कुलुसी सैहर गै मसी लोगा गै नाम
यीसू मसी गै खास चेलै पौलुस गो खत
पौलुस गी ओर ऊं निमस्कार
1
1 मैं पौलुस, परमेसर गी इच्छा ऊं यीसू मसी गो खास चेलो बणेड़ो हूं अर आपणै भाई तीमुथियुस गी ओर ऊं।
2 कुलुसी सैहर में रेण आळा परमेसर खातर न्यारा करेड़ा मसी बिस्वासी भाईयां अर भेनां नै ओ खत लिखू हूं। आपणै पिता परमेसर गी ओर ऊं थानै किरपा अर सांती मिलै।
पौलुस गो धन्यवाद अर पराथना
3 जद म्हे थारै खातर पराथना करां हा तो, सदा ई प्रभु यीसू मसी गै पिता परमेसर गो धन्यवाद करां हा।
4 क्यूंकै यीसू मसी में थारो सारा गो बिस्वास अर परमेसर गा लोगां खातर थारो प्रेम ऐ सारी बाताें म्हे सुणी है।
5 ऐ सारी बात इयां होयी कै झिकी आस थारै खातर सुरग में पक्की है अर इंगै बारे में थे पेला ई यीसू मसी गो सच्चो सुब समाचार सुणयो है।
6 अर थारै जीवन में काम करयो बो ई सुब समाचार सारै संसार में पोंचागे जिंया फळ ल्यावै है बियां फळ थारै ऊं मिल्यो जद थे परमेसर गी किरपा गै बारे में सुणयो हो अर बिंगै बारे में समझयो हो।
7 परमेसर गै सुब समाचार गी सिक्सा गै बारे में थे म्हारै प्यारै दास इपफ्रास ऊं सुण्यो अर झिको म्हारै खातर मसी गो बिस्वासी सेवक है।
8 पवितर आत्मा गै द्वारा दूसरा गै बिचाळै थारै प्रेम गै बारे में बण ई म्हानै बतायो।
9 ईंखातर जद थारै बारे में म्हे सुण्यो तो थारै खातर पराथना अर बिनती करणी कोनी छोड़ी। म्हे हर रोज पराथना करी कै परमेसर थानै सारी बाता झिकी बांगी इच्छा है बो करण गी मदद करै अर थे पवितर आत्मा गै द्वारा मिलण आळी समझ अर ग्यान ऊं भरिज्यो।
10 कै थारो रेणो सेणो प्रभु नै आच्छो लागतो रेवै अर बो सारा कामां में खुस होवै। अर थारै पर हर तरियां गा आच्छै कामां गा फळ ल्यागे अर थारै कामा गै द्वारा थे परमेसर नै ओर बडिया तरियां समझ सको।
11 म्हे पराथना करा कै परमेसर थानै आपगी बोळी मेमा गै सागै मजबूत कर'गे थानै खुसी ऊं धीरज अर सहनसकती दिखाण में मदद करै।
12 पिता परमेसर गो धन्यवाद करणो चईयै क्यूंकै बा थानै बां लोगां झिका जोती में रेवै है बा लोगा गै सागै वारिस होण खातर चुणया है।
13 परमेसर आपां नै सैतान गै अंधकार ऊं छुड़ागे आपगै प्रिय बेटो गै राज में ले गयो।
14 बि बेटै गै ई द्वारा आपां नै पापा गी सजा ऊं मुकती मिली, इंगो मतलब आपणै पापां गी माफी मिली।
मसी गो म्हत्व
15 मसी ना दिखण आळै परमेसर गो रूप है अर बो सारी सरसटी बणण ऊं पेलो है अर सारा गै उपर है।
16 क्यूंकै बिंगै द्वारा ई सारो कीं बणाएड़ो है, झिको कीं सुरग में है अर धरती पर, देखण आळी चिजां अर झिकी चिजां नै देख कोनी सका, चावै सुरगदूत अर सारी चिजां पर सासन करण आळी बुरी आत्मावा सारो कीं बिंगै द्वारा अर बि खातर ईं बणाएड़ो है।
17 सारो कीं बणावण ऊं पेला ई बो हो अर सारी चिजां बिमै ई टिकेड़ी है।
18 बो ई सरीर मतलब बिस्वासी मण्डली गो सिर है। बो ईं आदी है अर मरेड़ा ऊं जी उठण आळो पेलो है। ईंखातर सारी चिजां में पेली जिग्यां बिंगी है।
19 परमेसर इंया चायो है कै बो आप संपूरण रूप में मसी में वास करै
20 परमेसर मसी नै ईं संसार में घाल्यो झिको करूस पर बलिदान हो'ग्यो। ईं बलिदान गै द्वारा संसार गी सारी चिजां गो मेळ परमेसर सागै हो'ग्यो। परमेसर झिकी चिजां सुरग में है अर धरती पर है सारा नै सांती दी।
21 एक टेम हो जद थे लोग परमेसर नै कोनी जाणै हा क्यूंकै थे लोग मन में बुरी इच्छा राखगे बांगै बिरोध में हा।
22 पण मसी एक माणस गै रूप में धरती पर आ'गे बलिदान होयो। ईंखातर परमेसर थारो मेल करायो कै थे परमेसर गै सामे पवितर, बिना दोस अर थारै में एक बी गलती ना होगे थानै पेस कर सकै।
23 पण थानै यीसू मसी पर बिस्वास राखगे जीणो चईयै। थारो सूणेड़ो सुब समाचार अर बि सुब समाचार में झिको वायदो परमेसर थानै दियो है बिमै ध्यान कर'गे जीणो चईयै अर कदी बी बिऊं न्यारा नई होणो चईयै। ईं सुब समाचार नै सारै संसार में सुणायो हो अर ईं सुब समाचार गै द्वारा मैं पौलुस परमेसर गो दास बण गयो।
पौलुस गी मसी सेवा
24 मैं झिका दुख खुसी गै सागै थारै खातर झेलूं हूं अर बिस्वासी मण्डली झिको मसी गी देह है, बांगी खातर झिकी परेसानी में कीं कमी रेगी बा मेरै सरीर में पूरी करूं।
25 परमेसर आपगी बातां थानै बताण खातर मनै बिस्वासी मण्डली गो एक दास बणायो अर पूरी जुमेबारी दी।
26 आ बात भोत साला ऊं अर पीढी पीढी ऊं लुकेड़ी ही अर अब परमेसर बा बाता नै आपगै चुणेड़ा लोगां खातर खोल दी।
27 परमेसर गेर यहुदियां नै आपगी लुकेड़ी सच्ची म्हान बाता दिखाणी चायी। अर बे आ है कै मसी थारै में है मतलब थे परमेसर गी मेमा गा भगिदार बण जावोगा।