एक खास चेले गै रूप में पौलुस गो अधिकार
9
1 मैं परमेसर गो काम करण में बिलकुल आजाद हूं। मैं यीसू मसी गो सुब समाचार बताण आळो एक खास चेलो हूं। आपणै प्रभु यीसू मसी नै मैं सच्च में देख्यो। मेरै काम गै द्वारा ई थे लोग प्रभु पर बिस्वास करयो है।
2-3 जे मैं दूसरा खातर एक खास चेलो कोनी हूं पण थारै खातर मैं एक खास चेलो हूं। मेरै द्वारा थे प्रभु पर बिस्वास करयो, ऐ बातां साफ साफ दिखावै कै मैं एक खास चेलो हूं। अर झिका मनै परखै है बा खातर मेरो जबाब ओ ई है।
4 प्रभु यीसू गो काम करण गै टेम में म्हारी रोटी पाणी गो बंदोवस्त करणो थारो फरज है।
5 जिंया दूसरा खास चेला लोग, प्रभु यीसू गा भाई अर पतरस सुब समाचार बताण गै टेम आपगी लुगाईयां नै आपगै सागै ले जावै है बिंया ई एक मसी साथी गी मनै बी जरूरत है।
6 या फेर बरनाबास अर मनै रोटी पाणी गो बदोंबस्त आपनै ई करणो पड़सी।
7 कोई बी सिपाई आपगै खरचे ऊं काम कोनी करै है। दाख गी बाड़ी लगाण आळै नै बिंगो फळ खाण गो हक होवै। अर एक गुआळियै नै आपगै भेड़ ऊं मिलण आळै दूध पर हक होवै।
8 मैं ऐ बातां माणस गै सोच बिचार गै अनुसार कोनी बताऊं पण मूसा गै नेम विधान में ऐ बातां साफ लिखेड़ी है।
9 मूसा गै नेम विधान में इंया लिखेड़ो है कै,
“खेत गी जुताई करता टेम पसू गै मू पर छिंको नई लगाणो चईयै।a”
थे के सोचो है कै परमेसर पसूआं गै बारे में ई ऐ बातां केवै है के?
10 बिलकुल कोनी। क्यूंकै ऐ बातां आपां खातर लिखेड़ी है। क्यूंकै एक खेत जोतण आळै नै खेत ऊं कीं आस होवै है अर दाणां काड़ण आळै नै बी दाणा मूं आस होवै।
11 जिंया लोग खेत में बीज बीजै है बिंया ई म्हे थारै मन में प्रभु गो बचन रूपी बीज बिज्यो है। ईंखातर थारो फरज है कै थे म्हानै संसार गी खाण पीण गी चिजां फसल गै रूप में देणी चईयै।
12 थे लोग दूसरै मसी लोगा गी मदद करो हो बिऊं जादा थे म्हारी मदद करण गा हकदार हो। पण म्हे इंया करावां कोनी क्यूंकै प्रभु गै सुब समाचार गै रा में म्हे कोई बाधा कोनी करणी चावां।
13 कै थे जाणो कोनी कै झिका लोग मिन्दर गी सेवा करै तो बा लोगा नै मिन्दर ऊं सारो कीं मिलै है अर झिका लोग धूप करण गी जिग्यां पर सेवा करै है बांगो गुजारो बठै गै चढावै ऊं होवै।
14 ईं तरियां ई प्रभु गी इच्छा है कै सुब समाचार सुणाण आळां गो गुजारो सुब समाचार ऊं मिलण आळी मजदूरी ऊं होणो चईयै।
15 आ बाता मूं मैं एक ई बात कोनी बरती। मनै थारूं ऊं कीं मिलैगो ओ सोचगे मैं ऐ बातां कोनी लिखी। पण थारूं मनै कीं बी खाण पीण नै कोनी मिलै आ मेरै खातर घमण्ड गी बात है। क्यूंकै मैं कीं बी लिये बिना सुब समाचार गो परचार करूं अर इस्यो घमण्ड करण ऊं जे कोई मनै रोकै तो मेरै खातर मरणो आच्छो है।
16 जे मैं सुब समाचार परचार करूं तो इमै कोई घमण्ड गी बात कोनी क्यूंकै ओ तो मेरो फरज है। जे मैं सुब समाचार परचार ना करूं तो ओ मेरै पर धिकार है।
17 जे मैं ओ काम आपगी मरजी ऊं करूं तो मनै इंगी मजदूरी मिलण गो हक है। पण जे मैं ओ काम आपगी इच्छा ऊं ना करूं तो बी ओ परमेसर गो सोंपेड़ो काम गै अलावा ओर कीं कोनी करूं।
18 फेर मेरी मजदूरी के है? ओ मसदूरी आ है कै मैं सुब समाचार गो परचार बिना प्रतिफल ऊं करयो है। ईंखातर मैं सुब समाचार परचार करण गै टेम में मेरै हक नै कदी बी कोनी बरत्यो।
19 मैं किंगैई अधीन में कोनी हो, फेर ई मैं सारै लोगां गो दास बणयो कै बा लोगां नै प्रभु में खींच ल्याऊं।
20 मैं यहुदी लोगां में रेवंतो जद मैं बा लोगां बरगो बणयो अर झिका लोग नेम विधान गै अधीन हा बा लोगां बिचाळै मैं नेम विधान गै अधीन ना होवंता बी अधीन बण्यो कै बा लोगा नै प्रभु में खींच ल्याऊं।
21 जद मैं नेम विधान ना मानण आळा गै बिचाळै रेगे नेम विधान ना मानण आळो बण्यो क्यूंकै बा लोगा नै प्रभु में खींच ल्याऊं। पण इंया कोनी हो कै मैं परमेसर गी आग्या नै कोनी मानतो जिऊं मैं मसी नेम विधान गै अधीन हो।
22 मैं बिस्वास में कमजोर लोगां बिचाळै रेवंता टेम बा लोगां बरगो बण्यो कै बा लोगां नै प्रभु में खींच ल्याऊं। मैं हरेक तरियां गै लोगां बिचाळै बा बरगो बण्यो कै बानै किसी रीति ऊं प्रभु गै बिस्वास में खींच ल्याऊं।
23 मैं ओ ई कारण करयो कै सुब समाचार हर एक लोगा में फेलज्यै कै सुब समाचार में बताएड़ी सारी आच्छी बातां में मैं बी भेळो होज्यूं।
24 दोड़ गै खेल में भोत जणां भाजै पण इनाम एक नै मिलै। थे बिंया ईं भाजो कै इनाम जीत सको।
25 एक कुस्ती लडण आळो पेलवान लडण खातर हरेक तरियां ऊं तैयार होवै। बो तो एक नास होण आळै इनाम खातर ओ सारो कीं करै पण आपां तो बि इनाम खातर तैयारी करां हा झिको कदी नास कोनी होवै।
26 ईंखातर मैं एक निसानो लेगे दोड़ लगाऊं कै बि तांईं पोंच सकूं अर मैं बि पेलवान तरियां कोनी लडूं झिको आपगा हात हवा में चलावे पण मैं आपगा हात निसानै पर चलावूं।
27 मैं आपगी मन गी बुरी इच्छावां नै बस में राखूं कै जिऊं मैं दूसरा गै सामै सुब समाचार गो परचार करता टेम मैं खुद निकमो ना बणूं।