पराथना करण खातर केवै
3
1 हे भाईयो अर भेनों, थे म्हारै खातर पराथना करो झिकै ऊं प्रभु गो बचन जल्दी ऊं फेल जावै अर सारी सरसटी आदर गै सागै स्वीकार करी जावै जिंया कै थारै बिचाळै होयो है।
2 पराथना करो कै म्हे भटकेड़ा ऊं अर बुरे आदमिया ऊं दूर रेवां क्यूंकै सारा लोग तो प्रभु पर बिस्वास कोनी करै।
3 पण प्रभु तो बिस्वास लाइक है बो थारी सकती बढावैगो अर थानै बुरा लोगां ऊं बचागे राखैगो।
4 अर म्हानै प्रभु पर अर थारै पर भरोसो है कै झिकी आग्या म्हे थानै देवां बिनै थे मानो अर मानता बी रेवोगा।
5 परमेसर गै प्रेम अर मसी गै धीरज नै समझण में अर म्हारै जीवन में परगट करण में प्रभु थारै मन गी अगुवाई करै।
काम करण नै समझणो
6 हे भाईयो अर भेनों, अब थानै आपणै प्रभु यीसू मसी गै अधिकार ऊं आग्या देवां बा भाई-भेनां ऊं न्यारा रेवो झिका हिस्यो जीवन बितावै कै झिको बांगै खातर सई कोनी अर झिकी सिक्सा म्हारै ऊं ली बिंगै अनुसार कोनी करै।
7 मैं ईंखातर केऊं क्यूंकै थे तो आप ई जाणो हो कै थे म्हारी तरियां चालणो चईयै क्यूंकै थारै बिचाळै रेगे म्हे बी आळसी कोनी बणया।
8 म्हे किंगैई कनूं अठै मुफ्त में रोटी कोनी खाई पण म्हे ओखो काम दिन-रात करता रेया कै थारै किंगैई उपर भार ना बणा।
9 म्हानै थारी मदद लेण गो अधिकार कोनी हो इसी बात कोनी है, पण म्हे थारै सामणै एक नमुनो राखणो चावां झिकै ऊं थे समझ सको।
10 ईंखातर म्हे जद थारै सागै हा म्हे थानै आ आग्या दी जे कोई काम ना करणो चावै तो बो रोटी बी ना खावै।
11 अब म्हारै सुणण में आयो है कै थारै मूं केई लोग आळसियां गो जीवन बितावै है। बे आप ई काम कोनी करै अर दूसरा गै काम में बी टांग अड़ावै है।
12 म्हे हिस्यै लोगां नै प्रभु यीसू मसी गै अधिकार ऊं आ आग्या देवां अर बानै बिनती करां कै बे चुपचाप काम करता रेवै अर आपगी कमाई गी रोटी खावै।
13 पण भाईयो अर भेनों थे भलाई करता हिम्मत ना हारियो।
14 जे कोई ईं खत में बताएड़ी म्हारी बातां नै ना मानै तो बा पर ध्यान राखियो अर बां कानी ऊं रिस्तो तोड़ लेईयो झिकै ऊं बो आपगै चाल चलण ऊं सर्मिंदो हो'ज्य।
15 फेर बी थे बिंगै सागै दुसमण बरगो बरताव ना करियो पण बिनै भाई भेन गी तरियां समझा दैयो।
आखरी निमस्कार
16 सांती गो प्रभु यीसू मसी आप थानै हर टेम अर हर तरियां गी सांती देंवंतो रेवै। प्रभु यीसू मसी थारै सारां सागै होवै।