तीतुस 2

खरी सिक्सा गो पालण करणो

1 पण हे तीतुस, तूं भिसी झूठी सिक्सया देण आळा बरगो ना बणी। पण तूं बिस्वासी मण्डली गै लोगां नै खरी सिक्सया देंतो रे'ईं। 2 अर बुडे लोगां नै सिखा कै बे चोकस अर आदर मान गै लाइक अर समझदार बणै। अर बागों बिस्वास, प्रेम अर धीरज पक्को होणो चईयै।

3 ईं तरियां ई बुडी लुगाईयां नै सिखा कै बे आपगो चाल-चलन पवितर राखै अर चुगलखोर अर पिय्याकड़ ना होवै। पण बे दूसरा नै आच्छी बातां सिखाण आळी होवै। 4-5 अर बे जवान लुगाईयां नै समझांती रेवै कै आपगै पती अर टाबरां ऊं प्रेम राखै। अर बे समझदार, पवितर अर भली होवै अर पती गी आग्या मानण आळी अर घर-परिवार नै आच्छी तरियां संभालण आळी बणै। जिंऊं परमेसर गै बचन गी कोई निंदा ना कर सकै।

6 इंया ई तूं जवान आदमियां नै सिखाये कर कै बे समझदार बणै। 7 हे तीतुस, तूं अपणै आपनै भले कामां गो नमुनो बणा। 8 अर तूं झिको सिखावै बो बिना कपट, सुणगे मानण गै लाइक अर खरो होणो चईयै। जिंऊं कोई बी तेरी बात नै गळत ना बता सकै। क्यूंकै आपणै बिरोदियां नै आपणी बात नै गळत साबित करण गो मोको ना मिलैगो तो बे आपी सरम ऊं झूकज्यगा।

9 नोकर लोगां नै समझा कै बे आपगै मालिक गी आग्या में रेवै अर बानै सारी बातां में खुस राखै। अर उथळगे जबाब ना देवै। 10 अर बे कीं बी तरियां गी चोरी चलाकी ना करै अर हरेक तरियां ऊं मालिक गै भरोसै आळा होवै। जिंऊं हरेक बातां में आपणै चाल चलण ऊं दूसरै लोगां गै सांमणै आपगै मुकतीदाता परमेसर गै बचन गी सोभा बढा सकै।

11 क्यूंकै परमेसर गी किरपा सारी मिनख जाती गो उद्धार करण खातर परगट होयी है। 12 अर आ किरपा आपां नै ओ ई चेतावै कै आपणै जीवन में संसारिक लालसा अर माड़ा काम छोड़गे अर आपगो मन वस में राखगे भगती अर धारमिक जीवन जीणो चईयै। 13 अर आपां नै आपणो मुकतीदाता परमेसर यीसू मसी नै मेमा गै सागै धरती पर आण गी मोटी आस लेगे अडिकता रेंवां। 14 झिकै आपणै खातर अपणै आपनै करूस पर बलिदान कर दियो कै आपां पाप ऊं मुकत होज्यां अर बिंगी रजा में चालण आळा खास लोग बणगे भला-भला काम करण में सदां तैयार रेंवां।

15 हे बेटा, ऐ बातां तूं पूरै हक ऊं बता, सिखा अर समझा जिंऊं सगळा लोग तेरो आदर-मान करता रेवै।