दुबारै आण खातर तैयार रेणो
5
1 हे भाईयो अर भेनों, ओ सारो कीं कद होवैगो, इंगै बारै में थानै लिखण गी कोई जरूरत कोनी है।
2 क्यूंकै थे आप ई भोत आच्छी तरियां ऊं जाणो है कै जिंया चोर चाणचकै आवै बिंया ई प्रभु गो दुबारै आणो होवैगो।
3 लोग आ केवै है कै अब तो सांती अर सुरक्सा है। बि टेम जिंया एक टाबर नै जन्म देण आळी लुगाई पर पीड़ा आवै है बि तरियां बां पर बिनास चाणचकै आ पड़ैगी अर बे बिऊं कोनी बच सकैगा।
4 पण हे भाईयो अर भेनों, थे बुरी दुनिया गी तरियां अन्धेरै में तो कोनी कै थारै पर बो दिन चोर गी तरियां आ'गे थानै अचंभे में कोनी डालेगो।
5 थे सारा जोती अर दिन गी उळाद हो आपां अन्धेरै अर रात गी उळाद कोनी है।
6 ईंखातर आपां यीसू मसी पर बिस्वास कोनी करण आळै गी तरियां कोनी सोणो पण जागता अर संभळगे रेणो है।
7 क्यूंकै झिका रात नै सोवै है बे रात नै ई सोवै है अर नसा करण आळा है बे रात नै ई नसो करै है।
8 पण आपां तो दिन गी उळाद हां ईंखातर आपां नै संभळगे रेणो है। बिस्वास अर प्रेम गो सुरक्सा कवच अर उद्धार गी आसा गो टोप पेरगे संभळगे रेवो।
9 क्यूंकै परमेसर आपां नै आपगी रीस गै खातर कोनी पण आपणै प्रभु यीसू गै द्वारा मुकती होवै अर ईंखातर बणाया है।
10 यीसू मसी आपणै खातर मर ग्यो कै आपां जींवता हां या मरेड़ा हां। जद बिंगै दुबारै आण गै टेम में बिंगै सागै जींवता रेवां।
11 ईंखातर एक दूसरै नै होसलो दयो अर एक दूसरै गी आत्मिक उन्नती गो कारण बणो झिको थे करण लागरयो हो।
बिस्वासी मण्डली नै उपदेस
12 हे भाईयो अर भेनों, म्हे थारै ऊं बिनती करां कै झिका लोग थारै मां मेनत करै है अर प्रभु में थारा अगुवा है अर थानै चेतावै बी है अर बांगो आदर करता रेवो।
13 अर बांगै कामा गै कारण प्रेम गै सागै बानै भोत ईं आदर गै लाइक समझो अर आपस में मेल मिलाप गै सागै रेवो।
14 हे भाईयो अर भेनों, म्हारी थारै ऊं बिनती है आळसियां नै चेतावो, कमजोर दिल आळा नै होसलो बढाओ, कोई बी तरियां कमजोर लोगां गी मदद करो। सारां गै सागै धीरज राखो।
15 थे ईं बात गो ध्यान राखो कै बुराई गै बदळै कोई बी किंगैई सागै बुराई ना करै। थे सदा ई दूसरै गै अर सारां माणसां खातर भलाई करण गी कोसिस करता रेवो।
16 थे सदा ईं खुस रेवो।
17 हर टेम पराथना में लाग्या रेवो।
18 हर एक बात में बी परमेसर गो धन्यवाद करता रेवो क्यूंकै थे झिका यीसू मसी गा हो थारै खातर परमेसर गी आई इच्छा है।
19 पवितर आत्मा गै काम नै ना दबाओ।
20 परमेसर गी बात नै कदी छोटी ना समझो।
21 सगळी बातां नै परखो अर झिकी आच्छी है बानै मानता रेवो।
22 अर हर तरियां गी बुराई ऊं बच्या रेवो।
आसिरवाद
23 सांती देण आळो परमेसर थानै पूरी रीति ऊं पवितर करै अर थारी आत्मा अर प्राण अर सरीर आपणै प्रभु यीसू मसी गै आण तांई पूरा पूरा निरदोस अर सुरक्सित राखो।
24 बो परमेसर झिकै थानै बुलाया है बिस्वास गै लाइक है अर बो इंया ई करेगो।
25 हे भाईयो अर भेनों, थे म्हारै खातर बी पराथना करो।
26 सगळा बिस्वासी भेन-भाई यीसू मसी गै प्रेम ऊं निमस्कार करो।
27 थानै प्रभु गी सोगन देगे मैं ओ केऊं कै ईं खत नै सगळै भाई-भेनां नै पढगे सुणायो जावै।
28 आपणै प्रभु यीसू मसी गी किरपा थारै सागै रेवै।