आखरी दिना में अधर्म
3
1 हे तीमुथियुस, पण याद राख कै यीसू मसी गै दुबारै आण ऊं पेलां आ आखरी दिनां में आपणै पर भोत बुरो टेम आवैगो।
2 अर लोग अपणै आपगै सागै प्रेम करसी अर पीसा गै लालच में पड़ जावेगा बे आपगै बारै में घमण्ड करसी अर दूसरा ऊं अपणै आपनै न्यारा समझै अर दूसरा गी निंदा करसी बे आपगै माता पिता गी आग्या गो पालण कोनी करसी अर मदद करण आळा नै धन्यवाद कोनी करसी अर बे परमेसर गो आदर बी कोनी करेगा।
3 बे लोग आपगै परिवार अर दूसरै लोगां गै सागै प्रेम कोनी करेगा अर दूसरा गी चुगली करसी अर दूसरा नै माफ कोनी करेगा बे लोग आपगी बुराई नै रोकण नै कामयाब कोनी होवैगा अर भोत पक्का लोग होवैगा बे लोग आच्छी बातां ऊं प्रेम कोनी करसी।
4 अर बे बेलिया नै दुस्मण गै हात में दे देवैगा अर बिना सोचे समझै गन्दा काम करेगा अर बे लोग घमण्ड़ी होवैगा अर परमेसर ऊं जादा संसार गै सुख ऊं प्रेम करेगा।
5 बे लोग परमेसर गी भगती गो भेस तो धारैगा पण बिंगी सकती नै कोनी मानैगा। तू हिस्यै लोगा ऊं दूर'ईं रेई।
6 अर आमै ई केई लोग हिस्या बी होवै, झिका लोगा गै घरां में होळै होळै बड़गै पाप ऊं दबेड़ी अर हरेक तरियां गी अभिलासा में फसेड़ी लुगाईया नै आपगै बिस्वास में फसा ल्य।
7 बे लुगाईयां सदा नूंई सिक्सा तो सिखै है पण सच्चाई नै पूरै ग्यान तांई कदी कोनी पोंचै।
8 भोत साल पेलां यनेस अर यमबरेस जिंया मूसा गो बिरोध करयो हो बिंया ई झूठा सिक्सक सच्ची सिक्सा गा बिरोधी है। आं लोगां गी बुद्धी भ्रस्ट है अर बे सदां यीसू मसी गी सच्ची सिक्सा में बिस्वास कोनी करै है।
9 पण ऐ लोग जादा आ'गे कोनी बध सकै क्यूंकै जिंया यनेस अर यमबरेस गी मुर्खता सांमणै आई ही बिंया ई आंगी मुर्खता सांमणै आ जावैगी।
तीमुथियुस नै खास निरदेस
10 पण तीमुथियुस, तूं आच्छी तरियां मेरी सीख गी पालण करी है। अर मेरै चाल चलन में मेरै जीवन गै उदेसय नै, मेरै बिस्वास नै, मेरै धीरज नै, मेरै प्रेम नै अर सारी मुसीबता नै झिकी मैं सैई हूं तूं बानै जाणै है।
11 तूं तो जाणै ई है अंताकिया, इकुनियुम अर लिस्तरा सैहर में लोगां मनै किती तकड़ी सजा दी झिकी मैं सैई, पण यीसू मसी मेरै बा दुखां अर पीड़ा में मेरै सागै हो, बा सारां ऊं मनै बचायो।
12 पण झिका लोग यीसू मसी में बिस्वास कर'गे परमेसर गै आदर करण आळै जीवन नै जीणो चावैगा। बे जादा सताईजेगा।
13 पण दुस्ट अर पाखंडी लोग आपगी बुराई आप ई करता रेवैगा अर दूसरा नै बी बुराई करण में आ'गे बधांता जावेगा अर दूसरा नै धोखो देवैगा अर आप ई धोखो खावेगा।
14 पण तीमुथियुस तूं झिकी बातां नै म्हारै सागै सीखी है अर बिस्वास करयो है बा बातां नै सिखांतो जा। तूं जाणै ई है कै ऐ बातां कण सिखाई ही।
15 पण तनै ठा है कै तूं छोटे थकां ई बचन नै जाणै हो ओ पवितर बचन तनै मदद करै है कै झिका यीसू मसी पर बिस्वास राखै है बे परमेसर गै द्वारा छुटकारो पासी।
16 परमेसर गै बचन नै लिखण आळा परमेसर गै द्वारा आया हा। बचन लोगां गै मन में चानणो करयो, ओ पवितर बचन लोगां नै सच्चाई गी सिक्सा देवै है अर बानै सुधारण में मदद करै है अर बानै दरसण देवै है कै बां के गळत करयो है? ओ बचन पवितर जीवन जीण गी सिक्सा गै खातर लाभकारी है।
17 पण झिका परमेसर गै सागै रिस्तो राखै है बे आच्छा काम करण खातर सामरथी अर तैयार रेवै।