कुलुसी 2

1 हे भाईयो अर भेनो, मैं थानै बताणो चावूं कै थारै खातर अर लौदिकिया में रेण आळा लोगां खातर अर झिका नै मैं दिख्यो कोनी हो बा सारा खातर मैं किती मेनत करूं हूं। 2 मैं बोळि मेनत करूं कै, बा लोगां गो प्रेम आपसरी में बदतो जावै अर मन में सांती मिलै अर परमेसर गी लुकेड़ी बाता नै पूरी तरियां समझ सकै क्यूंकै बे बाता मसी ई है। 3 बिमै ग्यान अर बुद्धी गो सारो भंडार लुकेड़ो है। 4 मैं ऐ सारी बातां ईंखातर बताऊं कै दुसर लोग थानै मीठी मीठी बातां में वाद विवाद कर'गे धोखा ना दय। 5 मैं थारै ऊं भोत दूर हूं पण आत्मिक रूप ऊं थारै भोत नेडै़ हूं। मैं ईं बात ऊं खुस हूं कै थे लोग यीसू मसी गै उपर भरोसो राखगे भोत आच्छो जीवन जीवो हो।

मसी में बण्या रेओ

6 अब थे यीसू मसी पर बिस्वास करयो अर बिनै प्रभु कर'गे समझ लिओ ईंखातर बिंगी आग्या गो पालण कर'गे चालता रेओ। 7 जिंया एक दरखत जड़ पकड़े है बिंया ई थे यीसू मसी पर बोळो भरोसो राखगे मजबूत हो जाओ। जियां थानै सिखाया बिंया थे बिस्वास में बदता जाओ। अर भरपूरी ऊं बिंगो धन्यवाद बी करो।

8 कोई बी आपगै ग्यान ऊं परमेसर गै बारे में थानै सिखावै तो बि बात पर ध्यान ना देईयो अर चेतो कर'गे रेईओ क्यूंकै बि ग्यान में कीं खास बात कोनी अर धोखो देण आळो है। ऐ बाता माणस ऊं आवै है अर ईं संसार नै चलाणाळी बुरी ताकतवर सकती ऊं आवै है पण मसी ऊं कोनी आवै है। 9 क्यूंकै परमेसर गो सभाव अर सारी ताकत मसी में पूरी तरियां वास करै। 10 ईं संसार गो सारो राज अर सारो अधिकार बिंगै कनै है। ईंखातर थे बिंगै सागै पूरी तरियां भागिदार हो जाओ।

11 क्यूंकै थे लोग मसी में आया हो अर बिऊं थे लोग खतनो करयो है। ओ खतनो माणस गै हात ऊं कोनी होयो पण मसी आप ई करयो है। बण थानै पाप गी गुलामी ऊं छुड़ागे खतनो करयो है। 12 जद थे बतिस्मो लियो बि टेम थे बी यीसू मसी जिसै गाडै दियो अर बि बरगो फेर बी जी उठगे एक नुओ जीवन लिओ क्यूंकै थे परमेसर गो मोटो ताकत पर भरोसो राख्यो झिको यीसू मसी नै मरण ऊं दुसर जींवतो कियो।

13 पेला थे गेर यहुदी लोग आपगै पाप गै कारण आत्मिक रूप में मरेड़ा हा अर थानै परमेसर गो नेम बी कोनी दियो गेयो हो। पण मसी द्वारा थानै जीवन दियो अर थारै हर एक बुराई अर पाप नै माफ करयो। 14 परमेसर आपणा सारा पाप झिका मूसा गै नेम विधान गो पालण ना करण ऊं आया हा बां सारी विधियां नै मिटा दी अर बिनै बि कीलां ऊं करूस पर जड़गे मिटा दियो है। 15 यीसू मसी सारै अंधकार गी ताकत अर सासक गी सकतियां नै खत्म कर'गे अर करूस गै द्वारा बानै हरागे बांगै उपर जयकार कर'गे सारै सासका झिका बां पर सासन करै बा लोगा पर पूरी तरियां सरमसार कर दियो।

16 ईंखातर हे मेरै भाईयो अर भेनों, कोई बी थारै मूं खाण पीण गै बारे में, अर त्यूंहार गै बारे में अर नुअ चांद गै बारे में अर पवितर दिनां गै बारे में फैसलो ना करै। 17 इंगै बारै में होएड़ा सारा यहुदी नेम विधान आण आळै दिन गो जिंया है। पण आखर बात मसी में ई मिलै है। 18 परमेसर ऊं मिलण आळा वायदा ऊं कोई बी थानै झूठी सिक्सा देगे न्यारो ना कर दय क्यूंकै बे लोग इंया बोलै है म्हानै ग्यान है अर भविस्य गै बारे में बोल सकै अर बिंया बी बोलै थे नम्र होगे दूता नै आराधना कोनी करो तो परमेसर थानै स्वीकार कोनी करसी। बां लोगा गी बात में कोई मतलब कोनी क्यूंकै बे लोग संसार गी सोच गै अनुसार मूरख बाता बतावै है अर अपणै आप घमण्ड करै है। 19 बे लोग झिका बात यीसू मसी झिको आपणै सिर जिसो है बिमुं आएड़ो बाता नै कोनी मान्यो। आपां झिका यीसू मसी पर बिस्वास करयो है बा सारा यीसू मसी गै सरीर जिसो है। जिंया सिर सरीर नै संभाळै है अर सरीर गी नसा अर जोड़ा गै सागै संबन्ध है बिंया ई यीसू मसी आपां नै परमेसर गै इच्छा गै अनुसार ओर मजबूत करै है।

20 थे मसी गै सागै थारै पुराणै जीवन गो तरिको खत्म कर दियो, ईंखातर संसार नै चालाणाळी बुरी ताकत गो थारै पर कीं अधिकार कोनी। फेर ईं संसार गै अबिस्वासी लोगा गै तरियां थे क्यूं बांगै अधीन में रेवो हो? 21 थे ईं संसार गै ई नेम गो क्यूं पालण करो हो, “आ चिजां गै उपर हात ना लगाओ, इनै चाखो ना अर इनै छूओ ना।” 22 ऐ सारी बाता नास होण आळी है। अर ऐ बाता माणस गा बणायेड़ा नेम अर सिक्सा है। 23 ऐ सारी बाता बोळै ग्यान गो दिखावो है। ऐ सारी बाता ऐ है कै दूता नै आराधना करणी, अर झूठी नम्रता, अर सरीर गो दणड करण ऊं आवै है, पण सारीरिक लालसा नै रोकण गी कोई बी मदद कोनी।