचार बारे ने सबु कलीसिया ने फयलला आचे; 19 आवरी अतकी ची नाई, मातर हांय कलीसिया र बाटले सोंगाय बले गला ये दान र काम काचे हांय हामर संगे जाओ | हामि सेवा हांई काचे करूआंव की परबु र महिमा आवरी हामर मनर तियारी छमे आसो | 20 हामि ये गोट ने सावधान रऊ आंव की ये उदार तार कामर बारे ने जांहार सेवा हामि करू आंव, कोनी हामके दोष ना लगायके पाओ | 21 कसन इ जोन गोट सिरिप परबु र ची लगे नाई, मातर मनुक र लगे पने अच्छा भला आय हामि तिकर चिन्ता करू आंव | 22 हामि तार संगे आपनार भाई के बले पटायलु आचु, जोनके हामि घन घन परखि खुबे गोट मन ने उत्साह पायलु आचु, मातर अबर तोमर उपरे ताके खुबे भरोसा आचे, एतार लागी हांय आवरी बले खुबे उत्साही आचे | 23 अगर कोनी तीतुस र बारे ने पुचले तो हांय मोर संगवारी आवरी तोमर काचे मोर सहकरमी आय; आवरी अगर हामर भाई मनर बारे ने पुचले तो हांय कलिसिया मन र पटाय लार आवरी मसीह र महिमा आत | 24 जसन: आपनार मया आवरी हामर हांय घमण्ड जोन तोमर बारे ने आय कलिसिया मन र छमे सिद्द करी तिके दकाहा |