पौलुस गै परचार गो काम
2
1 हे भाईयो अर भेनों, थे आप ई जाणो हो कै थारै कनै म्हारो आणो गळत कोनी हो।
2 थे जाणो हो कै म्हानै पेलां फिलिप्पी नगर में दुख अर बेजती सेणी पड़ी फेर बी परमेसर इती हिम्मत दी कै, परमेसर गो सुब समाचार भारी बिरोध में थानै सुणायो।
3 म्हारो उपदेस ना तो बेम में टिकेड़ो कोनी है अर असुद्धता गी अर ना कोई छल-कपट गै सागै होवै।
4 परमेसर म्हानै लाइक समझ गै म्हानै सुब समाचार सुंपयो है ईंखातर म्हे माणसां नै कोनी पण म्हारै दिल नै परखण आळै परमेसर नै खुस करण गै खातर उपदेस देंवंता रेवां।
5 म्हे कदैई चापलूसी गी बातां गै सागै थारै सांमणै कोनी आया। जिंया कै थे जाणो हो कै म्हारो उपदेस अर चाल चलण लालच गै कारण कोनी हो, परमेसर गवा है।
6 म्हे लोगां ऊं कोई आदर मान बी कोनी चायो ना थारै ऊं अर ना कीं ओर कनूं। म्हे मसी गा खास चेला होण गै कारण थारै ऊं म्हारै खाण पीण गो खरचो मांग सका हा।
7 पण जिं तरियां मां आपगै टाबरा गो लाड-प्यार करै है बिंया ई म्हे बी थारै बिचाळै दीनता गै सागै रेंता हा।
8 अर म्हे थानै भोत ई प्रेम करयो है। ईंखातर परमेसर ऊं मिल्यो सुब समाचार गो ई कोनी पण अपणै आपनै बी म्हे थारै सागै बांटयो हो क्यूंकै थे म्हारा निजी हो'ग्या हा।
9 हे भाईयो अर भेनों, थे म्हारै ओखे काम अर कस्ट नै याद राखो झिको म्हे दिन-रात ईंखातर करयो है कै म्हे परमेसर गै सुब समाचार नै सुंणाता होयां थारै पर बोझ ना होवां।
10 थे आप ई गवा हो अर परमेसर बी पण थे झिका यीसू मसी पर बिस्वास करण आळा हो, थारै बिचाळै में म्हे किंया पवितरता अर धारमिकता अर बिना दोस ऊं रेंता हा।
11 थे जाणो कै जिंया पिता आपगै टाबरा गै सागै बरताव करै है बिंया ई म्हे बी थारै सगळा नै उपदेस दियो अर सांती दी अर समझाया बी हा।
12 कै थारो चाल-चलण प्रभु गै लाइक है झिको थानै अपणै राज अर मेमा में परमेसर गै सागै मिलण खातर बुलावै है।
13 अर ईंखातर म्हे परमेसर गो धन्यवाद सदां ई करता रेवां क्यूंकै म्हारै ऊं जद थे परमेसर गै बचन नै मान्यो हो तो बो माणस गै संदेस गै रूप में कोनी पण परमेसर गै संदेस गै रूप में मान्यो जिंया कै बो सच्च में है। अर थारै बिस्वासियां पर झिकै गो असर बी है।
14 हे भाईयो अर भेनों थे परमेसर गी बिस्वासी मण्डली गी चाल-चालण लागग्या झिकी यहुदियां में मसी यीसू में है। क्यूंकै थे बी आपगै लोगा ऊं बिस्यो ई दुख पायो। झिको बां यहुदीयो ऊं पायो हो।
15 झिका प्रभु यीसू अर परमेसर गी बात बताण आळा नै बी मार दिया अर म्हानै बी सताया अर परमेसर बां कानी ऊं राजी कोनी है। अर बे सारा आदमियां गो बिरोध ईं तरियां करै है।
16 अर अन्यजातियां ऊं बांगै उद्धार गै खातर सुब समाचार सुणाण ऊं सदां ई म्हानै रोकै है अर आपगै पापां गो घड़ो भरता रेवै, पण बां पर परमेसर गी रीस पूरी तरियां आ'गी है।
बिस्वासी मण्डली ऊं मिलण गी इच्छा
17 हे भाईयो अर भेनों, जद म्हे थोड़ी देर गै खातर मन ऊं कोनी पण सरीर ऊं न्यारा हो'ग्या हा तो म्हारी थारै ऊं फेर मिलण गी आस ओर बी बणगी अर म्हे थानै मिलण गी भोत कोसिस करी।
18 ईंखातर म्हे खास कर'गे, मैं पौलुस बारी बारी थारै कनै आण गी कोसिस करी पण सैतान म्हारो रास्तो रोक राख्यो।
19 जद म्हे यीसू मसी गै आण गै टेम बिंगै सांमणै खड़या होवांगा तो म्हारी आसा, खुसी अर बडाई जरूर थे ई होस्यो अर म्हारै प्रभु गै आण गै टेम थे बी प्रभु यीसू मसी गै सांमणै जरूर होस्यो।
20 म्हारी बडाई अर आनंद थे ई हो।