तीतुस 1

तीतुस गै नाम

यीसू मसी गै खास चेलै पौलुस गो खत

स्वागत

1 मैं पौलुस, परमेसर गो दास हूं अर यीसू मसी मनै खास चेलो चुणगे भेज्यो है। तीतुस, ओ खत मैं तनै लिखण लागरयो हूं। अर परमेसर चावै कै मैं बिंगै चुणेड़ै लोगां गो बिस्वास मजबूत करूं। अर बानै सच्चाई गै बारै में सिखाऊं कै बे सच्चाई नै जाणगे परमेसर गी इच्छा गै हिसाब ऊं आपगो जीवन जीयै। 2 आपणै बिस्वास अर सच्चाई गी आस आ ई है कै परमेसर आपां नै अनन्त जीवन देण गो वायदो आदि काल में करयो हो। बो वायदो अटल है अर सगळा नै ध्यान है कै परमेसर कदी बी झूठ कोनी बोलै। 3 अर परमेसर आपगै बांदेड़ै टेम पर ईं सच्चाई गो संदेस आपगै लोगां तांई पुगायो अर ओ संदेस सुणाण गी जुमेदारी मनै सोंपी है। 4 हे तीतुस, आपां दोनूं एक ई प्रभु, यीसू पर बिस्वास करण आळा हां। ईंखातर तूं मनै आपगै सागी बेटै बरगो लागै। पिता परमेसर अर आपणै मुकतीदाता यीसू मसी गै कानी ऊं तेरै पर किरपा होवै अर सांती मिलती रेवै।

करेते में तीतुस गी सेवा

5 हे तीतुस, मैं तनै ईंखातर करेते टापू में छोड़गे आयो कै झिको काम बिचाळै रेग्यो बिनै तूं पूरो करै। मैं जिंया तनै बतायो बिंया ई तूं हरेक नगर गी बिस्वासी मण्डली में जा'गे अगुवा नै चुणगे नियुक्त करी। 6 झिका निरदोस होवै अर बांगै किंगैई एक ऊं जादा घराळी ना होणी चईयै। बांगा टाबर बी प्रभु गै बिस्वास में पक्का होवै अर बे बदमासी करण आळा ना होवै पण सभाव गा आच्छा अर आग्या मानण आळा होवै। 7 क्यूंकै मुखिया नै बिस्वासी मण्डली संभालण गी जुमेदारी दी है ईंखातर बे निरदोस होणा चईयै अर बे जिदी, क्रोधी, पिय्याकड़, झगड़ालु अर बेहक गी कमाई करण आळा ना होवै। 8 पण बे आपगै घरै आण आळा गो आदर-मान करण आळा, अर सारा गी भलाई करण आळा होवै अर समझदार, इमानदार, पवितर अर अपणै आपनै वस में राखण आळा होवै। 9 आपां झिकी सच्ची सिक्स्या यीसू मसी गै बारै में दी है बि पर बे मजबूत बिस्वास करण आळा होणा चईयै। जिंऊं बे खरी सिक्स्या देगे लोगां गै बिस्वास नै मजबूत कर सकै। अर झूठा उपदेस देण आळा नै गळत साबित कर'गे बांगो मूं बंद कर सकै।

10 क्यूंकै भोतसा लोग हिस्या है झिका खरी सिक्स्या मानै कोनी अर गळत सिक्स्या देगे लोगां नै धोखो देवै। आमै खास कर'गे जादा बे लोग है झिका ऐ सिखावै है कै सारा मसी खतनै गी यहुदी रीति रिवाज नै मानणो चईयै। 11 अर ऐ लोग नीच कमाई करण खातर लोगां नै गळत सिक्स्या दे देगे घर गा घर बिगाड़न लागरया है। हिस्या लोगां गो मूं बंद करवाणो चईयै। 12 बां लोगां गै बारै में भोत पेलां करेते टापू गै एक ग्यानी आदमी केयो, “अठै गा घणकरा सा लोग सदां ऊं झूठा है अर ऐ खतरनाक जानवरां गी तरियां अर आळसी पेटू होवै।” 13-14 मैं तनै बतांऊं कै बि ग्यानी आदमी गी बात साची है ईंखातर बांनै सखताई ऊं बताये कर कै यहुदी लोगां गी मनघंड़त क्हाणियां पर अर झिका सच्चै बचन नै मानै कोनी अर झिका सच्चै बचन ऊं भटक जावै। बांगी सिक्सया पर मन ना लगावै। पण बे आपगै मुकतीदाता गै बिस्वास में मजबूत होगे खड़या रे सकै।

15 झिका लोग सुद्ध है बां खातर सारी चिजां सुद्ध है। अर झिका यीसू मसी पर बिस्वास कोनी करै बां खातर सारी चिजां असुद्ध है क्यूंकै बांगी बुद्धी अर मन बुराईयां ऊं खराब होएड़ो है। 16 हिस्या लोग केवै कै म्हारो रिस्तो परमेसर सागै आच्छो है पण बांगै काम ऊं लागै कै बांगो कोई रिस्तो कोनी। क्यूंकै बानै कोई पसन्द कोनी करै अर परमेसर गी आग्या नै मानै कोनी अर बे कोई आच्छै काम गै लाइक बी कोनी।