रोमी सैहर गै मसी लोगा गै नाम
यीसू मसी गै खास चेलै पौलुस गो खत
ईं खत गै बारै में
ओ खत पौलुस गो लिखेड़ो है। पौलुस रोम गो वासी हो। बिंगो जन्म तरसूस में होयो। बण एक मसूर ग्यानी गमालियेल कनूं आपगी सिक्सा ली। ओ खत रोम गी बिस्वासी मण्डली गै बिस्वासियां नै सुब समाचार गी सच्चाई बताण खातर लिख्यो।
पौलुस एक फरीसी समाज गो आदमी हो। ईंखातर बो बिस्वासी लोगां नै भोत परेसान करतो। एकर दमिसिक जावंता टेम बिनै एक दरसण होयो अर बिंगो मन बदळ गेयो अर बण बतिस्मो लेगे परचार करणो सरू कर दियो।
आ एक संदेस देण आळी किताब है। पौलुस इमै भोत सारी इतिहास गी जाणकारी लिखी है। इसराएल गी पूरी बातां लिखी है। इमै पौलुस परमेसर गै ग्यान गै बारे में बी लिखेड़ो है। पौलुस गै टेम रोम गी अबादी दस लाख ही। पौलुस लिखै कै सारी मानव जाती यहुदी अर गेर यहुदी दोनां नै परमेसर गै सागै मेल मिलाप करण गी जरूरत है। क्यूंकै सारा पाप गै अधीन है। यीसू मसी में बिस्वास करण गै बाद ई लोगां गो मेल परमेसर सागै होवै अर जद आदमी गो मेल परमेसर सागै हो जावै तो परमेसर गी आत्मा पाप अर मोत गै अधिकार ऊं बिनै आजाद कर दय। पौलुस इंया बी लिखै कै मसी जीवन किंया जीणो चईयै। एक दूसरै गै सागै प्रेम भाव राखणो हर एक बिस्वासी गी जिमेदारी है।
रूप रेखा
पौलुस गी ओर ऊं निमस्कार 1:1-7
धन्यवाद गी पराथना 1:8-15
माणस नै मुक्ती गी जरूरत 1:16–3:20
मुकती परमेसर गो रा 3:21–4:25
मसी में नुओ जीवन 5:1–8:39
इसराएल खातर परमेसर गी योजना 9:1–11:36
मसी लोगां गो चाल चलन 12:1–15:13
आखरी गी बात 15:14–16:27