कुलुसी सैहर गै मसी लोगा गै नाम
यीसू मसी गै खास चेलै पौलुस गो खत
ईं खत गै बारै में
ओ खत एसिया इलाके गै कुलुस नाम गै नगर गी बिस्वासी मण्डली नै लिख्यो। इफिसुस ऊं 160 किलोमीटर पूरब प्रांत में आसिया गै फुगिया गो सैहर हो कुलिसिया। ईं बिस्वासी मण्डली गी स्थापना पौलुस कोनी करी ही। पौलुस नै पतो लागग्यो कै कुलुस गी बिस्वासी मण्डली में कीं गलत सिक्सा देण आळा लोग है। झिका ईं बात पर जोर देगे सिखावंता हा कै परमेसर नै जानण खातर अर पूर्ण मुकती लेण खातर हर एक आदमी नै खास आध्यातिमक ग्यान अर अधिकारिया गी आराधना करणी हो'सी अर इंगै सागै खतनो बी करणो अर कीं खास धरम विधियां करणी जरूरी है।
कुलुस गी बिस्वासी मण्डली में गलत सिक्सा ग्यानवाद नाम ऊं जाणी जावै ही। परमेसर आच्छो है, यीसू परमेसर गै अनेक रूपा मूं एक है अर बिंगी जिग्या परमेसर ऊं निची है अर मुकती खातर पवितर बचन ऊं बढगे ओर एक लुकेड़ै ग्यान गी जरूरत है। आ सारी सिक्सा ग्यानवादी लोग देवै है। ऐ सारी बातां इपफ्रोस रोम जा'गे पौलुस नै बतायी। ईं कारण पौलुस ओ खत लिखगै उनेसिमुस अर फिलेमोन गै कनै जाण आळै तिखिकुस गै सागै घाल्यो।
ओ खत पौलुस ईस्वी सन् 60-61 में लिखिज्यो है। ओ खत पवितर बचन गी खास सिक्सा गो खत है।
रूप रेखा
पौलुस गी ओर ऊं निमस्कार 1:1-2
पौलुस गो धन्यवाद अर पराथना 1:3-14
मसी गो म्हत्व 1:15-23
पौलुस गो मसी सेवा 1:24; 2:5
मसी में बणया रेओ 2:6-23
मसी में नुओ जीवन 3:1–4:6
आखरी निरदेस 4:7-18