तीतुस गै नाम
यीसू मसी गै खास चेलै पौलुस गो खत
ईं खत गै बारै में
खत नै स्वीकार करण आळै तीतुस गै नाम ऊं ईं किताब नै जाणी जावै है। तीतुस एक गेर यहुदी हो अर बण मसी धरम नै स्वीकार कर लियो हो। बाद में बो पौलुस गी सेवा में सागै रळग्यो। बण न्यारै न्यारै सैहरा में पौलुस गी सेवा में एक बड़ो काम अर भरोसै ऊं साथ देण आळै गै रूप में साबित करयो हो।
लिखण आळो खास चेला पौलुस है। पेलां रोमी जेळ मूं छूटण गै बाद मकिदुनिया गी बिस्वासी मण्डली में सेवा काल गै टेम लिखी होवैगी। ओ मान्यो जावै है कै पौलुस गी पेली अर दूसरी परचार यातरा गै टेम तीतुस बिंगी सेवा टेल करी। तीमुथियुस गै तरियां तीतुस बी पौलुस गै बेटै बरगो हो। तीतुस गै खत गो विसय-सार है झूठै सिक्सकां अर अधरमी सेवकां गै बिरोध गो सांमणो करण आळै जवान सेवकां नै उपदेस अर निरदेस देणो। तीतुस ओ चावै है कै बो ओर सेवकां नै बी ओ उपदेस अर निरदेस देवै।
ओ खत तीन खास बातां गै बारै में खुलासो करै है। पेली, बिस्वासी मण्डली गै अगुवा गो सभाव किंया होणो चईयै। दूसरी, न्यारै-न्यारै तरियां गै बिस्वासी लोगां नै तीतुस कीं तरियां अर किंया सिक्सा देणी चईयै। तीसरी, मसी चाल चालन किंया होणो चईयै।
रूप रेखा
भूमिका 1:1-4
बिस्वासी मण्डली गा अगुआ 1:5-16
बिस्वासी मण्डली में कई लोगां गो काम 2:1-15
उपदेस अर चेताणो 3:1-11
आखरी निरदेस 3:12-15