थिस्सलुनिकि सैहर गै मसी लोगा गै नाम
यीसू मसी गै खास चेलै पौलुस गो दूसरो खत
स्वागत
1
1 पौलुस अर सिलवानुस अर तीमुथियुस गी ओर ऊं थिस्सलुनिकियों सैहर गी बिस्वासी मण्डली गै लोगां गै नाम गो खत। थे झिका पिता परमेसर अर प्रभु यीसू मसी गा लोग हो।
2 थानै परमेसर पिता अर प्रभु यीसू मसी ऊं किरपा अर सांती मिलती रेवै।
न्याय गो दिन
3 हे भाईयो अर भेनों, म्हे थारै बारै में हर टेम परमेसर गो धन्यवाद करां अर इंया करणो जरूर बी है। क्यूंकै थारो बिस्वास बढण लागरयो है अर थारै सगळां गो प्रेम आपसरी में भोत ई बढण लागरयो है।
4 अठै तांई कै म्हे खुद परमेसर गी बिस्वासी मण्डली में थारै बारै में घमण्ड करां, कै झिको लड़ाई झगड़ा अर क्ळेस थे सेयो बा सारां में थारो धीरज अर बिस्वास परगट होवै।
5 ओ ईं बात गो सबूत है कै परमेसर गो फेंसलो सच्चो है। बिंगो मकसद ओ ई है कै थे परमेसर गै राज में आण गै लाइक बणो। अब थे बां खातर कस्ट उठाण लागरया हो।
6 क्यूंकै परमेसर न्यायी है ईंखातर झिको थानै कस्ट देवै बिंगै बदळै में बिनै कस्ट मिलैगो।
7-8 अर थे झिको कस्ट सेण लागरया हो, थानै परमेसर आराम देवैगो, जद प्रभु यीसू मसी आपगै सकतीसाली दूतां गै सागै सुरग ऊं जगती आग में परगट हो'सी। जद बो लोगां नै सजा देवैगो झिका परमेसर नै मानै कोनी अर झिका सुब समाचार नै कोनी मानै है।
9 आ लोगां नै प्रभु आपगै सामैं ऊं अर आपगी मेमां अर सकती गै तेज ऊं दूर कर'गे अनन्तकाळ गी सजा देवैगो।
10 ओ बि दिन होवैगा जद पवितर लोग प्रभु यीसू नै आदर अर मेमां देवैगा अर प्रभु नै देखगे अचंभो करसी बिमै थे बी सामिल होगा क्यूंकै म्हानै बिंगै बारै में गवाई दी, बि पर थे बिस्वास करयो हो।
11 ईंखातर म्हे सदा ई थारै खातर पराथना करां कै म्हारै परमेसर झिकै मकसद ऊं थानै बुलायो है बिंगै लाइक बणा दय अर थारी सारी आच्छी इच्छा नै अर प्रभु में बिस्वास गै कारण करेड़ै हर एक काम नै आपगै सामरथ ऊं पूरो कर देवै।
12 ईं तरियां आपणै प्रभु यीसू मसी गो नाम थारै द्वारा आदर पावेगो अर थे बिंगै द्वारा आदर पावोगा ओ सारो कीं आपणै परमेसर गै अर यीसू मसी गी किरपा ऊं होवैगो।