गलाती 5

पवितर आत्मा गी बात मानगे चालो

1 मसी आपां नै नेम विधान गी गुलामी ऊं आजाद कराया इमै टिक्या रेओ, फेर दुसर नेम विधान गी गुलामी गी गांठड़ी गो भार ना चको।

2 देखो, मैं पौलुस थानै केऊं हूं, जे थे परमेसर गी नजर में निरदोस बणण खातर खतनो करो हो तो मसी में थारो कीं लेणो देणो कोनी। 3 मैं थानै फेर केऊं हूं खतनो करण आळै आदमी नै पूरै यहुदी नेम गो पालण करणो ई पड़ेगो। 4 परमेसर गी नजर में निरदोस बणण खातर जे थे यहुदी नेम विधान गो पालण करोगा तो मसी ऊं थे न्यारा हो'ग्या अर परमेसर गी किरपा ऊं दूर हो'ग्या। 5 पण म्हे पवितर आत्मा गै कारण बिस्वास ऊं परमेसर गै सामणै धरमी होण'गी आस राखगे इंगी उड़ीक करण लागरया हा। 6 यीसू मसी अर आपणै रिसते गै बिचाळै में खतनो करणो अर खतनो ना करणो गो कोई लेणो देणो कोनी। पण बिमै थारी प्रेम ऊं पैदा होएड़ै बिस्वास गो ई म्हत्व है।

7 थे तो भोत आच्छी तरियां एक मसी जीवन जींवता हा। अब थानै परमेसर गी सच्चाई पर चालण ऊं कण रोक दिया। 8 झिकी बात थानै सच्च ऊं दूर करण लागरी है बा थारै बुलाण आळै परमेसर गी ओर ऊं कोनी। 9 जिंया थोड़ो सो खमीर सारै गुंदेड़े आटे नै खमीर बणा दय है बिंया ई थोड़ी सी झूठी सिक्सा बिस्वासियां नै बहका देवै है। 10 प्रभु पर मेरो पूरो भरोसो है थे कोई बी दूसरी सिक्सा कोनी अपनाओगा पण झिको थानै भहकावे है बो कोई बी होवै, बिनै परमेसर गी ओर ऊं जरूर सजा मिलैगी। 11 हे भाईयो अर भेनों, जे मैं अजे तांई खतनै गो परचार करूं हूं तो अजे तांई मेरै पर दुख आण गो कोई कारण कोनी। अर जे मैं अजे तांई खतनो गो परचार करूं हूं तो मसी गै करूस गै कारण पैदा होएड़ो मेरो सारो दुख खत्म होणो चईयै। 12 मैं तो चाऊं हूं कै झिका लोग थानै गिराणो चावै है, खतनो कराण गै सागै अपणै आपगो अंग बी काट लेवंता तो कितो आच्छो है।

13 हे भाईयो अर भेनों, परमेसर थानै आजाद करयो है पण बि आजादी नै मन गी बुरी इच्छा पूरी करण गो साधन ना बणाओ, अर प्रेम ऊं एक दूसरै गी सेवा करो। 14 क्यूंकै मूसा गै नेम विधान गो सार ओ है कै आपगै साथिया ऊं बियां प्रेम करो जिंया थे अपणै आपनै करो हो। 15 जिंया कुतिया एक दूसरै नै फाड़ खावै है बिंया थे एक दूसरै गै सागै लडाई कर'गे सत्य नास ना करो। आ बाता में सावधान रेवो।

पवितर आत्मा द्वारा चालणो

16 पण मैं केऊं कै जे थे पवितर आत्मा गी बात मानगे चालो तो थे थारै मन गी बुरी इच्छा कोई बी तरियां पूरी ना करो। 17 क्यूंकै मन गी बुरी इच्छा अर पवितर आत्मा गी इच्छा एक दूसरै गी बिरोधी है। ईंखातर झिको कीं थे बुरी इच्छा गै अनुसार करणो चावो हो तो ना कर सको। 18 पण जे थे पवितर आत्मा गै अनुसार चालो हो तो नेम विधान गै अधीन कोनी रेवो।

19-21 अब देखो, आपणै सरीर गै पापा नै सगळा जाणै है। बे है, बेबीचार, मन गो खोटो, लुचपन, मूरती पूजा, जादू टूणो, बिरोध, लडाई झगड़ो, दूसरै नै देखगे बलणो, दूसरै लोगां नै नीचा दिखाण खातर रीस आणी, अपणै आपगै बारै में सोचणो, एक दूसरै गी बात ना मानणी, लडाई झगड़ो करण खातर गुट बणणो, दूसरा गी चीजा देखगे बलणो, कोई नसो कर'गे आपगी मस्ती में मस्त रेणो, दारू पीगे रंग रलिया मनाणी। आंगै बरगा ओर बी काम है। आ बातां गै बारै में मैं थानै चेतावनी देऊं हूं। पेला मैं इंया करतो हो। झिको कोई हिस्या काम करसी बो परमेसर गै राज में वारिस कोनी हो'सी।

22-23 पण पवितर आत्मा गा फळ ऐ है, प्यार, खुसी, सांती, धीरज, किरपा, भलाई, बिस्वास, दीनता, सहन सीलता। आ कामा गै विरुद्ध कोई बी नेम कोनी है। 24 झिका लोग यीसू मसी गा है बां आपगै पापी सभाव नै बुरी वासना अर बुरी इच्छा गै सागै करूस पर चढा दियो। 25 क्यूंकै जद आपां पवितर आत्मा गै अनुसार जीवां हा तो पवितर आत्मा गै अनुसार चालणो बी चईयै। 26 आपां धमण्डी होगे एक दूसरा गै सागै लडाई झगड़ो ना करा अर दूसरा गी चीजा देखगे बळा ना।