बिनास गो बेटो
2
1 हे भाईयो अर भेनों, आपणै प्रभु गै दुसर आण गै बारै में अर आपां बिंगै सागै भेळा होण गै बारै में थानै बताणो चावूं हूं।
2 केई लोग केवै है कै प्रभु गो दिन आ'ग्यो है। बे लोग कोई परमेसर गी बात अर उपदेस गो सबूत अर म्हारै लिखेड़ै खत ऊं दावो पेस करै है। ओ सुणगे थे घबराईयो ना
3 कोई थानै कीं तरियां ऊं ना भेकावै। बो दिन जद तांई कोनी आवै जद तांई परमेसर गो भारी बिरोध ना हो जावै अर मनमानी करण आळो आदमी पैदा ना होवै झिकै गो नास होणो ई है।
4 बो आपगै घमण्ड में परमेसर अर सगळां गो बिरोध करेगो अर सारा ऊं अपणै आपनै मोटो मानैगो झिका देवता कुहावै है या पूजनीय समझया जावै। अठै तांई कै यरुसलेम में परमेसर गै मिन्दर में विराजमान होगे अपणै आपनै परमेसर होण गो दावो पेस करेगो।
5 के थानै याद कोनी है कै थारै बिचाळै रेगे मैं थानै ऐ सगळी बातां समझाया करतो हो।
6 अर थे तो अब आ जाणो ई हो कै बण किंया रोक राख्यो है बो सई टेम आणै पर ई परगट होवै।
7 मनमानी करण आळो आदमी अबी बी लोगा गै मां काम करण लागरयो है पण बो जद तांई गुप्त रेवेगो बि टेम तांई रोकण आळो कोनी हट ज्य।
8 जद ई बो मनमानी करण आळो आदमी परगट होवैगो जद प्रभु यीसू मसी आपगी मेमां में फेर परगट होवैगो। बो बिनै आपगै मूं ऊं निकळण आळै आदेस ऊं मार देवैगो अर आपगै आण गै तेज ऊं नस्ट कर दयगो।
9 बि मनमानी करण आळै आदमी गो आणो सैतान गी सकती ऊं होवैगो अर भोत बड़ी सकती, झूठा निसान अर चमत्कारां गै सागै परगट होवैगो।a
10 नास होण आळा आदमियां नै हरेक तरियां गी बुराई ऊं होण आळै धोखै में घालै है क्यूंकै बि सच्चाई ऊं प्रेम करण नै मान्यो कोनी झिको बानै बचाणै में सामरथी हो।
11 अर ईं कर'गे ई परमेसर बानै भटका देण आळी सामरथ नै भेजेगो जिंऊं बे झूठ पर बिस्वास करै।
12 अर जिता बी लोग सच्चाई ऊं प्रेम कोनी करै पण बे अधर्म ऊं खुस होंता रेवै बे सगळा सजा पावोगा।
मजबूत बणया रेवो
13 हे भाईयो अर भेनों, प्रभु थानै प्रेम करै है, थारै खातर म्हानै सदा ई परमेसर गो धन्यवाद करता रेणो चईयै क्यूंकै परमेसर आदि ऊं थानै चुण लिया है जिऊं थे पवितर करण आळी आत्मा गै द्वारा अर सच्च में आपगै बिस्वास गै सागै उद्धार पाओ।
14 अर ईं उद्धार गै खातर झिकै सुब समाचार गो म्हे थानै उपदेस दियो हो बिंगै द्वारा परमेसर थानै बुलाया कै थे बी आपणै यीसू मसी गी मेमां नै धारण कर सको।
15 ईंखातर हे भाईयो अर भेनों, मजबूत बणगे रेवो अर झिको उपदेस थे बचन अर खत गै द्वारा म्हारै ऊं सीख्यो है बिंगो पालण करता रेवो।