गलाती इलाके गै मसी लोगा गै नाम
यीसू मसी गै खास चेलै पौलुस गो खत
ईं खत गै बारै में
पौलुस गो ओ खत केई बिस्वासी मण्डलिया खातर लिखेड़ो एक खत है। ओ खत ईस्वी सन् 49 में सिरिया गै अन्ताकिया में लिख्यो। बिस्वासी मण्डली पेलै सतक ऊं आ मानै है कै पौलुस ईं खत गो लेखक है। 1:1; 5:2 ऐ पद में आ बात बतावै है। जद यीसू मसी गै सुब समाचार गो परचार गेर यहुदियां में होण लागग्यो तो एक सवाल उठयो, एक सच्चो मसी बणण खातर मूसा गै नेम विधान नै मानणो सई है या फेर गलत? पौलुस ओ उतर देवै है कै ओ जरूरी कोनी। ईं बात पर लोगां बिंगो बिरोध करयो अर पौलुस नै बतायो कै परमेसर गै सागै आच्छो संबन्ध राखण खातर मूसा गो नेम विधान मानणो जरूरी है।
गलाती गा बिस्वासी सई रा छोडगे नेम विधान में फस ग्या, ईंखातर बानै समझाण खातर ओ खत लिख्यो। बो अपणै आपनै परमेसर गी बुलाहट ऊं बुलायेड़ो खास चेलो ओ केगे खत गी सुरुवात करै है। ईं खत में इंया बतावै है कै परमेसर गी किरपा बिस्वास गो आधार है। ओ बिस्वास यीसू मसी में आजादी देवै है। ईं आजादी गो उपयोग गलत कामां में ना करयो जावै है। पौलुस ओ केवै है मसी पर बिस्वास करण ऊं आजादी आत्मा गै चलाई चालणो अर आत्मा गा फल ल्याण आळो जीवन है।
रूप रेखा
पौलुस गी ओर ऊं निमस्कार 1:1-5
सुब समाचार एक ई है 1:6-10
खास चेले गी रूप में पौलुस गो अधिकार 1:11–2:21
परमेसर गै किरपा गो सुब समाचार 3:1–4:31
मसी आजादी अर जिमेदारी 5:1–6:10
आखरी निरदेस 6:11-18