गलाती 3

आपां नेम विधान ऊं परमेसर गी नजर में निरदोस बणया या बिस्वास ऊं

1 हे गलातियों गा बिस्वासी लोगो, थे मुर्खा गी तरियां क्यूं हो'ग्या हो। थारै पर कण जादू कर दियो है। मैं थानै पेला बी समझायो हो कै थारै खातर यीसू मसी करूस पर मर गेयो है। 2 मैं थारूं ओ जानणो चाऊं कै थानै पवितर आत्मा गो वरदान नेम विधान गो पालण करण ऊं मिल्यो या सुब समाचार सुणगे बि पर बिस्वास करण ऊं मिल्यो। 3 झिकै जीवन नै थे पवितर आत्मा ऊं सुरू कर'गे बिनै अब थे माणसां गी मेहनत ऊं पूरो कर'गे इता मूर्ख क्यूं बणो हो? 4 थे बिस्वासी होण गै नातै इता दुख झेल्या। मनै आसा है के बे दुख बेकार कोनी है। 5 परमेसर झिकै थानै पवितर आत्मा गो दान दियो है झिको थारै बिचाळै चमत्कार करै है बो ईं कारण होयो के थे नेम विधान मानता होया सुब समाचार सुणगे बि पर बिस्वास करयो है।

6 पवितर सास्तर में अबरहाम गै बारै में इंया केवै है कै, “बण परमेसर पर बिस्वास करयो अर ईंखातर बिनै परमेसर आपगी नजर में निरदोस बणायो।” 7 फेर थे ओ बी जाणल्यो झिको परमेसर पर बिस्वास करण आळो है बो ई अबरहाम गी उळाद है। 8 पवितर सासतर पेला ई ओ जाणै कै परमेसर गेर यहुदी लोगा नै बी बांगै बिस्वास गै द्वारा आपगी नजर में निरदोस बणावेगो, पेला ई अबरहाम नै सुब समाचार सुणा दियो कै,

“तेरै ऊं सारी जाती आसिस पावैगी।”

9 झिका परमेसर पर भरोसो राखै, बे लोग बिस्वासी अबरहाम ऊं आसिस पावोगा।

10 झिका लोग नेम विधान गै काम में बिस्वास राखै है बे लोग सराप गै अधीन है क्यूंकै पवितर सासतर में इंया लिख्यो है कै,

“झिको कोई नेम विधान में लिखेड़ी सारी बात कोनी मानै तो बो सरापित है।”

11 नेम विधान गै द्वारा कोई परमेसर गी नजर में निरदोस कोनी बण सकै। आ बात सई है। पवितर सासतर में इंया लिखेड़ो है कै, “परमेसर गी नजर में निरदोस आदमी बिस्वास गै द्वारा जींवतो रेवेगो।” 12 नेम विधान गै बिस्वास ऊं कोई लेणो देणो कोनी। पण पवितर सासतर गै अनुसार झिको नेम विधान नै मानैगा बो बिंगै द्वारा जींवतो रेसी। 13 मसी म्हारै सराप नै आपगै उपर लेगे नेम विधान गै सराप ऊं आपां नै छुड़ा लिया क्यूंकै पवितर सासतर में इंया लिख्यो कै, “झिको कोई काठ पर लटकायो गेयो बो सरापित है।” 14 मसी आपां नै ईंखातर छुड़ायो कै अबरहाम नै देएड़ी आसिस यीसू मसी गै द्वारा गेर यहुदियां नै बी मिल सकै कै म्हे बिस्वास गै द्वारा बि पवितर आत्मा नै ले सका झिकै गो वायदो करेड़ो है।

वायदे ऊं वारिस बणा ना कै नेम विधान ऊं कोनी

15 हे भाईयो अर भेनो, अब मैं थानै हर एक दिन ऊं एक मिसाल बताऊं, जिंया दो आदमी आपसरी में इकरारनामो करै है तो एक दिन पक्को करै है अर फेर बिंगै बाद बिनै आ'गे लारै कोनी करयो जा सकै। परमेसर गो वायदो बी हिसो ई है। 16 परमेसर अर अबरहाम गी आण आळी एक उळाद गै सागै एक वायदो करयो, पवितर सासतर में इंया कोनी केवै है “बिंगी आण आळी उळाद” इंया होवंती तो बोळा गै बारै में इसारो होवंतो। पण सासतर इंया केवै है “अर तेरी आण आळी एक उळाद नै, इंगो मतलब बो यीसू मसी है।” 17 मेरै केण गो मतलब ओ है के परमेसर अबरहाम गै सागै एक पक्को इकरारनामो कर लियो। बिंगै चार सौ तीस साल बाद मूसा नै नेम विधान परमेसर दे दियो। मूसा नै देएड़ै नेम विधान अबरहाम गै इकरारनामा नै बदळ कोनी सकै। 18 क्यूंकै वारिस जे नेम विधान पर टिकेड़ो है तो बा परमेसर गै वायदे पर कोनी टिकेड़ो। पण परमेसर अबरहाम नै वायदे गै द्वारा वारिस बणा लियो।

19 फेर नेम विधान गी के जरूरी है? लोग परमेसर गी बात नै मान लियो ईंखातर नेम विधान बानै दे दियो है। नेम विधान बा उळाद आण तांई रेवै झिकै गो वायदो करयो गेयो हो अर परमेसर ओ नेम विधान सुरगदूता गै द्वारा मूसा गै बिचाळै लेगे दियो। 20 झिका आदमी बिचाळै गा काम करै है बो दोना नै सागै लेगे करै है। पण परमेसर झिका वाय्दा अबरहाम नै दिया बांगै बिचालै कोई कोनी हो।

21 तो नेम विधान परमेसर गै वाय्दो गो बिरोधी है के? जमाई कोनी। क्यूंकै जे नेम विधान दियो जांवतो झिको जीवन दे देवंतो तो साची में परमेसर गै सामणै एक आच्छो जीवन नेम विधान ऊं होवंतो। 22 पण पवितर सासतर केवै है झिको कीं संसार में है बा सारा पाप गै अधीन में है। कै परमेसर गो वाय्दो यीसू मसी पर बिस्वास करण आळा सारा लोगा खातर है।

23 यीसू मसी गै आण ऊं पेला आपां नेम विधान गै अधीन हा। ओ नेम विधान यीसू मसी गै आण तांई म्हानै बन्दी गै रूप में राख्या हा। 24 ईं तरियां आपां नेम विधान मसी तांई ले जाण में आपणी मदद करी कै आपां आपगै बिस्वास ऊं परमेसर गी नजर में निरदोस बण सका। 25 पण जद आपां आपणा बिस्वास मसी में करयो तो अब आपां सिखाण आळै नेम विधान गै अधीन कोनी रेवै।

26 यीसू मसी में बिस्वास गै कारण थे सारा परमेसर गी उळाद हो। 27 थारै ऊं जिता मसी में बतिस्मो लियो है बा सारा मसी नै मान लियो है। 28 अब थे सारा यीसू मसी में एक ई हो। अब किमई कोई फरक कोनी है, अब ना कोई यहुदी रेयो ना गेर यहुदी रेयो, ना कोई दास रेयो ना कोई स्वतंत्र, ना कोई आदमी रेयो ना कोई लुगाई। 29 अर जे थे मसी गा हो तो अबरहाम गी उळाद हो अर परमेसर गै वायदे गै अनुसार अबरहाम गा वारिस बी बण गेयो।