फिलिप्पी 3

साची धारमिकता

1 हे मेरा भाईयो अर भेनों, प्रभु थारै पर करेड़ी सारी बातां नै याद कर'गे खुसी में रेवो। मैं पेला लिखेड़ी बात एकर फेर लिखूं क्यूंकै आ बात लिखण में मनै कोई दिकत कोनी अर आ बात थारै भलाई खातर है।

2 बुरा काम करण आळा ऊं थे दूर रेओ। मैं बि लोगां नै कुत्ते बरगो समझयो क्यूंकै बा लोगां इंया सिक्सा देवै है कै खतना गै द्वारा ई मुकती मिलै है। 3 सच्चो खतनो करण आळा आपां हा। परमेसर गी आत्मा गै द्वारा आपां बानै आराधना करा अर आपणो यकीन यीसू मसी पर ई है। आपां करेड़ी बाता नै याद कर'गे घमण्ड करण गी कोई जरूरत कोनी है। 4 मैं मेरै काम पर पूरो भरोसो राख सकूं। जे किन्ही ओर नै आपणो काम पर भरोसो राखै है तो मैं बिऊं बोळो राखूं। 5 क्यूंकै ईं बात नै ध्यान ऊं सुणल्यो, जद मैं आठ दिन गो हो, मेरो खतनो हो गयो। मैं एक पक्को यहुदी हूं झिको इसराएल गी खानदान गो हूं। मैं बिन्यामीन जात गो हूं, मैं इब्रानी मां बाप ऊं पैदो होएड़ो हूं। अर मैं एक फरीसी हूं झिको मूसा गै नेम विधान नै भोत भोत आच्छी तरियां मानण आळो हूं। 6 मनै परमेसर सागै इतो लगाव है। इंगै कारण मैं बिस्वासी मण्डली गा लोगां नै तंग करण आळो हो अर यहुदी नेम विधान गै अनुसार मैं परमेसर गै नजर में भोत आच्छो आदमी हो। इमें मनै कोई बी दोसी कोनी बणा सकै।

7 पण मसी खातर सारो कीं मनै फायदो हो बा सारा नै मैं बिना मतलब सोचगे छोड़ दियो। 8 इतो ई कोनी आज तांई सारी बात आच्छी सोची बा सारा नै मैं आपगै प्रभु यीसू मसी गै ग्यान गी बडोतरी गै कारण त्याग कर दियो। बिंगै खातर मैं सारी चिजां नै कचरो समझ गै छोड़ दियो अर इंगै द्वारा मसी नै पा सकूं। 9 जिऊं बिनै पा सकूं, यहुदी नेम विधान गै आधार पर मिलण आळा धारमिकता गै कारण कोनी पण झिकी धारमिकता यीसू मसी गै उपर भरोसो राख तांई मिलण आळी ऊं है। 10 मैं यीसू मसी नै जानणो चाऊं अर जी उठण गी मसी गी ताकत नै बी जानणो चाऊं। जिंया बो मरयो बिंया ई मैं बी मरणो चाऊं। 11 क्यूंकै मैं कोई बी तरिकै ऊं आस राखूं कै परमेसर मनै बी मरण गै बाद जी उठण तांई लेगे जावै।

बिस्वास में पक्को रेणो

12 मेरै केण गो मतलब ओ कोनी, मनै पेला ई सारो कीं मिलग्यो अर पूरी तरियां ऊं सिद्ध हो'ग्यो। मैं पक्को होण खातर अजे तांई कोसिस करण लागरयो हूं झिकै खातर यीसू मसी मनै पकडयो हो। 13 हे भाईयो अर भेनो, मैं ओ कोनी सोच्यो कै मैं बिनै पकड़ लियो। पण मैं लारै गी सारी बाता नै भूलगे आ'गे गी बातां पर नजर लगागे आ'गे बदण लागरयो हूं। 14 मैं सुरग तांई पूगण खातर भोत कोसिस करतो रेऊं कै मैं आपगो इनाम ले ल्यूं झिकै नै यीसू मसी में पाण खातर परमेसर मनै बुलायो है।

15 झिका लोग अपणै आपनै आत्मिक रूप में पक्का समझै बे सारा इंया गी सोच राखै। पण कोई बी आदमी नै दूसरो सोच बिचार है तो बो परमेसर सई करसी। 16 ईंखातर आपां झिकी सच्ची आग्या तांई पोंचा बि पर चालता रेवा।

17 हे भाईयो अर भेनो, दूसरा गै सागै मिलगे मेरै बरगी चाल चालो अर बांगी पिछाण करो झिका ईं रीति ऊं चालै है बांगी मिसाल थे म्हारै में देखो हो। 18 ऐ बात मैं भोत बार थानै केई है अर अब बी रो रोगे केऊं कै हिस्या भोत लोग है झिका यीसू मसी गै करूस ऊं बैर राखगे चालै है। 19 बा लोगा नै परमेसर जरूर सजा देवैगो। बा लोगा गो ईस्वर लालसा अर अभिलासा है। बे लोगा सदा ई बुरे काम पर घमण्ड राखै है अर संसार गी बाता पर बोळो सोचै है। 20 पण आपणो देस सुरग में है। बठूं आपां आपणै मुकतीदाता प्रभु यीसू मसी गै आण गी उडीक करण लागरया हा। 21 बो आपगी मोटी ताकत ऊं सारी चिजां नै आपगै बस में कर सकै अर बि ताकत ऊं आपणै कमजोर अर हीण सरीर नै बदळगे आपगी मेमा गी देह गै बरगो बणा दयगो।