फिलेमोन गै नाम
यीसू मसी गै खास चेलै पौलुस गो खत
ईं खत गै बारै में
इफिसियों, फिलिप्पियों अर कुलुसियों गै खत गी तरियां पौलुस फिलेमोन गो खत बी जेळ ऊं लिख्यो है, झिको रोम में पौलुस गै पेली बारी केद गै टेम में लिख्यो। उनेसिमुस, झिको रोमी राज गै लाखां गुलामां मूं एक हो, आपगै मालिक फिलेमोन गै घर ऊं चोरी कर'गे भाज'ग्यो हो। आखिर में बो रोम पूग्यो, बठै पौलुस नै मिल्यो अर बिनै मसी गै बिस्वास में ले आयो। अब उनेसिमुस नै आपगै मालिक गै द्वारा मसी में पूरो करण खातर बिंगै कनै फेर जाणो हो। उनेसिमुस गी पक्की सजा बिंगी मोत होवैगी, पण पौलुस उनेसिमुस गी ओर ऊं मेल मिलाप करण गै खातर ओ खास खत लिख्यो।
कुलुसियों सैहर गी बिस्वासी मण्डली में फिलेमोन ई गुलाम राखण आळो एकलो बिस्वासी कोनी हो। ओ खत दूसरै मसी मालिकां गै खातर बांगै गुलाम-भाईयां गै सागै चाल चलण गै बारै में एक रा दिखाणो है। फिलेमोन गै बिंगै गुलाम पर अधिकार होण गै बारै में पौलुस इनकार कोनी करयो, पण बिनै ईं हालत में फिलेमोन ऊं मसी भाईचारै गै नेम नै उनेसिमुस गै सागै चाल चलण में ल्याण नै केयो। सागै ईं सागै पौलुस उनेसिमुस गी सारी देण दारी नै आप चुकाण गी कोसिस करै है। बिंया ओ खत गुलामी गी रिवाज गै बिरोध में एक हमलो कोनी है, पण एक सुझाव है कै किंया मसी मालिक अर गुलाम बुरी रिवाज में बी मसी बिस्वास गी तरियां जीवन बिता सकै है। ओ संभव है कै फिलेमोन उनेसिमुस नै आजाद कर'गे पौलुस गै कनै पाछो घाल दियो। ओ बी सुझाव दियो है कै उनेसिमुस पेली इफिसुस गी बिस्वासी मण्डली गो सेवक अर बाद में अगुवा ऊं ऊंचो बणग्यो।
रूप रेखा
पौलुस गी ओर ऊं निमस्कार 1-3
फिलेमोन गो प्रेम अर बिस्वास 4-7
उनेसिमुस नै भाई मानो 8-22
आखरी निरदेस 23-25