जीवन झिको परमेसर नै खुस करै
4
1 हे भाईयो अर भेनों यीसू मसी गै नाम पर मैं थारै ऊं पराथना अर निवेदन करूं कै थे ईं बात गो उपदेस म्हानै दियो हो कै परमेसर नै खुस करण खातर किंया चालणो चईयै। बिंया ई चालणो चईयै जिंया थे अब चालण लागरया हो अर आ'गे बढता जाओ।
2 क्यूंकै थे जाणो कै प्रभु यीसू गै अधिकार ऊं म्हे थानै आग्या दी है।
3 अर परमेसर गी आ'ईं इच्छा है कै थे पवितर हो जाओ अर बेबीचार ऊं दूर रेईयो।
4 थारै ऊं हर एक जणो अपणै आपनै वस में राखण आळो होवै अर आपगै सरीर नै पवितर अर आदर गै लाइक बणागे राखो अर बिंगो आदर करो।
5 अर परमेसर नै ना जानण आळा आदमियां गी तरियां सरीर गी लाळसा नै पूरी करण खातर बिनै इसतेमाल ना करो।
6 ईंखातर ईं बारै में कोई आपणै बिस्वासी भाई गै सागै कोई पाप ना करै अर कोई बी गळत लाभ ना उठावै क्यूंकै हिस्यै सारै पापां गै खातर प्रभु सजा देवैगो। झिको म्हे थानै बता दियो है अर चितायो बी है।
7 क्यूंकै परमेसर आपां नै असुद्ध होण खातर कोनी पण पवितर होण खातर बुलाया है।
8 ईंखातर झिको ईं उपदेस नै कोनी मानै बि माणस नै कोनी पण परमेसर नै कोनी मानै है झिको थानै आपगी पवितर आत्मा देवै है।
9 अब थारै भाई भेनां गै प्रेम गै बारै में बी लिख्यो जावै पण इंगी थानै जरूरत कोनी है क्यूंकै परमेसर आप ई थानै एक दूसरै गै सागै प्रेम करण गो उपदेस दियो है।
10 अर सारै मकिदुनिया गै सगळा बिस्वासी भाई भेनां गै सागै प्रेम करो, पण हे भाईयो अर भेनों म्हे थानै समझावां कै ओर प्रेम में बढता जाओ।
11 अर जिसी म्हे आग्या दी है बिंया ईं पूरी कोसिस गै सागै सांती ऊं रेवो अर आप आपगो काम करणो अर आप आपगै हात ऊं कमाण गी कोसिस करता रेवो।
12 ईं तरियां गो चाल चलण करण ऊं बिस्वासी मण्डली ऊं बारआळा लोग थारो आदर करेगा अर थानै कोई बी बात गी कमी कोनी होवैगी।
यीसू गो दुबारै आणो
13 हे भाईयो अर भेनों, म्हे चावां कै यीसू मसी में बिस्वास करण आळा झिका अब ईं दुनिया में कोनी है बांगै बारे में थानै पूरी तरियां गी जाणकारी होवै। कठै इंया ना होवै कै थे बी यीसू मसी पर बिस्वास कोनी करण आळा लोगां गी तरियां दुख मनाओ झिका नै कोई आस कोनी।
14 क्यूंकै जे म्हे बिस्वास करां कै यीसू मर ग्यो अर बो फेर जींवतो हो'ग्यो तो बि तरियां ई झिका बि पर बिस्वास करण आळा मरग्या झिका नै बी परमेसर जींवता करेगो अर यीसू गै सागै ले जावैगो।
15 क्यूंकै म्हे प्रभु गै बचन गै अनुसार थारै ऊं ओ केवां कै प्रभु यीसू गै दुबारै आण गै टेम यीसू में मरेड़ा है झिका बिस्वासी लोग जींवता है बांऊं पेलां यीसू ऊं मिलेगा।
16 क्यूंकै प्रभु यीसू जोर ऊं ललकारता अर प्रधान सुरगदूत अर परमेसर गी तुरी गी आवाज गै सागै जद सुरग ऊं उतरैगो झिका प्रभु पर बिस्वास करता मरग्या बे पेलां जींवता होवैगा।
17 इंगै बाद में आपां बिस्वासी झिका जींवता होवांगा अर बचेड़ा होवांगा, परमेसर बां लोगां गै सागै आकास में ले जावैगो अर प्रभु यीसू ऊं मिलांगा अर ईं तरियां आपां सदां ई प्रभु यीसू गै सागै रेवांगा
18 ईंखातर आं बातां गै सागै एक दूसरै नै तरो ताजा करता रेवो।