मन ऊं दान देणो
8
1 हे भाईयो अर भेनों, अब म्हे थानै परमेसर गी बि म्हान किरपा गै बारे में बताणो चावां हा झिकी मकिदुनिया प्रदेस गी बिस्वासी मण्डलियां पर होयी।
2 कै बठै गा लोग भोत मोटै क्ळेस में बी आनंद मनावा अर भोत भारी गरीबी में बी बे दूसरा गी मदद करण में लारै कोनी हट्या।
3 अर मैं बांगो गवाह हूं कै बा लोगा आपगी मरजी ऊं अर आपगी हेसियत ऊं जादा दान दियो।
4 ईं दान में अर यरुसलेम गो पवितर लोगां गी मदद करण में हिसेदार बणन खातर बा लोगां बारी बारी म्हारूं बिनती करी।
5 म्हारी आस ऊं बड़गै बा लोगा पेला ई अपणै आपनै प्रभु आ'गे सोंप दिया। अर बाद में परमेसर गी इच्छा ऊं म्हारो बी केणो मानण लागग्या।
6 ईंखातर म्हे तीतुस नै दान भेळो करण गी सलाह दी कै जिंया थे पेला सरुवात करी बियां ई दान भेळो करण गो काम बी अब पूरो कर ल्यो।
7 ईंखातर जिंया थे लोग हर तरियां गै बिस्वास, बचन, ग्यान अर सारी तरियां गी मदद में मजबूत रेवो अर म्हारूं प्रेम करण में बढता जावो बिंया ई दान करण में बढता जावो।
8 मैं थानै इयां आग्या गै रूप में कोनी केऊं पण मैं दूसरै लोगां गै दान देण गी खुले दिल गी चरचा करगै थारै प्रेम गी सच्चाई गी परख करण खातर केऊं।
9 थे आपणै प्रभु यीसू मसी गी दया नै जाणो हो कै बो धनवान होवंता बी बो थारै खातर कंगाल बणग्यो जिऊं आपां बिंगी कंगाली ऊं धनवान बण ज्या।
10 ईं काम गै बारे में मैं थानै सलाह देऊं झिकी थारै खातर भोत आच्छी है कै लारले साल थे ना सिरफ दान देण में सारा ऊं आ'गे हा पण सारा ऊं पेला थे ई दान देण गी इच्छा करी ही।
11 ईंखातर अब थारै खातर ओ ई आच्छो है कै अब ओ काम थे पूरो कर ल्यो। अर झिको जोस थे सरू में दिखायो बि जोस गै सागै ई थारी हेसियत गै अनुसार दान करो।
12 क्यूंकै झिको दान मन ऊं देयिजै बिनै परमेसर स्वीकार करै अर किऊं ई आ आस कोनी करिज्यै कै बो आपगी हेसियत ऊं जादा दान दय।
13 अर मैं ओ कोनी चाऊं कै थारै दान ऊं दूसरा नै मदद मिलै अर थे तंगी झेलता रेओ। मैं तो सारा नै एकसा चाऊं।
14 म्हारी इच्छा तो आई है कै आज थारै दान ऊं बा लोगा नै मदद मिलै तो आण आळै टेम में बा लोगां गै दान ऊं थारी बी मदद हो सकै के एक जिसो हो'ज्य।
15 जिंया पवितर सासतर में लिखेड़ो है कै, “झिकै आदमी जादा धन जमा करयो बिंगै कनै जादा कोनी निकळ्यो अर झिकै आदमी कम धन जमा करयो बिंगै कनै कोई कम कोनी निकळ्यो।”
तीतुस अर बिंगो साथी
16 मैं परमेसर गो धन्यवाद करूं कै जिंया थारी चिंता मनै है बिंया ई तीतुस नै बी है।
17 बण आपणी बिनती नै मान ली कै मैं थारूं मिलूंगा पण सच्चाई तो आ है बो खुद थारूं मिलण नै भोत काळो है।
18 अर म्हे तीतुस सागै एक ओर भाई नै भेजण लागरया झिको बिस्वासी मण्डली में सुब समाचार सुणाण में मानिजैड़ो है।
19 अर इंगै अलावा बो बिस्वासी मण्डली गो चुणेड़ो आदमी है अर बे चावै कै ओ ईं दान गै काम में म्हारै सागै जावै। म्हे आ सेवा ईंखातर करा कै प्रभु गी मेमा होवै, अर म्हारै मन में दूसरा गी मदद करण गी झिकी लालसा है, बिंगो दूसरा नै ठा लागज्यै।
20 अर म्हे ईं बात ऊं बी चोकस रेवा कै भोत जादा दान भेळो करण गै आच्छै काम में म्हारै पर कोई दोस ना लगा सकै।
21 ईंखातर म्हानै, ईं बात गी चिंता रेवै कै म्हे बो ई काम करां झिको परमेसर अर मिनख दोनां गी नजरा में सई होवै।
22 म्हे बिंगै सागै आपगो एक ओर भाई भेज्यो है झिकै नै म्हे भोत बारी परख्यो है अर बो सेवा करण में भोत माहिर है। पण अब थारै पर बिनै भोत भरोसो है, ईंखातर बिनै थारी मदद करण गी ओर जादा लालसा है।
23 जे कोई तीतुस गै बारे में पूछै तो बो मेरो सेवा गो साथी है। जे बिस्वासी मण्डली गै लोगां गो सवाल है तो बे मसी नै आदर देण आळा लोग है।
24 ईंखातर थे थारो प्रेम अर म्हारो बो घमण्ड झिको थारै उपर है बिनै थे बिस्वासी मण्डलियां गै सामणै सबूत गै सागै दिखावो।