4
1 हे मालिकों, थे आपगै गुलाम लोगा सागै आच्छो बरताव करो। आ बात थानै याद राखणी है कै सुरग में एक मालिक थारै खातर है।
पौलुस गी मसी लोगां खातर सलाह
2 सदा ई पराथना में रेओ अर सदा परमेसर गो धन्यवाद करता रेओ।
3 म्हारै खातर बी पराथना करो कै परमेसर म्हारै खातर बचन सुणाण खातर एक बारनो खोल दे कै म्हे मसी गी बे लुकेड़ी बातां बोल सका बि कारण मैं केद हो'ग्यो।
4 मेरै खातर पराथना करो कै मैं साफ साफ दूसरा नै परमेसर गी बात नै बोल सकूं।
5 हे भाईयो अर भेनो, जद थे अबिस्वासी लोगा सागै हो बि टेम बांगै सागै आच्छो बरताव करो कै बे लोग यीसू मसी पर बिस्वास कर सकै।
6 थारी बात सदा ई मीठी होज्यै कै दूसरा गै सवाल गो किंया उतर देणो बो ई थानै आ'ज्यै।
पौलुस गो आखरी निरदेस
7 मेरो इमानदार साथी अर प्रभु में मेरै सागै काम करण आळो तुखिकुस मेरै बारै में सारो कीं थानै बतासी।
8 मैं बिनै ईंखातर थारै कनै घालूं कै बो म्हारै बारे में थानै बतावै अर थानै ओर होसलो देवै।
9 मैं बिंगै सागै उनेसिमुस झिको बिस्वास योग्य अर प्यारो भाई है बिनै बी भेजूं झिको थारै मूं एक है। अठै के हो'ग्यो ऐ सारी बात बे थानै बतासी।
10-11 अरिस्तरखुस गो झिको जेळ में मेरै सागै रेवै हो अर बरनाबास गै रिस्तेदार मरकुस गो बी थानै निमस्कार केवै (मरकुस थानै कीं सिक्सा पेला दियो हो, जे बो थारै कनै आयो हो, बिनै आदर मान करो)। यीसू अर बिंगो नाम युसतुस बी केवै है, बो बी थानै निमस्कार केवै है। यहुदी लोगा ऊं बे ई परमेसर गै राज में मेरै साथी अर बे लोग मेरी सांती गै कारण हो'ग्यो।
12 इपफ्रास बी थानै निमस्कार पुगायो। बो थारै मूं एक है। अर बो मसी गी सेवा करै है। बो थारै खातर सदा ई मन लगागे पराथना करतो रेवै है कै थे आत्मिक रूप में भोत आ'गे बध जावो अर परमेसर गी आग्या नै मानण आळा बी हो जाओ।
13 बो थारै खातर अर लौदिकिया अर हियरापुलिस में रेण आळा खातर सदा भोत मेहनत करण लागरयो है। मैं इंगो गवाह हूं।
14 म्हारै प्यारै मित्र बेद लूका अर देमास बी थानै निमस्कार भेजे है।
15 लौदिकिया में रेण आळा भाईयो अर भेनों अर नमुफास अर बिंगै घर में रेण आळा सारी बिस्वासी मण्डली गै लोगां नै बी निमस्कार केवो।
16 थे पेला ओ खत पढण गै बाद में लौदिकिया गी बिस्वासी मण्डली नै पढगे सुणाओ अर लौदिकियां ऊं मेरै खातर मिलण आळो खत थे बी पढणो चावै।
17 झिको काम प्रभु भाई अरखिपुस नै दियो है बो करण खातर बिनै याद करणो है।
18 मैं पौलुस ओ खत लिखण लागरयो हूं। मैं अब बी जेळ में हूं। आ बात थानै याद राखणी जरूरी है। परमेसर गी किरपा थारै सागै सदा रेवै। आमीन।