थिस्सलुनिकि सैहर गै मसी लोगा गै नाम
यीसू मसी गै खास चेलै पौलुस गो पेलो खत
पौलुस गी ओर ऊं निमस्कार
1
1 पौलुस, अर सिलवानुसa अर तीमुथियुस गी ओर ऊं थिस्सलुनिकियों नगर गी बिस्वासी मण्डली गै नाम झिका परमेसर पिता अर प्रभु यीसू मसी गा लोगों, थानै परमेसर गी किरपा अर सांती मिलती रेवै।
थिस्सलुनकियां गो बिस्वास
2-3 म्हे आपगी पराथना में थानै याद करां अर सदां ई थे सारा गै खातर प्रभु गो धन्यवाद करता रेवां। प्रभु पर बिस्वास करण गै कारण झिको काम करो अर प्रभु अर सारा बिस्वासियां ऊं प्रेम करण गै कारण झिकी मेनत करो हो अर थारी आस गै कारण झिको दुख सेयो हो बानै म्हे परमेसर गै सांमै याद करां हां।
4 भाईयो अर भेनों, म्हे जाणा कै परमेसर थानै प्रेम करै है अर थानै चुण लियो है।
5 क्यूंकै म्हारै सुणायेड़े सुब समाचार नै थारै कनै सब्दां में कोनी पोंचायो है पण सामरथ अर पवितर आत्मा अर मजबूत बिस्वास गै सागै पोंचायो है। थे जाणो कै म्हे जद थारै सागै हा, थारै लाभ गै खातर किंया जीवन बितायो हो।
6 अर थे मोटै क्ळेस में पवितर आत्मा गै आनंद गै सागै बचन नै मानगे म्हारी अर प्रभु गी सी चाल चालण लागग्या।
7 ईंखातर थे मकिदुनिया अर युनान देस गै सारा बिस्वासियां गै खातर नमुनो बणग्या।
8 थारै ऊं प्रभु गो संदेस मकिदुनिया अर अखाया देस में कोनी फेलयो पण सारी जिग्यां ईं फेल ग्यो है। ईं जिग्यां में लोग थारै बिस्वास गी बातां करै। म्हानै थारै बारै में केण गी जरूरत ईं कोनी।
9-10 क्यूंकै बे आप ई म्हारै बारै में बतावै है, थे म्हारो किंया मान करयो हो अर जींवते अर साच्चै परमेसर गी सेवा करण गै खातर अर सुरग ऊं परमेसर गै बेटै गै आण गी उडीक करण गै खातर थे मूरतियां गी ओर ऊं जींवते परमेसर गी ओर किंया मूड़या हा। यीसू नै बण मरेड़ा माऊं फेर जींवतो उठायो हो अर बो ई यीसू मसी परमेसर गै आण आळी रीस ऊं म्हारी रक्सा करै है।