पौलुस अर झूठा खास चेला
11
1 मैं चाऊं कै थे मेरी ई भोळी मूरखता में धीरज राखो अर इनै सेन बी करो।
2 जिंया थारी चिंता परमेसर करै बिंया म्हे बी करां। थे एक पवितर कुवारी छोरी गी तरियां हो झिकी गो रिस्तो म्हे मसी नाम गै मिनख सागै कर दियो।
3 पण मनै डर है जिंया सांप आपगी चतुराई ऊं धरती गी पेली लुगाई हवा नै भहकाई कठै बिंया ई थारै मन ऊं मसी गी सुद्ध भगती अर पवितरता ना भहकाईज्यै।
4 क्यूंकै जद कोई थारै कनै दूसरो आदमी आ'गे हिस्यै यीसू गो उपदेस सुणावै झिकै गो उपदेस म्हारै उपदेस ऊं न्यारो है, या थानै कोई दूसरी आत्मा गै बारै में बतावै झिकी पवितर आत्मा ऊं न्यारी है या थानै म्हारै सुणायेड़े सुब समाचार ऊं कोई न्यारो सुब समाचार सुणावै तो थे बिनै भोत आसानी ऊं मान्लयो।
5 हिस्या लोग झिका अपणै आपनै मोटा खास चेला मानै मैं बांऊ कम कोनी।
6 पण हो सकै मैं इतो बोलण में मायिर कोनी, पण मेरै में परमेसर गै ग्यान गी कोई कमी कोनी। ऐ सारी बातां म्हे पेला ईं साफ साफ केवंता आया।
7 थानै उपर उठाण खातर मैं छोटो बण्यो अर थानै मुफ्त में सुब समाचार सुणागे मैं कोई पाप कोनी करयो। आ गलत तो कोनी के?
8 मैं थारी सेवा करण खातर दूसरी बिस्वासी मण्डलियां ऊं चंदो मांग्यो।
9 अर जद मैं थारै कनै हो अर मनै क्यांगी लोड़ पडी तो मैं थानै कदी तंग कोनी करया क्यूंकै मकिदुनिया गै भाईयां मेरी मदद कर दी। मैं ना तो कदी थानै तंग करया अर ना'ई करूंगा।
10 जद तांई मेरै में मसी गी सच्चाई है मनै अखाया प्रदेस में घमण्ड करण ऊं कोई कोनी रोक सकै।
11 पण मेरै केण गो मतलब ओ कोनी कै मैं थारूं प्रेम कोनी करूं क्यूंकै परमेसर ईं बात नै जाणै कै मैं थारूं प्रेम करूं।
12 पण झिको कीं मैं अब करण लागरयो हूं बो आ'गे बी करतो रेवूंगा। जिऊं बे लोग झिका अपणै आपनै म्हारै बरगा समझै बानै मैं घमण्ड करण गो मोको ना दयूं।
13 हिस्या ऐ लोग झूठा अर धोखै बाज है झिका मसी गै खास चेला गो रूप धार गै लोगा में आवै।
14 पण आ हेरानी आळी बात कोनी क्यूंकै सैतान खुद बी परमेसर गै सच्चै सुरगदूत गी तरियां भेस बणावै है।
15 ईंखातर जे बिंगा सेवक भलाई गा काम करण गो ढोंग बणावै तो इमै कोई मोटी बात कोनी। क्यूंकै अंत में बानै बांगी करणी गो फळ जरूर मिलसी।
खास चेले गै रूप में पौलुस गो दुख भोगणो
16 मैं थानै फेर केऊं कै, मनै कोई मूरख ना समझै, जे कोई मनै मूरख समझै तो बो मेरी बातां मानल्यै जिऊं मैं बी थारै पर थोडो भोत घमण्ड कर सकूं।
17 हिस्यो घमण्ड प्रभु गी आग्या ऊं कोनी है पण मैं एक मूरख गी तरियां केण लागरयो हूं।
18 अर हिस्या लोग आपगै संसार गै जीवन पर घमण्ड करेगा तो मैं बी करूंगा।
19 ईंखातर थे अपणै आपनै भोत ग्यानी मिनख समझो अर म्हारै बरगा मूरख लोगां गी बाता नै बी सेन कर ल्यो। पण थे इंया हो कोनी।
20 क्यूंकै मनै बिस्वास कोनी होवै कै, जद थानै कोई गुलाम बणागे थारै सागै माड़ी करै या थारै सागै धोखो करै या अपणै आपनै थारूं मोटो समझै या थारै मूं पर थपड बी मारै तो थे बिनै राजी राजी सेल्यो हो।
21 मनै आ बात केवंता भोत सरम आवै है कै म्हे बांगी तरियां थारै सागै सलूक करण में जादा कमजोर हा। पण जे कोई कीं तरियां गी बात पर घमण्ड करण गी हिम्मत राखै तो मैं बी बि पर घमण्ड कर सकूं। आ बात मैं एक मूरख गी तरियां केण लागरेयो हूं।
22 जे बे इब्रानी लोग है तो मैं बी हूं, जे बे इसराएली लोग तो मैं बी हूं अर जे बे अबरहाम गी पीढी गा है तो मैं बी हूं।
23 जे बे मसी गा भगत है तो मैं बी, बाऊं मोटो भगत हूं। मैं आऊं जादा ओखी मेनत करी हूं, मैं भोत बार जेळ गेयो, कोड़ा खाया अर बार बार मोत गो सामणो बी करयो हो।
24 मैं यहुदी लोगां गै हात ऊं पांच बार उनचाळिस कोड़ा खाया।
25 अर तीन बार तो डंडा गी खाई, एकर लोगां ऊं मैं दगड़ा गी खाई, तीन बार मेरो समुनदर में जहाज टूट ग्यो अर एकर मैं चौबीस घंटा समुनदर में बिताया।
26 इंया मैं भोत खतरनाक नदियां, डाकुआं, आपगै समाज गै लोगा ऊं, दूसरै समाज गै लोगा ऊं, मोटै नगरा ऊं, जंगळा ऊं, समुनदर ऊं अर आपगै कपटी भाईयां गै खतरे माखर भोत बार सफर करयो है।
27 ईं काम में मैं भोत कठोर मेनत करी है। मैं ठंड में बिना गाबा गै कांपतो अर भूखो प्यासो रेगे भोत बार जागगै रात काड़ी है।
28 इंगै अलावा हरेक दिन सारी बिस्वासी मण्डलियां गी चिंता मेरै मन में रेवै।
29 जद कोई मनै कमजोर दिखै तो मैं बी अपणै आपनै कमजोर समझूं। अर झिकै नै पाप में पड़यै नै देखूं तो मनै भोत दुख होवै।
30 जे मैं घमण्ड करूंगा तो बा बातां पर करूंगा झिकी मेरी कमजोरी नै दिखावै।
31 परमेसर झिको आपणै प्रभु यीसू मसी गो पिता है। बिंगी मेमा जुगा जुगा तांई धन्य है अर बो जाणै है कै मैं झूठ कोनी बोलूं।
32 जद मैं दमिसिक में हो तो राजा अरितास गै मुख्य अधिकारी मनै पकड़ण खातर नगर पर पेरो लगवा दियो।
33 पण बठै गै लोगां मनै टोकरे में बिठागे भींत गी खिडकी माखर नगर ऊं बारै काड़ दियो अर मैं बठूं बचगे निकळग्यो।