फिलिप्पी 2

मसी गी दीनता अर म्हानता

1 यीसू मसी में थारो जीवन है बिमै थे बलवन्त हो जाओ अर बिंगै प्रेम में ढांढस बांध ल्यो। अर थारै पर दया अर करुणा बी है अर एक दूसरै गै सागै भागिदार होण खातर पवितर आत्मा थानै मदद करण लागरी है। 2 इंया होणूं थे एक मन में रेगे अर एक तरियां सोच गै अर एक दूसरै ऊं प्रेम राख गै, थे मेरो आनंद पूरो करो। 3 बिरोध अर आपगी स्वारथ खातर कीं ना करो पण दीनता ऊं एक दूसरै नै आप ऊं आच्छो समझो। 4 हरेक जणो सिरफ आपगै हित गी कोनी पण दूसरै गै हित गी बी चिंता करो।

5 जिंया यीसू मसी गो सभाव हो बिंया ई थारो सभाव बी राखो।

6 झिकै परमेसर गै स्वरूप में होगे बी

अपणै आपनै परमेसर गी समानता गो छोडणो तैयार हो'ग्यो।

7 पण बण आपगै आपगो सारो कीं छोडगे

इतो नीचो करयो अर एक गुलाम जिस्यो बण गयो।

8 अर मिनख गै रूप में पेस कर'गे

अपणै आपनै दीन कर दियो

अर आपगा प्राण तांई त्याग दिया अर करूस गी मोत बी सेह ली।

9 ईं कारण परमेसर बिनै भोत म्हान करयो

अर बिनै बो नाम दियो झिको सारै नामा ऊं उपर है।

10 कै सुरग में अर धरती में अर धरती गै नीचे हो,

बे सारा यीसू गै नाम पर गोढा टेके।

11 अर हरेक जणो पिता परमेसर गी बडाई खातर

बिनै मानल्य अर बोलै, “यीसू मसी ई प्रभु है।”

संसार में चानणै गी तरियां चमको

12 ईंखातर हे मेरा प्रियो, जद मैं थारै सागै हो, थे मेरै निरदेसा गो जिंया पालण करयो बिंया ई मैं जद थारै सागै कोनी हूं बिंया ई कांपता अर डरता होया थारी मुकती गै काम में लाग्या रेओ। 13 क्यूंकै परमेसर ई है झिको आपगी आच्छी इच्छा ऊं थारै मन में काम अर इच्छा दोना नै पैदा करै है।

14 ईंखातर बिना कोई सिकायत अर बाद विवाद गै सारा काम करता रेवो। 15 जिऊं थे बोळा भाळा अर पवितर बण जाओ अर घमण्डी अर लडाई झगड़ा करण आळै लोगा गै बिचाळै परमेसर गी उळाद बण जाओ। बांगै बिचाळै अंधेरी दुनिया में थे जोती गी तरियां चमको। 16 थे जीवन देण आळै सुब समाचार गो इंया ई परचार करते रेओ। यीसू मसी गै दुसर आण गै टेम मनै भोत खुसी होवै अर थारै बारे में आच्छी बात कर सकू क्यूंकै मेरो काम बेकार कोनी होयो अर आच्छो फळ बी मिलै। 17 थारो बिस्वास एक बली गी तरियां है अर जे मनै मेरो खून थारै बिस्वास खातर बहाणो पडै तो बी मैं राजी हूं। थारी खुसी में मैं बी भागिदार हूं। 18 बिंया थे बी खुस रेवो अर मेरै सागै खुसी मनाओ।

सेवकाइ खातर एक नमुनो

19 मनै प्रभु यीसू में आसा है कै मैं तीमुथियुस नै थारै कनै बेगो घालूंगा कै थारी आसा देखगे मनै बी सांती मिलै। 20 क्यूंकै मेरै कनै हिस्यै सभाव गो कोई कोनी झिको सच्चै मन ऊं थारी फिकर करै। 21 सारा लोग आप आपगै कामां में लागेड़ा है, यीसू मसी गै कामां में कोई कोनी लागड़ो। 22 थानै तीमुथियुस गै बारै में ऐ बात पतो है कै जिंया एक पिता बेटो एक सागै काम करै है इंया ई बण यीसू मसी गो सुब समाचार सुणाण में मेरी मदद करी है। 23 ईंखातर जिंया ई मनै ठा लागेगो कै मेरै सागै के बितैगी ओ जाण गै बेगो ईं मैं बिनै थारै कनै घालण गी आस राखूं। 24 अर मनै प्रभु पर पूरो भरोसो है कै मैं बी थारै कनै बेगो ई आऊंगा।

25 मैं ओ जरूरी समझ्यो कै इपफ्रुदीतुस नै थारै कनै घाल्यो झिको यीसू मसी में मेरो सच्चो भाई अर मेरै सागै काम करै है अर परमेसर गै काम में एक सिपाई जियां मेरै सागै काम करण आळै अर मेरी जरूरत गै टेम थे लोग बिनै मेरै कनै घाल्यो अर अब मैं बिनै वापस घालूं। 26 क्यूंकै बो थानै सदा ई याद करतो रेयो अर थे बिंगी बीमारी गै बारे में सुण्यो हो ईं कारण बो भोत दुखी रेवंतो हो। 27 बो बीमार हो अर मरण आळो हो पण परमेसर बि पर दया करी केवल बि पर कोनी पण मेरै पर बी कै मनै दुख पर दुख ना मिलै। 28 बिनै देखगे थे लोग भोत खुस होज्यै ईंखातर मैं बिनै थारै कनै भेजूं अर इंगै द्वारा मेरी बी चिंता दूर हो जावै। 29 ईंखातर थे लोग बिंगो भोत खुसी गै सागै स्वागत करयो जिंया बिस्वासी लोग प्रभु में करै है। हिस्यै लोगा नै आदर मान देणो भोत जरूरी है। 30 क्यूंकै बो मसी गै काम खातर आपगा प्राण खतम करण आळो हो। बण आपगै प्राणा नै भोत म्हत्व कोनी दियो क्यूंकै थे लोग झिका काम कर कोनी सकया बां कामां नै बो पूरा करणा चावै है।