मसी चाल चलण
3
1 लोगां नै सुद्धी करा कै बे अफसरां गै अधीन में रेगे बांगी आग्या मानता रेवै अर हरेक भलो काम करण खातर हरदम तैयार रेवै।
2 अर किंगी बदनामी ना करै अर झगड़ालु ना होवै पण बे सारै लोगां सामै छोटा बणगे कोमल, सील, नरम सभाव गा बण्या रेवै।
3 क्यूंकै आपां नै यीसू मसी पर बिस्वास करण ऊं पेलां सच्चै परमेसर गी समझ कोनी ही अर आपां धोखै में रेंता हा। अर हरेक तरियां गी लालसा अर मोह-माया गा गुलाम होगे बेमां में पड़ेड़ा हा। अर बैर-भाव, ईरस्या, एक दूसरै ऊं आपस में घिरणा करता हा।
4 पण जद आपणै मुकतीदाता परमेसर गी किरपा ऊं प्रेम यीसू मसी गै रूप में लोगां गै बिचाळै आयो।
5 तो बण आपणो उद्धार करयो। पण आपां नै ठा है आपणो उद्धार आपणै धारमिक कामां ऊं कोनी होयो पण परमेसर आपणै पर दया कर'गे पवितर आत्मा ऊं आपणा सारा पाप धो दिया अर आपां नै एक नूंओ जन्म अर जीवन दियो है।
6 आ पवितर आत्मा परमेसर आपगी दया ऊं आपणै उद्धारकरता यीसू मसी गै द्वारा आपां नै जादा ऊं जादा दी है।
7 झिकी ऊं परमेसर आपणै पर किरपा कर'गे आपां नै निरदोस बणाया अर अनन्त जीवन गा बारस बणण गी आस दी है।
8 ऐ सगळी बातां साची है अर लोगां खातर भली अर लाभदायक है। ईंखातर मैं चाऊं कै तूं ऐ बातां लोगां नै जोर देगे सिखा। जिंऊं झिका लोग परमेसर पर बिस्वास करयो है बे भला-भला काम करण में आपगो ध्यान देंता रेवै।
9 पण तूं मुर्खता अर खानदान गी बडाई गी बातां गै बाद विवाद ऊं दूर'ई रेई। अर यहुदी लोगां गै नेम-विधान गै झगडै़ अर कीं बी तरियां गै बिरोध में ना पड़ी। क्यूंकै ऐ सगळी बातां बेमतलब अर कोई काम गी कोनी।
10 जे कोई फूट घालण आळो आदमी बिस्वासी मण्डली में फूट घालै तो बिनै एक-दो बारी ध्यान ऊं समझाई पण बो फेर ईं ना सुधरै तो तूं बी आपगो टेम ना खराब करी। अर बिस्वासी लोगां पर बिंगो कोई असर ना पड़ण देई।
11 तनै ओ ठा है कै हिस्या आदमी सच्चै रा ऊं भटकग्या अर पाप कर'गे अपणै आपनै दोसी बणावंता रेवै।
आखरी निरदेस
12 जद मैं तेरै कनै भाई अरतिमास, भाई तुखिकुसa माऊं एक नै भेजूंगा जद तेरै कनै पूग जावै तो तूं मेरै कनै निकुपुलिस सैहर में आण गी पूरी कोसिस करी। क्यूंकै मैं बी बठै जा'गे स्याळै में रेण गो पक्को सूंआज करयो है।
13 अर सुण। जेनास बकिल अर अपुल्लोसb नै कोसिस कर'गे आ'गे गी यातरा में बांगी मदद करियो अर ध्यान राखियो आनै कोई बी चीज गी कमी-घटी ना रेण देईयो।
14 अर आपणै बिस्वासी लोगां नै बी सिखा कै आपगी जरूरतां पूरी करण खातर आच्छै-आच्छै कामां में लाग्या रेवै। जिंऊं बांगै आच्छै कामा अर जीवन ऊं दूसरै लोगां नै ई फायदो मिलै।
15 मेरै अर मेरै सगळा साथियां कानी ऊं तनै अर करेते टापू में रेण आळै सारै बिस्वासी भेन-भाईयां नै निमस्कार। म्हान परमेसर गी किरपा गो हात सदां ईं थारै सिर पर रेवै। आमीन।