पौलुस गो आखरी निरदेस
13
1 अब मैं तीसर थारै कनै आण लागरयो हूं, “हरेक बातां गो फैसलो दो तीन गवाह गी मोजूदगी में होणो चईयैa”
2 जद मैं थारै कनै दूसरी बार आयो तो जद बी मैं थानै चेतावनी दी अर अब थारूं दूर हूं तो बी मैं थानै आई चेतावनी देण लागरेयो हूं कै झिकै लोगा पेला पाप करयो है अर अब करण लागरया है, बानै मैं जद थारै कनै आऊंगा तो बकसूंगा कोनी।
3 इंया, मैं ईंखातर केण लागरयो हूं कै थानै तो ईं बात गो सबूत चईयै कै यीसू मसी मेरै द्वारा बोलै है कै कोनी? बो थारै सागै निपटण खातर कमजोर कोनी पण सामरथी है।
4 पण ओ सच्च है कै जद बिनै करूस पर चढायो तो बो कमजोर दिखै हो पण फेर ईं परमेसर गी सामरथ ऊं बो जींवतो है। ईंखातर आपां बी बिमै कमजोर हा पण परमेसर गी सामरथ ऊं यीसू गै सागै जींवता हा अर जिऊं थारी सेवा कर सका।
5 थे लोग अपणै आपनै परखो कै थे यीसू मसी गै बिस्वास में जीवन बितावो के कोनी? अर ओ बी देखो कै, यीसू मसी थारै दिल में बास करै के कोनी? जे इंया ना है तो थे बि खातर खोटा हो।
6 पण फेर ई मैं आस करूं कै थे ओ जाणल्योगा कै म्हे, बि खातर खोटा कोनी हा।
7 अर थारै खातर म्हारी परमेसर ऊं आई पराथना है कै थे कोई गळत काम ना करो। पण ओ ईंखातर कोनी कै आपां आच्छा दिखा पण ईंखातर कै थे भलाई गा काम करता रेवो चाहे आपां खोटा ईं क्यूं ना दिखता होवां।
8 क्यूंकै म्हे सच्चाई गै खिलाफ कीं कोनी बोला पण सच्चाई गी पकस्स करां।
9 म्हानै खुसी जद होवै जद म्हे, कमजोर अर थे तकड़ा दिखो। म्हे पराथना करता रेवां कै थे बिस्वास में ओर बी तकड़ा होवंता रेवो।
10 ईंखातर आ बात मैं थानै दूर बैठ्यो लिखण लागरयो हूं कै जद मैं थारै कनै आऊं तो मनै परमेसर गै देयेड़ै हक ऊं थारै सागै करड़ो बरताव ना करणो पड़ै। क्यूंकै बण ओ हक मनै थानै बसाण खातर दियो है ना कै उजाड़न खातर।
पौलुस गो आखरी धन्यवाद
11 ईंखातर हे भाईयो अर भेनों, अर आखरी में मैं थानै आई बात केगे मेरी बात बंद करणी चाऊं कै थे खुस रेओ, सिद्ध बणो, एक दूसरा नै होसलो दयो अर सांती ऊं सारा मिलगे रेवो। अर देखो, जद परमेसर झिको सांती अर प्रेम गो दाता है, बो थारै सागै हमेसा रेसी।
12 अर एक दूसरै ऊं लाड़ कोड़ करता मिलता रेवो।
13 अर अठै गै सगळै परमेसर गै पवितर लोगां गी ओर ऊं थानै सारा नै आसिस मिलै।
14 प्रभु यीसू मसी गी किरपा अर परमेसर गो प्रेम अर पवितर आत्मा गी संगती थारै सागै सदा सदा होवंती रेवै। आमीन।