4
1 हे तीमुथियुस, परमेसर अर यीसू मसी मेरो गवा है, यीसू मसी लोगां गै उपर राज करण खातर आवैगो अर जींवता अर मरेड़ा गो न्याय कर'गे बिंगै सांमणै मैं तनै आग्या देगे केऊं कै,
2 तूं सुब समाचार गो परचार कर। चायै तनै सुविधा मिलै या ना मिलै, आपगै काम खातर तैयार रे। लोगा नै के करणो चईयै सारी तरियां गी सेन सीलता सागै बानै समझा। जद बे कोई गळत करै बानै चेता दे। लोगां नै धीरज गै सागै समझागे होसलो कर।
3 मैं आ ईंखातर बताण लागरयो हूं कै एक टेम हिस्यो आवैगो जद लोग खरयो संदेस सुणनो कोनी चावैगा पण झिकी बांगी इच्छा है बे बिंया ई करेगा अर आपगै खातर भिसी बातां भोत सुणैगा झिकी बे सुनणी चावै है।
4 झिको खरयो उपदेस है बिनै ना सुणगे मन घड़ंत बातां पर ध्यान देण लागज्यगा।
5 पण तूं हर दुख सुख में अपणै आपनै काबू में राख, दुख उठा अर परमेसर झिकी सेवा तनै दी है बिनै पूरी कर।
6 जठै तांई मेरी बात है तो मेरो जीवन परमेसर खातर बलिदान करण गो टेम आ'ग्यो है अर ईं जीवन ऊं विदा होण गो बी टेम आ'ग्यो है।
7 एक युद्ध में भाग लेण आळै फौजी गी तरियां मैं परमेसर गी सेवा पूरी हिम्मत गै सागै कर चुक्यो हूं अर झिको काम परमेसर मेरै हात में दियो है बिनै मैं पूरो कर दियो है अर मैं बिस्वास गी रुखाळी बी करी है।
8 अब मेरै खातर एक ई उडीक है। बा आ है कै मैं धरमी जीवन बिताऊं, ईंखातर सुरग में मेरै खातर एक इनाम रखेड़ो है। बो धारमिक जीवन जीण आळै नै दियो जावैगो। बि दिन न्याय करता प्रभु मनै जीत गो मुकुट पेरावैगो बो मनै ई कोनी, पण सगळा नै झिका प्रेम गै सागै बिंगै दुबारै आण गी उडीक करता रेवैगा।
आपगो संदेस
9 हे तीमुथियुस, मेरै कनै जल्दी आण गी कोसिस कर।
10 क्यूंकै ईं संसार गै मोह में पड़गै देमासa मनै छोड़ दियो है अर बो थिस्सलुनिकि सहर में चल्यो गेयो है। क्रेसकेंस गलातियो नै अर तीतुस दलमातिया नै उड़ग्यो है।
11 एकलो लूका मेरै कनै सेवा में है। मरकुस गै कनै जा अर जद तूं आवै बिनै आपगै सागै ले आई जिऊं मेरै काम में मेरी मदद करै है।
12 तुखिकुस नै मैं इफिसुस भेज दियो है।
13 जद तूं आवै तो बि पेरण आळै बांगै नै आवंतो लीयाई, झिको मैं त्रोवास में करपुस गै घर में भूल आयो हो अर खास कर'गे मेरै चमड़ै गै पतड़ा नै जरूर लीयाई झिकै पर मेरो कीं लिखेड़ो है।
14 लोह गो काम करण आळै सिकन्दर मेरो भोत नुक्सान करयो है। बण जिंया करयो है प्रभु बिनै बिस्यो ई फळ दियो हो।
15 तूं बी बिंऊं चोकस रे क्यूंकै बण यीसू मसी गै सुब समाचार गो भोत बिरोध करयो है।
16 जद रोमी सैहर गी कचेरी में मनै पेस करयो हो बि टेम मनै बचाण खातर कणैई कीं गवाई कोनी दी। मैं पराथना करूं हूं कै परमेसर बानै माफ करै।
17 मेरै पक्स में तो प्रभु खड़या होगे मनै सांती दी है कै मेरै द्वारा सुब समाचार गो भरपूर परचार हो सकै झिकै नै सगळा गेर यहुदी सुण सकै। सैर गै मूं ऊं बचायो जिंया मसी मनै पक्को मरण ऊं बचायो।
18 अर प्रभु मनै हर एक बुरे काम ऊं छुड़ावैगो अर मनै आपगै सुरग गै राज में सई सलामत लेगे जावैगो अर बिंगी ईं स्तुति आपां नै सदा ई करणी चईयै।
आखरी निरदेस
19 प्रिसकिल्ला, अक्विला अर उनेसिफुरुस गै परिवार नै निमस्कार केणो है।
20 इरास्तुस कुरिन्थुस में ठेरग्यो है। मैं तरफिमुस नै बिंगी बीमारी गै कारण मिलेतुस में छोड़ आयो हूं।
21 सर्दी ऊं पेलां आण गो जत्न करी। यूबुलुस, पूदेंस, लिनुस अर क्लोदिया अर सारां भाईयां थानै निमस्कार केवो है।
22 प्रभु यीसू मसी तेरै सागै रेवै। थारै सगळा पर प्रभु गी किरपा होंती रेवै। आमीन।