फिलिप्पी 4

मसी जीवन खातर आच्छी बात

1 हे मेरो प्यारा भाईयो अर भेनो मैं थानै मिलण गी इच्छा राखूं। थे लोग मनै खुसी दी अर मेरै काम गो फळ बी है। ईंखातर थे लोग प्रभु में बोळै बिस्वास गै सागै रेवो।

2 मैं यहुदी अर संतुखे भेनों थानै बिनती करूं कै थे दोनूं आपसरी में फालतू बातां ना करो अर प्रभु में एक जिसा सोच बिचार राखो। 3 मेरा आच्छा बेली तनै बी मेरी बिनती है कै तू आ दोना भेना गी मदद कर। ऐ दोनूं भेना मेरै सागै यीसू मसी गै सुब समाचार बोलण में मदद करी अर आ दोना मेरो बेली क्लेमेस अर दूसरै बेली गै सागै काम करयो अर आ लोगां गो नाम अनन्त जीवन गी किताब में लिख्यो है।

4 प्रभु थारै पर करेड़ी सारी बातां नै याद कर'गे थे सदा खुसी में रेवो। अर मैं फेर बी थानै केऊं कै थे खुसी में रेओ। 5 थारी सेहन सकती सारै मिनखां पर बणी रेवै। प्रभु बेगो आण आळो है। 6 थे कोई बी बात गी चिंता ना करियो पण हर टेम थारी बात पराथना अर बिनती गै द्वारा धन्यवाद गै सागै परमेसर नै बोलणी चईयै। 7 जद परमेसर थारै जीवन में सांती जरूर देसी झिकी नै कोई बी समझ कोनी सकै। आ सांती थारै मन अर सोच नै यीसू मसी में संभाळगे राखेगी।

8 आखिर में, हे मेरै भाईयो अर भेनों, बा बातां पर ध्यान करियो झिकी सच्च है, झिकी बात आदर गै लायक है, झिको काम परमेसर नै आच्छो लागै है, झिको काम बिना पाप गो है, झिको खुसी गै योग्य है अर आच्छो गुण अर प्रसंसा गै काबिल है। 9 झिकी बातां थे मेरूं सुणी, देखी ही अर सीखी ही बा पर ध्यान लगागे करता रेओ जद सांती देण आळो परमेसर थारै सागै रेसी।

दान खातर धन्यवाद

10 थे मेरै बारै में पेला ई सोचयो हो, पण अब थानै मेरै बारै में याद करण नै अर मदद करण में मोको मिल्यो है। ईं बात में मैं प्रभु में भोत खुस हूं। 11 मनै कोई बी चीज गी जरूरत है इंगै बारै में मैं थानै बतायो कोनी। मैं हरेक हालात में रेणो सीख्यो है। 12 मेरी कमी गै टेम अर बोळै गै टेम किंया रेणो मनै जरूर पतो है। जद पेट भरयो अर भूखो हो, अर छोटो अर मोटो, कोई बी टेम किंया रेणो ओ बी मनै सिखाएड़ो है। 13 यीसू मसी झिकै मनै ताकत दी है बिंगै द्वारा कोई बी हालात गो सामणो कर सकूं।

14 पण थे मेरै दुख अर परेसानी गै टेम मेरी मदद करी आ बात मनै भोत आच्छी लागी। 15 हे फिलिपियो गा बिस्वासी भाईयो अर भेनों, यीसू मसी गै सुब समाचार सुणाण गै सरू गै टेम जद मैं मकिदुनिया छोड्यो हो, तो लेण देण में थारी बिस्वासी मण्डली नै छोड़गे ओर कोई बी मनै मदद कोनी करी। 16 ईं तरियां जद मैं थिस्सलुनिकि में हो, बि टेम बी थे लोग मनै भोत बार मदद करी। 17 मैं थारै ऊं ओर कीं दान लेण खातर ऐ बातां कोनी बोल्यो पण मनै देण ऊं थानै परमेसर बोळो फल देवै। 18 मेरै कनै सारो कीं है अर भोत है। थे इपफ्रदितुस गै हात ऊं झिको इनाम मनै भेज्यो ओ मेरी जरूरतां ऊं भोत बोळो हो अर झिको एक आच्छी खुसबु गै रूप में परमेसर नै संतुस्ट करण गै काबिल है। 19 मेरो परमेसर थारी सारी जरूरतां नै यीसू मसी में आपगै बोळै धन ऊं पूरी करसी। 20 आपणै पिता परमेसर गी सदा तांई मेमा होवंती रेवै। आमीन।

पौलुस गो आखरी निरदेस

21 मैं यीसू मसी गै एक एक पवितर लोगां नै निमस्कार देऊं। मेरै कनै झिका भाई है, थानै निमस्कार देवै है। 22 अठै रेण आळा ओर सारा बिस्वासी भाई भेन थानै निमस्कार केवै है। खास कर'गे कैसर परिवार गै लोग बी निमस्कार केवै है।

23 प्रभु यीसू मसी गी किरपा थारै सारा पर होवंती रेवै। आमीन।