पौलुस गो अधिकार
10
1 मैं पौलुस, यीसू गी कोमलता अर दया गै सागै थारूं ओ निवेदन करूं कै थे लोग भरम में हो कै केई लोग मेरी पीठ लारै सोचै है कै मैं डरपोक हूं पण ईं खत नै लिखता टेम भोत निडर लागूं।
2 मैं पौलुस फेर थानै केऊं कै झिका लोग समझै कै मैं संसार गी रीति पर चालूं हूं। मैं बांगै सागै करड़ो बरताव कर बी सकूं।
3 म्हे मिनख तो हा पण म्हारी लडाई गो तरिको संसार बरगो कोनी।
4 क्यूंकै म्हारी लडाई गा हथियार संसार आळा कोनी पण बुराई गै गढा नै ढाण खातर परमेसर गी सकती है।
5 अर बि सकती गै हथियार ऊं म्हे लोगां गै वाद विवाद अर हरेक बिरोध नै झिको परमेसर गै खिलाफ उठै बिनै तोड़ दयां। अर हरेक आदमी गी भावना नै केद कर'गे यीसू मसी गी आग्याकारी बणा दयां।
6 अर थे पूरी तरियां आग्या मानणै नै तैयार रेवो जद झिका आग्या ना मानै बानै सजा देण खातर तैयार रेवां।
7 थे देखी बातां पर बिस्वास करो, जे थारै मूं कोई ओ समझै कै मैं मसी गो भगत हूं तो बो ओ बी जाणल्यै कै जिंया बो भगत है बिंया म्हे बी हां।
8 अर झिको हक मनै परमेसर दियो है बि पर घमण्ड करूं तो बो थारै फायदै खातर है ना कै नुकसान खातर। ईंखातर मैं आपगै ईं हक नै बताण में सरम कोनी राखूंगा।
9 ईंखातर मैं अपणो आप पर काबू राखूं। कै झिका खत मैं लिखूं बामै मैं थानै, डराण आळो ना लागूं।
10 क्यूंकै केई लोग केवै कै, मेरो खत करड़ो अर भड़काउ बोलू, अर जद बो लोगां गै सामणै होवै तो इतो जादा कोनी बोलै।
11 पण झिका लोग इंया सोचै तो बे ओ समझल्यै कै जियां खत में म्हे बोला बिंया ई थारै सामणै बोलण गी बी हिम्मत दिखावांगा।
12 म्हे आपगी बराबरी बा लोगां सागै कोनी करां झिका अपणै आपगी बडाई करै। हिस्या लोग आपस में एक दूसरै गी तुलना करगै आपगी मूरखता दिखावै।
13 म्हे हद ऊं बारै घमण्ड कोनी करांगा पण झिकी हद परमेसर म्हारै खातर बणाई है बि तांई करांगा अर बि हद में थे बी भेळा हो।
14 म्हे आपगी ई हद नै तोडनी कोनी चावां झिकी हद में थे बी हो क्यूंकै सारा ऊं पेला, थारै म्हे अठै मसी गो सुब समाचार सुणयो।
15 म्हे म्हारी हद ऊं बारै दूसरा गै काम पर घमण्ड कोनी करां। पण म्हानै आस है कै जिंया जिंया थारो बिस्वास बदतो जावैगो, बिंया बिंया थारी बजह ऊं म्हारो सेवा गो काम बी बदतो जावेगा।
16 जिऊं म्हे थारै पड़ोस गै इलाके में सुब समाचार सुणा सकां अर बे इलाका जठै सुब समाचार गो काम हो चुक्यो बि पर म्हे घमण्ड ना करां।
17 पवितर सासतर में इंया लिखेड़ो है कै झिकै घमण्ड करणो है बो प्रभु पर करै झिको ओ सारो कीं करण आळो है।
18 क्यूंकै आच्छो आदमी बो कोनी होवै झिको खुद नै आच्छो मानै। पण आच्छो तो बो होवै झिकै नै प्रभु मानै।