गलाती 2

ओर खास चेला कानूं पौलुस गो आदर मान

1 चोदह साल गै बाद मैं बरनाबास अर तीतुस गै सागै फेर यरुसलेम सैहर गेयो। 2 मैं परमेसर गा बोल सुणगे बठै गेयो। मैं गेर यहुदियां गै बिचाळै सुब समाचार सुणाऊं हूं ओ ई सुब समाचार एक बिस्वासी मण्डली गै मुख्य लोगां नै न्यारो कर'गे बी सुणायो। मैं बठै ईंखातर गेयो कै झिका काम मैं पेला करया अर अब करण लागरयो हूं बे बेकार ना जावै। 3 तीतुस झिको मेरै सागै हो बो एक युनानी हो फेर बी बिनै खतनो करण खातर मजबूर कोनी करयो। 4 अर बो झूठै बिस्वासियां गै कारण होयो झिका चोरी चुपगे म्हारै मां आग्या कै बा यीसू मसी में म्हारी आजादी गो पतो लगागे म्हानै गुलाम बणा सकै। 5 झिको सच्चो सुब समाचार थारै मां निवास करै है अर बो थारै मां बणयो रेण खातर म्हे बांगै सामे एक घड़ी बी गोढा कोनी टेक्या।

6 यरुसलेम गी बिस्वासी मण्डली गा खास लोग मेरो संदेस बदलण खातर जोर कोनी दियो, बे लोग किंया गा हा मनै कोई लेणो देणो कोनी, क्यूंकै परमेसर गै सामणै सारा लोग एक जिस्या है। 7 पण आ खास लोगा देख्यो के मनै परमेसर गेर यहुदी लोगा में सुब समाचार सुणाण गो काम दियो जिंया पतरस नै परमेसर गो यहुदी लोगां नै सुब समाचार सुणाण गो काम दियो। 8 परमेसर पतरस नै एक खास चेले गै रूप में यहुदी लोगा में काम करण गी सकती दी जियां ईं परमेसर मनै बी एक खास चेला गै रूप में गेर यहुदी लोगां गै बिचाळै में काम करण गी सकती दी है। 9 बे लोग इंया समझ ग्या कै मेरै पर परमेसर गी किरपा है अर बिस्वासी मण्डली गा मुख्य मानिजैण आळा पतरस, याकूब, यूहना यहुदी लोगा में काम करण गी सहमती कर ली अर बरनाबास अर मेरै ऊं साझेदारी कर ली अर म्हे गेर यहुदी लोगां में काम करण गी सहमती बी ली। 10 बे आ'ईं बात केवा कै, म्हे गरीब लोगा गी सुध ल्या, अर ओ ई काम करण में मैं भोत लालसा करण लागरयो हो।

पौलुस पतरस गो बिरोध करयो

11 पण जद पतरस अन्ताकिया सैहर आयो तो मैं खुलगे बिंगो बिरोध करयो कै बो गळत रा पर चालै हो। 12 मैं बिंगो बिरोध ईंखातर करयो कै याकूब गा भेजेड़ा कीं लोग अठै आणै ऊं पेला पतरस गेर यहुदी लोगा गै सागै खांतो पींतो हो पण बां लोगा गै आण गै बाद यहुदी लोगा ऊं डरतो होयो बांगै सागै उठणो बैठणो छोड़ दियो। 13 दूसरै यहुदी बिस्वासी लोगां बी बिंगी गळत चाल पर साथ दियो अर बरनाबास बी बांगै कपट गै कारण भटक गेयो।

14 जद मैं देख्यो कै बे सुब समाचार गी सच्चाई पर सीधा कोनी चालै तो मैं सारा गै सांमणै पतरस नै केयो, “जद थे यहुदी होगे गेर यहुदी गो जीवन जियोगा अर यहुदियां गी तरियां कोनी तो फेर गेर यहुदी लोगा नै यहुदियां गी रीति रिवाज पर चालण खातर क्यामी केवो हो?”

सारा लोग बिस्वास गै द्वारा ई परमेसर गी नजर में निरदोस बण जावै

15 मैं अर तूं तो यहुदी मां बाप गी उळाद हा झिका म्हानै परमेसर गै नेमा गै बारै में बतायो पण गेर यहुदी लोग परमेसर गै नेमा गै बारै में कोनी जाणै। 16 कोई बी आदमी नेमा नै मानण ऊं परमेसर गी नजर में निरदोस कोनी बण सकै। पण जे यीसू मसी पर बिस्वास करा तो परमेसर गी नजर में निरदोस बण सका हा। आपां नेम मानण ऊं परमेसर गी नजर में निरदोस कोनी बणया पण यीसू मसी पर बिस्वास करण ऊं इंया बणया। कोई बी नेमा नै मानगे परमेसर गी नजर में निरदोस कोनी बण सकै।

17 कीं यहुदी लोग आपां नै पापी समझै है क्यूंकै परमेसर गी नजर में निरदोस बणण खातर आपां नेम विधान ना मानगे एकलै यीसू मसी पर बिस्वास करां हा। इंगो मतलब ओ कोनी कै मसी पाप गो सेवक है। कदी कोनी हो सकै। 18 जे मैं पेला आळै नेम विधान नै छोड़गे दुसर बिंगो पालण करण लाग जाऊं तो मैं नेम विधान नै तोड़ण आळो अपराधी बण जाऊंगा। 19 पेला मैं नेम विधान मानगे आपगो जीवन जींवतो हो। पण जद मेरो नेम विधान ऊं छुटकारो होयो तो मैं परमेसर गै सागै जीवन जीण गै काबिल बण गेयो। 20 मैं मसी गै सागै करूस पर चढायो गेयो हूं अब मैं जींवतो कोनी हूं पण मसी मेरै में जींवतो है। मैं अब बिस्वास में जींवतो हूं, मैं अब परमेसर गै बेटै पर बिस्वास कर'गे जींवतो हूं झिकै मेरूं प्रेम करयो अर मेरै खातर अपणै आपनै बलिदान कर दियो। 21 मैं परमेसर गी किरपा गो इनकार कोनी करूं हूं, जे नेम विधान गै द्वारा म्हे परमेसर गी नजर में निरदोस बणता तो मसी गो मरणो बेकार है।