मसी गै बिस्वास गै द्वारा नुओ जीवन
3
1 जे थानै मसी पर बिस्वास करण ऊं परमेसर एक नुओ जीवन दियो है तो थे झिकी चिजां सुरग में है बानै ढूंढता रेवो। बि जिग्या मसी अब है अर परमेसर गै दाई ओर बैठयो है।
2 सदा ई झिको सुरग पर है बां बातां नै याद करता रेवो पण झिको धरती में है बा पर ध्यान ना देओ।
3 क्यूंकै थारो बुरो सभाव मर ग्यो अर अब थानै यीसू मसी गै सागै परमेसर गै सामै एक नुओ जीवन मिल्यो है अर थारै जीवन नै दुसर लोग समझ कोनी सकै।
4 मसी झिको आपणो जीवन है बिंगै दुसर आण गै टेम थे बी बिंगै सागै आदर ऊं परगट करिजोगा।
5 ईंखातर बेबीचार, मन गो खोटो, बुरी इच्छावां, सरीर गी लालसा, संसार गी सारी लालसा झिको मूरती पूजा गै बराबर है बानै पूरी तरियां छोड़दयो।
6 आ सारी बातां गै द्वारा परमेसर गी सजा झिका लोग बानै कोनी मानै बा पर आवै है।
7 परमेसर पर आपगो जीवन समरपित करण ऊं पेला थे बी आ सारी बाता गै लारै चाला हा।
8 अब थे रीस, बिरोध, घबराणो, चुगली करणी, गलत बात बोलण गी आदत आ सारी बातां नै छोडणी है।
9 दूसरा गै सागै झूठ ना बोलो क्यूंकै थे सारी बुरी इच्छावा अर सारी चिजां झिकी पेला करता हा बानै सारा नै छोड़ दी है।
10 परमेसर थानै अब एक नुओ जिसो बणाण लागरयो है ईंखातर आपणो परमेसर कितो म्हान है ओ समझ सकां अर बांगै बारे में ओर बोळो जाण सकां।
11 बिमै यहुदी अर गेर यहुदी अर खतनो करण आळो अर बिना खतनो करण आळो, पढेडो अर अणपढ, गुलाम अर आजाद आमै कोई फरक कोनी। मसी सारो कीं अर सारा में है।
बिस्वासिया गो चाल चलन
12 थे लोग परमेसर गै चुणेड़ा पवितर अर प्यारा लोग हो। ईंखातर थे दया, सेहन सकती, दीनता, कोमलता अर धीरज नै धारण करो।
13 अर जे कोई किनै ई कीं पर ई दोस लगाण गो कोई कारण होवै तो बिनै सेन कर ल्यो अर जे कोई थारै सागै लड़ाई करै तो बिनै माफ करणो चईयै अर थे एक दूसरै नै इंया माफ करो जिंया प्रभु थानै माफ करया।
14 सारा ऊं मोटी बात प्रेम है। ओ प्रेम सारा नै एक सागै रेण में मदद करै है।
15 मसी ऊं मिलण आळी सांती ऊं थे थारै मन नै संभालो। ईंखातर थे बिमै एक ई सरीर में बुलाएड़ा हो। सदा ई धन्यवाद करता रेओ।
16 सदा ई धन्यवाद गै सागै भजन अर स्तुति अर आत्मिक गीत गाओ अर एक दूसरै नै सिखाओ। मसी गो बचन थारै मां बोळो रेण दयो।
17 अर बचन ऊं या काम ऊं झिको कीं थे करो हो बो सारो कीं प्रभु यीसू गै नाम ऊं करो। बिंगै द्वारा पिता परमेसर नै धन्यवाद देवंता रेओ।
परिवार में जीवन बिताण गी सलाह
18 हे लुगाईयो, थारै घर आळै गै सागै दीनता ऊं रेओ। इंया कर'गे थे प्रभु गी बातां नै पूरी करो।
19 हे आदमियों, थारै घर आळीया गै सागै प्रेम ऊं रेओ। बांनै कदैई तंग ना करो।
20 हे टाबरों, सारी बातां में आपगै मां बाप गी आग्या गो पालण करो क्यूंकै इंगै द्वारा प्रभु खुस होज्य'गो।
21 हे पिताओं, आपगै टाबरा नै तंग ना करो। जे थे इंया करोगा तो बे निरासा हो'ज्यगा।
22 हे गुलामी में रेणाळा लोगों, आपगै मालिका नै झिका संसार में है बांगी सारी बाता नै मानो। बा लोगा नै खुस कोनी करण पण सच्चै मन ऊं बानै मानो इंया करो तो थे प्रभु नै आदर देवो हो।
23 झिको कीं थे करो बो तन मन ऊं करो। ओ सारो प्रभु खातर करणो चईयै। झिका काम करो हो बे संसार गै लोगा खातर कोनी।
24 क्यूंकै थे जाणो है कै थानै इंगै बदले प्रभु वारिस बणावेगो अर प्रभु मसी गी सेवा करता रेओ।
25 मसी किंगी पक्सपात कोनी करै। पण बुरो करण आळा नै सजा जरूर देवैगो जिसी बानै मिलणी चईयै।