तीमुथियुस गै नाम
यीसू मसी गै खास चेलै पौलुस गो दूसरो खत
स्वागत
1
1 मैं पौलुस, यीसू मसी गो खास चेलो हूं, मनै परमेसर गी इच्छा ऊं चुणयो है। झिका यीसू मसी गै उपर बिस्वास राखै है बानै जीवन देण गो वायदो परमेसर करयो है। इंगै बारै में बताण खातर परमेसर मनै भेज्यो है।
2 हे तीमुथियुस, तूं मेरै बेटै बरगो है, मैं ओ खत लिखूं हूं। मैं पराथना करूं कै पिता परमेसर अर आपणो प्रभु यीसू मसी थानै किरपा अर दया अर सांती देंवंतो रेवै।
धन्यवाद अर तरो ताजा करणो
3 दिन रात आपगी पराथना में सदा ई थानै याद करता होयां, मैं बि परमेसर गो धन्यवाद करूं अर झिकै गी सेवा जिंया मेरै बाप दादा करी है बिंया ई सुद्ध मन ऊं करूं।
4 तूं मेरै खातर भोत रोयो जद मैं तेरूं न्यारो होण लागरयो हो आ बात याद कर'गे तेरूं मिलण गी इच्छा करूं कै तेरूं मिलगे भोत खुस होज्यूं।
5 मनै तेरो यीसू मसी गै उपर सच्चो बिस्वास बी याद है झिको पेलां तेरी नानी लोईस अर तेरी मां यूनीके में हो। मनै भरोसो है कै बो ईं बिस्वास तेरै में बी है।
6 ईंखातर मैं तनै याद करूं कै परमेसर गै वरदान गी बि जोती नै जगागे राख झिकी तनै मिली ही जद ई मैं तेरै पर आपगो हात रख्यो हो।
7 क्यूंकै परमेसर झिकी आपां नै आत्मा दी है बा आपां नै कायर कोनी बणावै है अर आपां नै आपगी सकती अर प्रेम अर काबू में राखै।
8 ईंखातर तूं आपणै प्रभु गै बारै में दूसरा नै बताण गै खातर सरमिन्दो ना होई, मैं प्रभु गै खातर जेळ में कर दियो गेयो हूं। ईंखातर मेरै ऊं मिलण खातर सरमिन्दो ना हो। पण तनै परमेसर झिकी सकती दी है बिमू सुब समाचार गै खातर मैं झिको दुख उठाण लागरयो तूं बी बिमै ईं दुख उठा।
9 परमेसर आपणो उद्धार करयो है अर एक पवितर जीवन जीण गै खातर आपां नै बुलायो है। पण ईंखातर कोनी कै आपां आच्छा काम करया है पण आपणै उपर किरपा कर'गे आपगै उद्धेस नै पूरो करण खातर आपां नै बुलायो है क्यूंकै संसार गी सरसटी ऊं पेला ई बण आपगी किरपा दिखागे यीसू मसी गै द्वारै आपां नै देण गी योजना बणा दी ही।
10 पण जद आपणो मुकतीदाता यीसू मसी संसार में आयो जद बण किरपा परगट करी, अर बण ई यीसू मसी मोत गी सकती नै खत्म कर दी अर जिता बिंगै सुब समाचार नै मान्यो है अर बानै परमेसर गै सागै सदां गै खातर जीवन बिताण गो मोको दियो है।
11 ईं सुब समाचार नै फेलाण खातर मनै एक यीसू मसी गो सुब समाचार सुणाण आळै परचारक अर खास चेला अर सिक्सक गै रूप में चुण्यो है।
12 अर ओ ई कारण है झिकी बातां गो मैं दुख उठाण लागरयो हूं बिऊं मैं सरमिन्दा कोनी क्यूंकै झिकै पर मैं बिस्वास करयो है मैं बिनै जाणूं हूं अर मैं ओ मानु हूं कै बण मनै झिको सुंपयो है बो बिंगी रक्सा करण में सामरथी है जद तांई यीसू मसी गै दुसर आण गो दिन ना आवै।
13 झिकी सच्चाई गी सिक्सा मैं तनै सिखाई है बिनै पकड़े राख अर थे बी यीसू मसी गै उपर बिस्वास कर'गे अर सगळां गै सागै प्रेम कर'गे बांगी खरी सिक्सा नै दूसरा नै सिखांतो रे।
14 आपणै मां वास करण आळी पवितर आत्मा गै द्वारा तूं बि किमती सुब समाचार गी रुखाळी कर झिको तनै सुंपयो है।
15 जिंया कै तूं जाणै है कै सगळा आसिया प्रदेस गा बिस्वासी लोग, मनै छोड़ग्या है। फुगिलुस अर हिरमुगिनेस बामू ई है।
16 उनेसिफुरुस गै परिवार पर प्रभु किरपा करै। क्यूंकै बो मनै मिलण आयो अर जद मैं जेळ में हो जद मनै मिलण ऊं सरमायो कोनी।
17 पण बो तो जद रोम सैहर में आयो हो, जद तांई मेरै ऊं मिल्यो कोनी, अर पूरै जत्न ऊं मनै ढूंढतो रेयो।
18 प्रभु करै बिनै, यीसू मसी गै आण गै दिन प्रभु गी ओर ऊं दया मिलती रेवै, बण इफिसुस में मेरी कई तरियां गी झिकी सेवा करी है तूं बानै भोत आच्छी तरियां जाणै है।