पौलुस गै सरीर में एक कांटो
12
1 हालाकी घमण्ड करणो आच्छी बात कोनी पण फेर बी मैं घमण्ड करूंगा। ईंखातर कै मैं प्रभु गो देयेड़ै दरसणा अर बांगी प्रकट होयड़ी बातां गै बारे में जरूर चरचा करूंगा।
2-4 मैं मसी में एक भगत नै जाणूं झिकै नै चोवदा साल पेली परमेसर तीसरै सुरग में उठा लियो। पण बो देह गै सागै उठाईज्यो जा बिना देह गै। इंगो मनै ठा कोनी। ओ परमेसर ई जाणै। बण भगत बठै इसी बाता सुणी झिकी गो बखान कोनी करयो जा सकै अर बे बातां मिनख गै मू ऊं बताई बी कोनी जा सकै।
5 मैं हिस्यै आदमी पर घमण्ड करूंगा पण जठै तांई मेरै खुद गो सवाल है मैं आपगी कमजोरियां नै छोड ओर कोई बात पर घमण्ड कोनी करूंगा।
6 जे मैं घमण्ड करूं तो आ मेरी मूरखता कोनी पण मैं साची बोलूं। पण इयां ना होवै कै झिका लोग मनै देखे अर सुणै; जद बे मनै बाऊं मोटो समझै।
7 अर परमेसर झिकी मनै प्रकट होयड़ी बातां गै बारे में बतायो बांगै घमण्ड में मैं फूल ना जाऊं। ईंखातर बण मेरै सरीर में एक दर्द भर दियो। अर एक सैतान गो दूत मेरै ईं घमण्ड नै कम करण खातर हरेक टेम दुख देवंतो रेवै।
8 अर न्यारै-न्यारै टेम मैं तीन बार परमेसर ऊं बिनती करी कै मेरो ओ दुख काट दे।
9 पण प्रभु बोल्या, “मेरी किरपा तेरै पर भोत है। अर मेरी सामरथ तेरी कमजोरी में जादा काम करेंगी।” ईंखातर मैं भोत आनंद गै सागै आपगी कमजोरियां पर घमण्ड करूंगा जिऊं मसी गी ताकत मेरै में बणी रेवै।
10 ईं कारण मैं मसी खातर कमजोरी, चुगली, कस्ट, सताव अर दुख-तकलीफ में बी सुखी रेवूं क्यूंकै जद मेरै में कमजोरी आवै तो मैं अपणै आपनै ताकतवर समझूं।
कुरुन्थी गै लोगां खातर पौलुस गी चिंता
11 मैं मूरख तो बण्यो पण थे ई मनै बणन पर मजबूर करयो। थानै तो मेरी बडाई करणी चईयै। हालाकी मैं कीं कोनी जाणूं पण फेर बी बा मोटा खास चेला ऊं कोई बात में कम कोनी हूं।
12 सच्च में मैं थारै सामणै बडी धीरज ऊं एक साच्चो खास चेलो होण गो सबूत दिखायो अर थारै बिचाळै चमत्कार, निसानी अर सामरथ गा काम बी करया हा।
13 के थे कोई बात में दूसरी बिस्वासी मण्डली ऊं न्यारो हो? सिरफ ईं बात में ई कै मैं थारै पर बोज कोनी बण्यो। मेरी ईं गळती खातर मनै माफ करो।
14 अर देखो, मैं तीसर थारै कनै आण आळो हूं। पण मैं थारै कनूं कीं मांगण कोनी आऊं क्यूंकै मनै थारै धन दोलत गी कोनी पण थारी चिंता है। बच्चा आपगै मां बाप खातर धन भेळो कोनी करै पण मां बाप आपगै बच्चां खातर धन भेळो करै करै।
15 अर अब मैं खुसी ऊं थारै उपर आपगो तन मन धन खरच करदेयूंगा क्यूंकै मैं थारूं भोत प्रेम करूं अर मनै पूरो भरोसो है कै मेरै खातर बी थारो प्रेम कदी कम कोनी होवै।
16 थे जाणो हो कै मैं थारै पर बोज कोनी बण्यो पण फेर ई थारै बिचाळै केई लोग सोचे कै मैं आपगी चलाकी ऊं थानै आपगै फायदै खातर फसा लिया।
17 अब थे ई बताओ कै झिकै लोगा नै मैं थारै कनै भेज्या बाऊं मैं थानै ठग्या के?
18 मैं तीतुस अर बिंगै सागै एक ओर भाई नै थारै कनै भेज्यो। के बा थारै कनूं कीं लियो? क्यूंकै म्हारै में एक ई आत्मा है झिकी काम करै है।
19 थानै लागतो होणो कै म्हे थारै सामणै आपगी सफाई देण लागरया हा। पण हिसी बात कोनी। म्हे मसी गा दास होगे आ बात केण लागरया हा अर इंगो गवाह खुद परमेसर है। ईंखातर मेरै प्यारा भाईयां, म्हे झिको कीं करा है बो थारै आत्मिक बिस्वास नै मजबूत करण खातर करा हा।
20 पण मनै डर है कै जद मैं थारै कनै आऊं तो जिंया मैं थानै देखणो चाऊं बियां थे ना दिखो अर जियां मनै थे देखणो चावो बिंया मैं थानै ना दिखूं। कठैई इंया ना होवै कै थारै में लडाई झगड़ो, ईरखो, गुसो, मतलबी, बदनामी अर घमण्ड होवै अर म्हानै थे सारा आपसरी में खिंडेड़ा लादो।
21 अर मेरो परमेसर कदी बी मनै फेर ऊं थारै कनै आण पर दबाब डालै अर मनै बा लोगां खातर रोणो पड़ै झिका पेला पाप करता हा। अर बा अजे तांई आपगै आ कुकरम ऊं, बेबीचार ऊं अर भोग विलास ऊं आपगो मन ना बदळ्यो होवै।