गलाती 4

1 मैं एक मिसाल बोलणो चाऊं हूं, बाप गी संपती बेटै गी है पण बेटो अजे तांई छोटो है ईं कारण संपती बाप गै कनै है। अर बिमै अर दास में कोई फरक कोनी है। 2 पण पिता गै ठेराएड़ै टेम तांई बो बेटो संभालण आळा गै वस में रेवै है। 3 आपणी बी हिसी हालत है आपां जद टाबर हा तो आपां बी ईं दुनिया गै बेकार नेम गै अधीन में हा। 4 पण परमेसर झिको टेम गो फैसलो करयो बि टेम आपगै बेटै नै घाल्यो झिको एक लुगाई ऊं पैदा होयो अर बिनै नेम विधान पूरी तरियां मानणो जरूरी हो। 5 कै नेम विधान गै अधीन में रेण आळै लोगा नै छुड़ागे आपां नै परमेसर गोद लेगे टाबर बणा सकै। 6 अब आपां परमेसर गी उळाद हा। ईंखातर परमेसर आपणै मन में आपगै बेटै गी आत्मा घाली। बि आत्मा गी मदद ऊं आपां परमेसर नै हेलो मार सका कै “हे म्हारा पिता।” 7 ईंखातर अब थे ईं दुनिया गा बेकार नेम गै अधीन में कोनी हो, पण परमेसर गै उळाद गै। तू उळाद है, ईंखातर परमेसर गै द्वारा तू अब वारिस बी बण गेयो।

गलातिया गै बारे में पौलुस गी चिंता

8 पेला जद थे परमेसर नै कोनी जाणता हा तो थे लोग बांगै अधीन में हा झिका सच्च में परमेसर कोनी। 9 पण अब थे परमेसर नै जाणो हो अर परमेसर थानै पिछाण लिया है। अब थे कमजोर अर निकम्मी धारमिक सिक्सा कानी क्यूं मूड़नो चावो हो? थे ओर बी बिंगै अधीन में होणो चावो है के? 10 मैं इयां सुणयो हो के थे लोग दिना अर मिंना अर खास मोसम अर त्यूंहार नै बी मानो हो। 11 आ बात सुणगे मैं भोत डरूं हूं। कठैई इंया ना होवै कै मैं झिकी मेहनत करी बा बेकार ना हो'ज्य।

12 हे भाईयो अर भेनों, मैं थारूं बिनती करूं के, थे लोग बुरा कामा नै छोड़गे मेरै जिसा बण जाओ। मैं बी थारै जिसो बण गयो हूं। थे मेरो कीं बिगाड़यो कोनी। 13 मैं पेला थारै कनै यीसू मसी गो सुब समाचार सुणाण आयो हो जद मेरो सरीर भोत कमजोर हो, ईं बात गो थानै पतो हो। 14 मेरै सरीर गी कमजोरी थारी परीक्सा गै कारण ही, फेर बी थे मनै तुछ कोनी जाण्यो अर ना मेरूं नफरत करी पण परमेसर गै दूत गै रूप में मेरो मान समान करयो। थे इंया समझो कै मैं आप ई यीसू मसी हो। 15 थारी पेला आळी खुसी कठै गेई? मैं खुद थारो गवाह हूं कै जे हो सकै तो थे मनै आपगी जान बी दे देवंता। 16 मैं थारै सागै सच्च बोलण ऊं थारो दुसमण बणग्यो हूं के?

17 ऐ झूठी सिक्सा देण आळा लोग थानै आपगा बेली बणाणा चावै है। बांगी नीत आच्छी कोनी है। थानै मेरूं न्यारा करणा चावै है कै थे बांगा बेली बण जावो। 18 आच्छी सिक्सा देण आळा गै सागै चालणो भोत आच्छी बात है। मैं थारै सागै होऊं या ना होऊं, इंया सदा ईं करता रेईयो। 19 मेरा प्यारा टाबरों, जद तांई थे मसी जिस्या ना बण जावो जद तांई जिंया मां जापै गै टेम दुख झेले है बिंया ई मैं एकर थारै खातर दुख झेलू हूं 20 मैं अब बी इंया चाऊं हूं के थारै कनै आ'गे मैं न्यारी तरियां गी बात करूं क्यूंकै थारै बारै में सोचगे मैं भोत दुखी हो'ग्यो हूं।

सारां अर हाजिरा गी मिसाल

21 मैं थारै ऊं एक बात पूछणी चाऊं हूं, थे मूसा गो नेम विधान मानणो चावो हो पण बिमै कै लिखेड़ो है थानै क्यूं कोनी पतो? 22 पवितर सासतर में इंया लिखेड़ो है के अबरहाम गै दो बेटा हा एक बेटो हाजिरा ऊं पैदा होयो झिकी दासी ही अर दूसरो बेटो सारां ऊं पैदा होयो झिकी दासी कोनी ही अर बा बिंगी घराळी ही। 23 हाजिरा ऊं पैदा होएड़ो बेटो आदमी गी योजना गै अनुसार होयो अर सारां गै पैदा होएड़ो बेटो परमेसर गै वायदो ऊं पैदा होयो।

24-25 ऐ दोनूं लुगाई परमेसर गै इकरारनामे गी एक मिसाल है। एक इकरारनामो हाजिरा अरब गो सिनै पहाड़ गी मिसाल है अर हाजिरा ऊं दास ई पैदा होवै है अर बा अब आळै यरुसलेम गी तरियां है क्यूंकै बा आपगै टाबरा गै सागै नेम विधान गै अधीनता में है। 26 पण सारां झिकी आजाद लुगाई यरुसलेम जिंया सुरग में है अर बाई आपणी माता है। 27 पवितर सासतर इंया केवै है,

“हे बांझ, तूं झिकी बिना उळाद है, जय जयकार कर,

क्यूंकै तनै बो दुख कोनी होयो, तूं मूं खोलगे जय जयकार कर

अर हेलो मार क्यूंकै त्याग करेड़ी गी

उळाद सुहागन ऊं बोळी है।”

28 ईंखातर हे भाईयो अर भेनों, अब थे इसहाक गी तरियां परमेसर गै वायदे गी उळाद हो। 29 पण जिंया बि टेम आदमी गी इच्छा ऊं पैदा होयड़ा परमेसर गी वायदे ऊं पैदा होएड़ा नै तंग करता हा, बे आज बी करै। 30 पण पवितर सासतर में परमेसर अबरहाम नै इंया केवै है कै, “दासी अर बिंगै बेटै नै काड़ दयो, क्यूंकै दासी गै बेटै तेरै घराळी आजाद लुगाई गो बेटै गै सागै वारिस गी हकदार कोनी हो'सी।” 31 ईंखातर, हे भाईयो अर भेनों, आपां अब्रहाम गी दासी गी उळाद कोनी हा पण आपां तो अबरहाम गी घराळी आजाद लुगाई गी उळाद है।