एक दूसरै गी मदद करो
6
1 हे भाईयो अर भेनों, थारूं जे कोई पाप करतो पकडयो जावै तो थे झिकै बिस्वास में मजबूत हो, झिको पकडयो है बिनै दीनता गै सागै बिस्वास में पाछो ले आणो चईयै। थे अपणै आपनै बी संभालो कै थे आप परीक्सा में ना पड़ जाओ।
2 दूसरो मिनख कोई ओखो काम करै है तो तू बिंगी मदद कर, ईं तरियां थे मसी गै नेम नै पूरो करोगा।
3 जे कोई मिनख मोटो कोनी होण पर बी अपणै आपनै मोटो समझै है तो अपणै आपनै धोखो देवै है।
4 पण आपगा अपणै काम नै आच्छी तरियां जांच करणी चईयै इयां करांगा तो बिऊं अपणै आप पर, कीं दुसर गै सागै बराबरी करै बिना, धमण्ड करण गो मोको मिलसी।
5 मैं आ बात ईंखातर केऊं हूं क्यूंकै हर एक आदमी नै अपणै आपगै काम गी जिमेदारी लेणी चईयै।
6 परमेसर गो बचन सिखाण आळो बचन सीखण आळै नै झिकी आच्छी चीज आपगै कनै है बा बिनै देणी चईयै।
7 धोखो ना खावो, परमेसर गो मजाक नई उडाणौ चाइयै। क्यूंकै आदमी जिसो करम करसी बिनै बिसो ई फळ मिलसी।
8 झिको आदमी आपगी पापी इच्छावा गै खातर बुरो काम करसी तो बो अनन्त बिनास में जावैगो। पण झिको आदमी परमेसर गी आत्मा नै राजी करण खातर आच्छा काम करसी बो पवितर आत्मा गै द्वारा अनन्त जीवन पावेगो।
9 ईंखातर आपां सारा भलाई करण में हिम्मत ना छोड़ा। जे आपां भला काम करता रेगे थका ना तो सई टेम पर इंगो फल मिलसी।
10 ईंखातर जिंया ई आपां नै कोई मोको मिलै तो भलाई करता रेणो चईयै, खास कर'गे बिस्वासियां गै सागै।
पौलुस गो आखरी निरदेस
11 देखो, मैं आ आखरी बात आपगै हात ऊं थानै मोटै सब्दा में लिखगै देण लागरयो हूं।
12 जियां केई लोग सांसारिक रूप नै दिखाणो चावै है, बे ई थारै पर खतनो करण गो जोर देवै है। कै बानै एकला नै मसी गै करूस पर दुख ना सेणो पडै।
13 क्यूंकै खतनो करण आळा खुद नेम विधान पर कोनी चालै। पण थारो खतनो ईंखातर करणो चावै है कै बे अपणै आप पर घमण्ड करै कै म्हे इंगो खतनो करायो है।
14 प्रभु यीसू मसी गै करूस नै छोड़गे मनै ओर कीं पर धमण्ड कोनी होवै क्यूंकै मैं यीसू मसी गै करूस गै कारण इंया रेऊं हूं पण दुनिया नै पतो बी कोनी कै मैं इंया क्यूं रेऊं हूं।
15 क्यूंकै खतनो करणो या ना करणो इमै कोई खास बात कोनी है। इमै खास बात आ है कै परमेसर गै द्वारा एक बदलाव आयो है।
16 आ बात मानगे ईं पर चालण आळै चुणेड़ै लोगा पर परमेसर गी दया अर सांती मिलती रेवै है।
17 ईं खत नै खत्म करण गै टेम मैं थारूं बिनती करूं हूं कै मनै कोई दुख ना देवै क्यूंकै मैं यीसू मसी गा घाव आपगै सरीर में लेगे चालूं हूं अर दिखावूं हूं कै मैं यीसू मसी गो दास हूं।
18 हे भाईयो अर भेनों, थारै सगळा पर प्रभु यीसू मसी गी किरपा होवंती रेवै। आमीन।