गलाती 1

गलाती इलाके गै मसी लोगा गै नाम

यीसू मसी गै खास चेलै पौलुस गो खत

पौलुस गी ओर ऊं निमस्कार

1 मैं पौलुस, यीसू मसी अर पिता परमेसर गी ओर ऊं झिकै बिनै मरेड़ा ऊं जींवतो करयो है, बिंगो खास चेलो हूं, मनै ना कोई माणस गी ओर ऊं अर ना कणी माणसां गी द्वारा भेज्यो है।

2 मैं ओ खत सारा भाई झिका मेरै सागै है, बांगी ओर ऊं गलातिया गै इलाके गै बिस्वासी मण्डली गै नाम लिखण लागरयो हूं।

3 आपणै पिता परमेसर अर प्रभु यीसू मसी गी ओर ऊं थानै परमेसर गी किरपा अर सांती मिलती रेवै। 4 प्रभु यीसू मसी झिको आपणै पापां खातर अपणै आपनै बलिदान कर दियो कै आपणै परमेसर अर पिता गी इच्छा ऊं आपां नै अब ईं टेम गै बुरे संसार ऊं छुड़ावै। 5 बांगी सदा सदा ई बड़ाई होवंती रेवै। आमीन।

सुब समाचार एक ई है

6 थे लोग यीसू मसी गी किरपा ऊं बुलाएड़ा हो बिऊं थे इता बेगा बदळगे दूसरै सुब समाचार गै लारै लागग्या, ओ देखगे मनै भोत अचंभो होयो। 7 पण कोई दूसरो सुब समाचार है ई कोनी। पण कीं लोग थानै डरागे मसी गै सुब समाचार नै बिगाड़नो चावै है। 8 म्हे थानै झिको सुब समाचार सुणायो है बिनै छोड़गे जे म्हे या कोई सुरगदूत थानै कोई ओर सुब समाचार सुणायो है तो बो सरापित है। 9 झिका म्हे पेला केयो बिंया ई मैं फेर केऊं हूं के बि सुब समाचार झिको थे मान्यो है बिनै छोड़गे कोई दूसरो संदेस सुणावै तो बो सरापित है।

10 मैं लोगा नै राजी कोनी करूं, पण मैं परमेसर नै राजी करूं हूं। तू कै सोच्यो है के मैं लोगां नै सराण आयो हूं? जे मैं लोगां नै राजी करण आयो हूं तो मैं मसी गो दास कोनी।

पौलुस किंया खास चेलो बणयो

11 हे भाईयो अर भेनों, मैं थानै बताणो चावूं हूं कै झिको सुब समाचार मैं सुणायो है बो माणसां गी ओर ऊं कोनी। 12 क्यूंकै मैं कोई बी सुब समाचार माणसां कनूं कोनी लियो अर ना कणई मनै सिखायो पण यीसू मसी गै द्वारा परगट होयो।

13 मैं पेला यहुदी धरम में किंया जींवतो हो बो थे जाणो हो। अर थे ओ बी सुणयो हो कै मैं परमेसर गी बिस्वासी मण्डली नै किती तंग करी अर बानै खत्म करण गी बी कोसिस करी ही। 14 यहुदी धरम गै पालण में मैं आपगै युग गै सारा यहुदी लोगां ऊं आ'गे हो क्यूंकै मेरा बडेरा गी रीति रिवाज गो पालण करण खातर मैं भोत उंतावळो हो। 15 पण परमेसर मनै मेरै जन्म ऊं पेला ई चुण लियो। अर आपगी किरपा ऊं मनै बुला लियो है। 16 जद बांगी इच्छा होयी कै मेरै में आपगै बेटै गै रूप में परगट करै कै मैं गेर यहुदी लोगा में बिंगो सुब समाचार सुणाऊं जद मैं ईं बात गी सला कोई माणसा कनूं कोनी ली। 17 अर ना मैं बा लोगा कनै यरुसलेम गेयो झिका मेरूं पेला खास चेला बण्या हा पण मैं अरब में गेयो अर बठै ऊं दमिसक पाछो आयो।

18 फेर तीन साला गै बाद पतरस ऊं मिलण खातर यरुसलेम गेयो बिंगै कनै पनदरा दिन रुक्यो। 19 पण बठै मैं प्रभु गै भाई याकूब नै छोड़गे दूसरा खास चेला ऊं कोनी मिल्यो। 20 मैं परमेसर गै सामणै सोगन खा'गे केऊं हूं झिको मैं लिखण लागरयो हूं बिमै झूठ कोनी है। 21 इंगै बाद मैं सिरिया अर किलिकिया प्रदेसां में गेयो। 22 पण यहुदियां गी बिस्वासी मण्डली गा मसी नै मानण आळा लोग ना मनै कदी देखयो अर ना'ई मनै जाणता हा। 23 पण बा ओ सुण्यो हो कै झिको मनै पेला तंग करतो हो बो मसी गो सुब समाचार सुणावै है झिकै नै पेला खत्म करणो चावै हो। 24 अर बो मेरै बारै में परमेसर गी बड़ाई करी।