मसी साथियां खातर मदद
9
1 मनै थारै पवितर लोगां गै ईं दान गी सेवा गै बारे में लिखणो जरूरी कोनी।
2 क्यूंकै मैं पेला ई जाणूं हूं कै थे मदद करण में भोत आ'गे रेवो। मैं हमेसा मकिदुनिया प्रेदेस गी बिस्वासी मण्डलियां में थारी बडाई करतो रेवंतो कै एक साल पेला ई अखाया प्रेदेस गा लोग दान देणै में तैयार हा। पण सच्च तो ओ है कै थारै ई जोस ऊं, भोतसा मकिदुनिया गा बिस्वासी लोग दान देण नै तैयार हो'ग्या।
3 पण मैं आ भाईयां नै ईंखातर भेजण लागरयो हूं कै झिको घमण्ड म्हे थारै पर करयो बो बेकार ना निकळै। अर जिंया मैं बानै केयो बिंया ई थे तैयार मिलो।
4 कठैई इंया ना होवै कै मकिदुनिया गा लोग मेरै सागै अठै आवै अर थे तैयार ना मिलो। अर जद आपां सारा नै बां लोगा सामणै सरमिन्दा होणो पडै। क्यूंकै मनै थारै पर भोत भरोसो है।
5 ईंखातर मैं आ भाईयां नै बिनती करी कै बे पेला थारै कनै आ'गे बो दान भेळो करै झिकै गो थे वायदो करयो। पण दान थे किंगैई दबाब ऊं ना देईयो पण थारी इच्छा ऊं देईयो।
दान किंया देवां
6 क्यूंकै सच्चाई तो आ है कै झिको कोई थोड़ो बिजेगो बो थोड़ो ई बाडेगो अर झिको कोई बोळो बिजेगो बो बोलो ई बाड़ेगो।
7 ईंखातर हरेक जणो, ना मन में रीस बळगे अर ना'ई किंगै दबाब ऊं दान करियो। क्यूंकै परमेसर मन ऊं देण आळै दान नै भोत प्रेम करै है।
8 अर परमेसर थारी हर तरियां गी घटी नै पूरी करण गो वरदान दे सकै जिऊं थे थारी हरेक जरूरत नै पूरी कर सको अर हरेक भले काम नै करण खातर थारै कनै कोई कमी कोनी रेवैगी।
9 जिंया पवितर सासतर में लिखेड़ो है कै,
बो सारा नै खुले दिल ऊं देवै
अर बिंगा आच्छा काम हमेसा याद रेवै।
10 ईंखातर बो परमेसर, बीज बिजाण आळै नै बीज अर जीमण आळै नै रोटी देवै। बो थानै बीजण खातर बीज देगे, बिनै भोत जादा बढावै। बिंया ई बो थारो दान देण गै उपकार नै बी बढावैगो।
11 ईं तरियां थानै बो धनवान बणावेगो जिऊं थे दूसरै लोगां गी हरेक टेम मदद कर सको अर बे लोग परमेसर गो धन्यवाद कर सकै।
12 क्यूंकै ईं दान गी सेवा ऊं सिरफ बिस्वासी लोगां गी मदद ई कोनी होवै पण ईं मदद ऊं भोतसा लोग परमेसर गो धन्यवाद बी देवै।
13 ईं सेवा गो फळ ओ होवै है कै लोग परमेसर गी बडाई करेगा। अर थारै उपकार ऊं बिस्वासी लोगा खातर आ बात साबित होज्यै कै थे यीसू गै सुब समाचार नै मान गै बिंगी रजा में रेवो। अर सारै लोगां खातर दिल खोलगे दान देवो।
14 अर बे थारूं प्रेम करै अर थारै खातर पराथना बी करता रेवै कै थारै पर परमेसर गी भोत मोटी दया है। ईंखातर बे थारूं मिलण गी लालसा करता रेवै।
15 झिकै दान गी बडाई गो बखान कोनी करयो जा सकै बि खातर परमेसर गो धन्यवाद होवै।