तीमुथियुस नै भेज्यो जाणो
3
1 ईंखातर जद म्हे थारा हाल चाल जाणै बिना कोनी रे सकां, तो म्हे एथेंस नगरa में एकला ई ठेर जाण गो फेंसलो करयो।
2 अर म्हे तीमुथियुस झिको मसी गै सुब समाचार गै परचार करण में आपणै भाई अर परमेसर गो दास है बिनै ईंखातर भेज्यो कै थारै बिस्वास नै तरो ताजा अर पक्को कर सको।
3 जिऊं कोई बी बिस्वासी भाई अर भेन ईं क्ळेस गै कारण डगमगा ना जावै क्यूंकै थे आप ईं जाणो हो कै आपणै खातर हिस्या दुख जरूर आवैगा।
4 थारै बठै रेंवता टेम म्हे थारै ऊं केवंता हा कै म्हानै दुख उठाणो पडे़गो अर बिंया ई होयो है अर थे तो जाणो ई हो।
5 ईंखातर क्यूंकै मैं ओर जादा उडीक कोनी कर सक्यो हो। ईंखातर मैं थारै बिस्वास गै बारै में जाणगे तीमुथियुस नै घाल दियो क्यूंकै मनै डर हो कै परीक्सा करण आळो सैतान थारी परीक्सा कर'गे थारै खातर म्हारी सारी मेनत नै बेकार कर दी।
तीमुथियुस ऊं समाचार मिलणो
6 तीमुथियुस अबी अबी अठै आयो अर बो थारै बिस्वास अर प्रेम गै बारै में सुब समाचार ल्यायो है। बो म्हानै बतावै है कै थे सदा ई मनै याद राखो अर थे म्हानै फेर देखणै गै खातर भोत ई उंतावळा हो बिंया ई म्हे थानै मिलण ऊं।
7 ईंखातर, हे भाईयो अर भेनों, म्हे आपगै सारै दुख अर क्ळेस गै बावजूद में बी थारै बिस्वास गै बारे में जाणगे म्हानै सांती मिली है।
8 म्हे जाणग्या कै प्रभु में थे टिकेड़ा हो ईंखातर म्हे फेर सुख गा सांस लेण लागरया हां।
9 अर जिस्यो आनंद म्हानै थारै कारण आपणै परमेसर गै सांमणै है बिंगै बदळै में थारै बारै में म्हे परमेसर गो धन्यवाद किंया करां।
10 म्हे दिन-रात आग्रह गै सागै परमेसर ऊं आ पराथना करता रेवां कै म्हे थानै दुबारै देख सकां अर थारै बिस्वास में झिकी कमी रेगी है बिनै पूरी कर सकां।
11 आपणो पिता परमेसर अर म्हारो प्रभु यीसू थारै कनै आण गो म्हारै रास्तै गी रुकावट नै दूर करै।
12 प्रभु हिस्यो प्रेम करै कै जिंया म्हे थारै ऊं प्रेम राखां बि तरियां ई थारो प्रेम बी एक दूसरै गै अर सारां गै सागै बढतो रेवै अर बढतो जावै।
13 ईं तरियां प्रभु यीसू थारै दिल नै मजबूत बणावै कै थे आपणै पिता परमेसर गै सांमणै पवितर अर निरदोस बणाये राखै जद आपणो प्रभु यीसू आपगै सारा पवितर लोगां गै सागै आवैगो।