इसराएल गै इतिहास ऊं चेतावनी
10
1-2 हे मेरा भाईयो अर भेनों, थे ओ जाणल्यो कै मूसा गै लारै चालण आळा आपणा बडेरा बादळ गी छतर छाया में सई सलामत लाल सागर पार करग्या।a बो टेम बा खातर बतिस्मै बरगो हो।b
3-4 अर बां सारा परमेसर गै देयेडै़ आत्मिक भोजन अर पाणी नै खायो पीयो।c ओ सारो कीं बानै बि चटान ऊं मिलतो झिकी बांगै सागै चालती। बा आत्मिक चटान ई मसी है।
5 पण परमेसर बा माऊं भोतसा लोगा ऊं नाराज हा। ईंखातर बे लोग बन उजाड में मरग्या हा।
6-7 ऐ सारी बातां आपणै खातर एक मिसाल गै रूप में है कै जिंया बे लोग आपगी बुरी लालसा ऊं नास होया बिंया आपां ना हो जावां। अर आपां मूरती पूजण आळा ना बणा जिंया बामूं कीं लोग बणग्या। पवितर सासतर में इंया लिखेड़ो है कै, “लोग खाण पीण नै बैठ ग्या अर खेलण कूदण लागग्या।d”
8 अर बामूं भोत जणा बेबीचार करयो झिका एक दिन में 23,000 लोग मरग्या।e पण आपां नै इसो काम नई करणो चईयै।
9 अर ना'ई आपां नै परमेसर नै परखणो चईयै। अर जिता बानै परख्यो बामूं केई लोग सापां गै खाण ऊं मरग्या।f
10 अर ना'ई थे परमेसर गै खिलाफ बोलगे नास होवो जिंया बे नास कराणाळा गै द्वारा नास होया।g
11 ऐ बातां बा पर ईंखातर घटी कै एक मिसाल बणी रेवै जिऊं आपां चोकस रेवा कै संसार गो अंत बेगो ई आण आळो है।
12 ईंखातर झिको अपणै आपनै समझै कै,
“मैं पक्को बिस्वासी हूं” बो चोकस रेवै कै बुराई में गिर ना ज्यै।
13 थे सिरफ इसी परीक्सा में कोनी पडया झिकै मिनख गै सेहन ऊं बारै क्यूंकै परमेसर आपगै वाय्दे नै साची रीति ऊं करण आळो है अर बो थानै ना सेहन आळी परीक्सा में कोनी पढण दय। पण बो थानै परीक्सा में पढण गै टेम बिऊं बारै निकळण गी ताकत दयगो।
मूरती पूजा ऊं दूर रेणो
14 ईंखातर हे मेरा भाईयो अर भेनों, मूरती पूजा करण ऊं बचो।
15 थे सारा लोग ग्यानी हो। ईंखातर झिको मैं थानै केऊं बिनै थे परखो।
16 जद आपां प्रभु भोज करां तो बो दाखरस गो कटोरो झिकै पर आपां थन्यवाद कर'गे पीवां हा बिंऊ आपां मसी गै खून गै रूप में भेळा होवां। ईं तरियां, बा रोटी झिकी नै आपां तोड़गे खावां हा बिऊं आपां मसी गै देह गै द्वारा देयेडै़ बलिदान गै रूप में भेळा होवां।
17 आपां भोत सारा हा फेर ई आपां एक ई रोटी नै खावां। जिऊं आपां सारां एक देह समान हो जावां।
18 बा इसराएली लोगां गै बारे में सोचो, झिका बेदी पर चढाएड़ी भेंट नै खा'गे बिमै भेळा हो जावंता।
19 मेरै केण गो मतलब ओ है कै मूरती अर बिनै चढाएड़ी भेंट कीं खास बात कोनी क्यूंकै ऐ मूरती परमेसर कोनी है।
20 परमेसर नै ना मानण आळा लोग झिकी भेंट मूरतियां नै चढावै बे परमेसर नै कोनी पण दुस्ट आत्मा नै चढावै। अर मैं कोनी चाऊं कै थे बी बा दुस्ट आत्मावां गी पूजा में भेळा होज्यो।
21 ईंखातर इंया दोनूं एक सागै करणो ठीक कोनी कै थे प्रभु भोज में दाखरस पीओ अर रोटी बी खाओ अर मूरतियां आ'गे चढाएड़ै भेंट नै बी खावो।
22 जे आपां इंया करां तो आपां प्रभु नै रीस दिराण लागरया हा। अर आपां बिंगी रीस ऊं बच कोनी सकांगा क्यूंकै बो भोत ताकतवर है।
सारो कीं परमेसर गी मेमा खातर
23 थारै मूं कीं लोग इंया केवै है कै,
“हरेक काम करण में म्हे आजाद हा।”
अर आ बात सई है पण सारा काम आच्छा कोनी है अर दूसरा गै बिस्वास नै मजबूत करण खातर मदद बी कोनी दय।
24 ईंखातर थे सिरफ आपगी भलाई खातर ना सोचो पण दूसरा गी भलाई खातर बी सोचो।
25 अर बजार में झिको कीं बिकै बो थे बिना झिझक गै खरीद गै खा सको। अर आपगै मन में ओ बेम ना करियो कै आ चीज मूरती आ'गे चढाएड़ी ही।
26 क्यूंकै पवितर सासतर में लिखेड़ो है कै,
“सारी धरती अर झिको कीं धरती पर है बो सारो प्रभु गो है।h”
27 जे तनै कोई अबिस्वासी आपगै घरै भोजन पर बुलावै अर तू जाणो चावै तो झिको कीं तनै जीमण नै दय बो तूं बिना ओ सोचै कै ओ भोजन मूरती आ'गे चढाएड़ो है अर बिनै खालेई।
28 पण जे तनै कोई के दय कै, “ओ भोजन मूरती आ'गे चढाएड़ो है तो तू बिंगै मन गै बिचार गै कारण अर बिंगै केण पर ना खाई।”
29 मैं थारै मन गी सोच गै बारे में कोनी केऊं पण मैं बिंगै मन गी सोच गै बारे में केऊं। अर दूसरो कोई इंगै मन गै सोच बिचार ऊं मनै दोसी ना ठेरावै कै मैं ओ खा'गे ठीक कोनी करण लागरयो हूं।
30 अर मैं झिको कीं खाऊं बो परमेसर गो धन्यवाद कर'गे खाऊं इमै दूसरा नै गळत नई सोचणो चईयै।
31 ईंखातर थे झिको कीं खाओ, पीओ अर कीं करो बो सारो परमेसर गी बडाई खातर होणो चईयै।
32 यहुदी, गेर यहुदी अर बिस्वासी मण्डली गै लोगां खातर तू रुकावट गो कारण ना बण।
33 मैं हर एक तरियां हर एक आदमी नै खुस करण गी कोसिस करूं। अर खुद गै लालच गै बारे में कदी कोनी सोचूं अर दूसरा गै फायदै खातर कोसिस करूं कै बा सारा लोगां नै मुकती मिलज्यै।