फिलिप्पी 1

फिलिप्पी सैहर गै मसी लोगा गै नाम

यीसू मसी गै खास चेलै पौलुस गो खत

पौलुस गी ओर ऊं निमस्कार

1 यीसू मसी गै दास पौलुस अर तीमुथियुस गी ओर ऊं फिलिप्पी सैहर में रेण आळा सारा परमेसर गै लोग झिका यीसू मसी गा गेरो सबंध है अर बिस्वासी मण्डली गी रुखाळी करण आळा मुख्य लोग अर बिस्वासी मण्डली गी सेवा में मदद करण आळा लोग, 2 आपणै पिता परमेसर अर प्रभु यीसू मसी गी ओर ऊं थानै किरपा अर सांती मिलती रेवै।

धन्यवाद अर पराथना

3 मैं जद बी थानै याद करूं हूं बि टेम ई परमेसर गो धन्यवाद करूं हूं। 4 जद बी मैं पराथना करूं हूं तो थारै खातर सदा ई बड़ी खुसी ऊं पराथना करूं हूं। 5 क्यूंकै पेलै दिन ऊं लेगे आज तांई यीसू मसी गो सुब समाचार नै फेलाण में थे मेरै सागै रेया हा। 6 मनै ईं बात पर पूरो भरोसो है कै बो परमेसर झिकै थारै बिचाळै एक आच्छो काम सरू करयो है बो बि दिन पूरो करसी जद यीसू मसी फेर आवैगो। 7 जद मैं जेळ में हो अर जद मैं यीसू मसी गो सुब समाचार सुणायो जद बी थे सारा लोग मेरै सागै किरपा में रेवो हो। थे सारा मेरै मन में सदा ई रेवो हो। ईंखातर थारै सारा गै बारै में मेरो सोचणो ठीक ई है। 8 परमेसर मेरो गवाह है कै यीसू मसी गै प्रेम गै द्वारा मैं थानै मिलण गी भोत इच्छा राखूं।

9 मैं आ पराथना करतो रेऊं हूं, थारो प्रेम दूसरा गै सागै बदतो रेवै अर थे आपगो ग्यान अर हर टेम आच्छी अर माड़ी बाता नै समझण में लगातार बदता रेवो। 10 झिका ऊं थे आच्छो आच्छो काम डूंडण गै लायक बण ज्यो अर मसी गै दुसर आण तांई थे सच्चा अर बिना दोस में बणया रेवो। 11 अर यीसू मसी गी दया नै पा'गे थे लोग परमेसर गी नजर में आच्छा काम करोगा अर इंगै द्वारा परमेसर गी मेमा स्तुति होवंती रेवै।

जेळ में पौलुस गी सेवा

12 हे भाईयो अर भेनों, थे ओ जाणल्यो कै झिको कीं मेरै सागै बित्यो बिऊं मेरो काम रुक्यो कोनी पण बिऊं सुब समाचार गी बढोतरी होई है। 13 ईंखातर कैसर गी राजभवन गी सारी पळटण अर सारै दूसरै लोगां नै पतो लागग्यो है मनै मसी गो चेलो होण खातर ईं बंदी बणायो हो। 14 मैं केद में होण गै कारण जादा बिस्वासी भाई भेन लोग प्रभु पर भोरोसो राखगे परमेसर गो बचन बिना कोई डर गै सुणाण गी हिम्मत करी है।

15-17 ओ सच्च है कै बामूं केई लोग बैर अर जलन गै सागै मसी गो बचन सुणावै है अर ऐ लोग तो सच्चाई ऊं कोनी पण आपगी भलाई सोचगे मसी गो परचार करै है। क्यूंकै बे केद में मेरै दुख भदाण खातर इंया करयो है। पण कीं लोग भली इच्छा ऊं मसी गो बचन सुणावै है अर ऐ लोग प्रेम गै कारण इंया करै है क्यूंकै ऐ जाणै है परमेसर गै सुब समाचार नै बचाण खातर मनै अठै राख्यो है। 18 पण इऊं कोई फरक कोनी पड़ै चायै भानै ऊं या सच्चाई ऊं मसी गो परचार करै है अर बिनै आदर मिलै है। मैं इऊं भोत राजी हूं अर राजी रेऊंगा। 19 क्यूंकै मैं जाणूं हूं कै थारी पराथना अर यीसू मसी गी आत्मा ऊं मिलेड़ी मदद ऊं मैं छूट जाऊंगा। 20 मेरी इच्छा अर आस आई है अर मनै हिस्यो बिस्वास है कै मैं कोई बी बात ऊं निरास कोनी होस्यूं। अर बिना कोई डर गै सागै मसी गी मेमा सदा होवंती रेवै। अर आ'गे बी हो'सी, चावै मैं मरूं या जीऊं। 21 क्यूंकै मसी मेरै जीवन में सारो कीं है अर मैं मर जाऊं तो बी मनै ओर बी फायदो है। 22 पण जे मैं ऐ सरीर में जींवतो रेऊं तो मैं मसी गै खातर आच्छो काम कर सकूंगा। पण मैं कोनी जाणूं कै जीणा अर मरणा इमें किसो बडिया है। 23 आमूं ऊं किनै चुणू मेरी कीं समझ में कोनी आवै। मेरी इच्छा आ'ई है कै मैं मसी गै कनै उड़ जाऊं क्यूंकै ओ भोत आच्छो है। 24 पण अठै मेरो सरीर में रेणो थारै खातर ओर बी जरूरी है। 25 ईंखातर मनै इंगो पूरो भरोसो है कै मैं जींवतो रेऊंगा अर थारै सगळा गै सागै रेऊंगा जिऊं थे बिस्वास में ओर मजबूत अर खुस रेवंता रेवो। 26 अर जद मैं थारै कनै दुसर आण गै टेम, यीसू मसी मेरै द्वारा करेड़ै काम नै सुणगे थे लोग भोत आच्छो बतास्यो।

27 मैं आ'गे थानै देखूं या ना देखूं पण थे इतो करो कै थारो रेणो सेणो मसी गै सुब समाचार गै लायक होणो चईयै। मैं थारै बारे में ओ सुणनो चाऊं कै थे सारा भेळा होगे एक मन ऊं मसी गै सुब समाचार गै बिस्वास खातर भोत मेनत करता रेओ। 28 अर कोई बी बात में थे आपगै विरोधियों ऊं डरो ना। ओ बांगै खातर बिनास गो कारण है पण थारै खातर परमेसर गी ओर ऊं आएड़ी मुकती गो निसान है। 29 क्यूंकै मसी गै कारण थारै पर किरपा होई है कै ना बि पर बिस्वास करो पण बिंगै खातर दुख बी झेलो। 30 मेरी मेनत अर दुख गै बारै में थानै पतो है अर ओ दुख थानै बी है।