यीसू मसी गो सच्चो सिपाई
2
1 ईंखातर तूं झिको मेरै बेटै बरगो है, यीसू मसी में मिलण आळी किरपा गै द्वारा आत्मिक जीवन में बलवान हो'जा।
2 अर झिकी बाता भोतसा गवा लोगा गै सामणै मेरूं सुणी। बे बाता बा बिस्वासी आदमिया नै सूंप दे झिका दूसरा नै सुणाण गै काबिल है।
3 अर यीसू मसी गै एक आच्छै सिपाई गी तरियां मेरै सागै दुख भोग।
4 जद कोई सिपाई लड़ाई करण जावै है तो आपणी सेनापती नै खुस करै अपणै आपनै लड़ाई गै काम ऊं छोड़गे संसार गै दूसरै काम में मन कोनी फंसावै है।
5 अर जद कोई आदमी दोड़ गै खेल में भाग लेवै तो बिनै जीत गो मुकुट बि टेम तांई कोनी मिलै जद तांई बो खेल गै नेमा गी पालण करतो होयो ना खेलै।
6 जादा ओखो काम करण आळै किसान नै ई फसल गो सगळा ऊं पेलो भाग मिलणो चईजै।
7 झिको मैं केऊं हूं बि पर धयान दे अर प्रभु तनै सारी बातां गी समझ देवैगो।
8 यीसू मसी नै याद राखो झिको मरेड़ा मूं जी उठयो अर झिकै दाऊद गी पीढी में जन्म लियो है ओ ई बि सुब समाचार गो मतलब है झिकै गो मैं उपदेस देऊं हूं।
9 ईंखातर मैं इतो दुख सेऊं हूं अठै तांई कै मैं केदी बी हूं पण परमेसर गै बचन नै बताण ऊं कोई रोक कोनी सकै।
10 ईं कारण झिकै लोगां नै परमेसर चुण्या है बां खातर मैं हरेक दुख झेलतो रेऊंगा क्यूंकै बे बी यीसू में मिलण आळी मुकती लेगे सदा खातर भोत आदर मिलण गी जिग्या में जावै।
11 ओ बचन बिस्वास गै लाइक है कै,
जे आपां बिंगै सागै मरांगा तो
बिंगै सागै जीयांगा बी;
12 जे आपां यीसू मसी गै सागै दुख झेलता रेवांगा तो
बिंगै सागै राज बी करांगा।
जे आपां बिगों इनकार करांगा तो
बो बी आपणो इनकार करेगो।
13 जे आपां परमेसर गै सागै बिस्वास गै लाइक ना रेवां तो बी
बो बिस्वास गै लाइक रेवेगो
क्यूंकै बो आपगी बात बदळ कोनी सकै।
खरयो काम करण आळो
14 बिस्वासी लोगां नै ऐ बातां गी याद करावंतो रे अर परमेसर नै गवा बणागे बानै सावचेत करतो रे कै बां बातां नै लेगे लड़ाई झगड़ा ना करै हिस्यै लड़ाई झगड़ा में कोई फायदो कोनी पण झिका आनै सुणै है बे बी गळत हो जावेगा।
15 अपणै आपनै परमेसर गो मानगे अर लाइक बणगे एक हिस्यै दास गै रूप में पेस करण गो जत्न करतो रे झिका नै कीं बात ऊं सरमाणो ना पड़ै झिको परमेसर गै सच्चै बचन नै सई रूप में सिखांतो होवै।
16 अर संसार गै बाद विवाद ऊं बच्यो रे क्यूंकै ऐ बातां लोगां नै परमेसर ऊं दूर करै है।
17 हिस्यै लोगां गी सिक्सा खाज गी तरियां सरीर पर फेल ज्य बिंया ई बा गळत सिक्सा लोगां में फेल ज्य। बि गळत सिक्सा देण आळा में हुमिनयुस अर फिलेतुस है।
18 झिका सच्चाई ऊं भटकग्या है बांगो केणो है कै मरेड़ा गो जी उठणो हो'ग्यो है। अर किता बिस्वासी लोगां गै बिस्वास नै खतम कर दय है।
19 कीं बी होवै झिका परमेसर गै उपर बिस्वास राखै है बे बि मकान गी तकड़ी नींव गी तरियां टिकया रेवै है। बि पर ऐ बातां लिखी है, “प्रभु आपगै भगता नै जाणै है” अर ओ बी लिखेड़ो है “बो हरेक झिको केवै है कै बो प्रभु गो है बिनै बुराईयां ऊं बचणो चईयै।”
20 एक मोटै घर में सोनै चांदी गा ई भांडा कोनी होवै बिमै लकड़ी अर माटी गा भांडा बी होवै है कीं खास काम गै खातर होवै है अर कीं हलकै काम गै खातर।
21 ईंखातर जे आदमी अपणै आपनै बुराईयां ऊं सुद्ध कर लेवै तो बो बि खास भांडै गी तरियां काम में ल्यावै अर पवितर डेरेगो झिको हरेक भले काम खातर आपगै मालिक गै काम आवै है।
22 हे तीमुथियुस, ईंखातर तूं जवानी गी बुरी इच्छा ऊं दूर रे अर सुद्ध मन ऊं परमेसर गी आराधना करण आळा गै सागै तूं परमेसर गी निगा में धारमिकता गो जीवन जी, बिस्वास गै लाइक बण अर दूसरा गै सागै प्रेम राख अर सच्चै साथियां गै सागै सांती ऊं रे।
23 मूरखता अर बेकार गै झगड़ा ऊं सदां बचगे रे क्यूंकै तूं जाणै है कै लड़ाई झगड़ा ऊं बैर पैदा होवै है।
24 अर प्रभु गै सेवक नै तो झगड़नो ई कोनी चईयै बिनै तो सारां गै सागै प्रेम भाव ऊं रेणो चईयै अर परमेसर गो बचन आच्छी तरियां सिखाण आळो होणो चईयै अर हर बात नै सेण आळो बी होणो चईयै।
25 झिको थारी सिक्सा गै उपर बाद विवाद करै है बिनै बी हात जोड़गे ईं आसा ऊं समझावो कै परमेसर बिनै बी मन बदळण गी सकती देवै अर बिनै बी सच्चाई गो ग्यान होवै।
26 अर बे सावचेत होगे सैतान गै वस ऊं छूट जावै झिका नै सैतान आपगी इच्छा ऊं चलाण खातर पकड़ राख्या है अर बे बी परमेसर गी इच्छा नै धारण कर सकै।