माल्टा टापू में पौलुस
28
1 जद म्हे बचगे माल्टा टापू में आग्या।
2 बठै गै निवासियां म्हारै पर किरपा करी क्यूंकै मेह गै कारण ठंडी ही, ईंखातर बा आग बाळगे म्हानै सारा नै तपाया।
3 जद पौलुस लकडियां गो भारो भेळो कर'गे आग पर रख्यो तो एक सांप भारियै मूं निकळ्यो अर बिंगै हात गै लपेटीज्गयो।
4 जद बठै गै लोगा सांप नै बिंगै हात गै लपेटीज्योड़ो देख्यो तो आपसरी में केण लागग्या, “साची ओ आदमी कतली है। अर समुनदर ऊं बचग्यो तो बी न्याय करण आळै इनै जींवतो कोनी रेण दियो।”
5 पण पौलुस सांप नै आग में झड़का दियो अर बिंगै कीं कोनी होयो।
6 पण बे उडीका कै बो कद सुजेगो अर मर जावैगो? पण जद बे बिनै भोत देर तांई देखता रेया तो बिंगो कीं कोनी बिगड़्यो तो आपगी बात नै बदळ दी अर केयो ओ तो कोई देवता है।
7 बि जिग्या गै आसै पासै टापू गै मुख्य पुबलियोस गी जमीन ही। बो म्हानै आपगै घरै ले जा'गे तीन दिनां तांई आच्छो आदर मान करयो।
8 पुबलियोस गै पिता गै बुखार अर पेट गी बीमारी ही। पौलुस बिंगै कनै जा'गे पराथना करी अर बि पर हात रख्यो अर बो ठीक हो'ग्यो।
9 जद इंया होयो तो बि टापू में बाकी गा बीमार लोग बी आया अर ठीक होया।
10 बा म्हारो भोत आदर मान करयो अर जद म्हे चालण लागग्या तो म्हारी जरूरत गी चिजां जहाज में रख दी।
माल्टा टापू ऊं रोम कानी
11 तीन मिनां गै बाद म्हे माल्टा द्वीप पाळे गै टेम में रुखेड़ा सिकन्दिरियां गो जहाज झिकै गो नाम दिओसकुरी मतलब जेऊस देवता गा बचा, इमै म्हे चड़ग्या।
12 अर सरकुस में तीन दिन रुक्या।
13 बठूं म्हे रेगियुस में आया। एक दिन गै बाद दकसिण गी हवा चालगी अर दूसरै दिन म्हे पुतियिलि में आया।
14 बठै म्हारै बिस्वासी भाईयां गै केण पर बांगै सागै सात दिन रेया अर फेर बठूं रोम उड़ग्या।
15 बे बिस्वासी म्हारो समाचार सुणगे अपियुस गै चोंक अर तीन सराय तांई म्हारू सागै मिलण आया झिका नै देखगे पौलुस परमेसर गो धन्यवाद करयो अर आप होसलो बांध्यो।
16 जद म्हे रोम पूगग्या तो पौलुस नै एक सैनिक गै सागै झिको बिंगी रुखाळी करतो एकलो रेण गी आजादी मिली।
रोम में पौलुस
17 तीन दिनां गै बाद बण यहुदियां गै खास लोगां नै बुलाया। जद बे इकट्टा होया तो बण केयो, “मैं आपगै लोगां गै बडेरां गी रीति रिवाज गै बिरोध में कीं कोनी केयो। फेर बी मनै बंदी बणागे यरुसलेम ऊं रोमी लोगां गै हात में सोंपे।”
18 बा मेरी जांच कर'गे छोड़णो चायो क्यूंकै मनै मारण खातर कोई दोस कोनी मिल्यो।
19 मैं मेरै लोगां गै खिलाफ कीं कोनी करयो फेर बी यहुदी लोग मेरै बिरोध में बोल्या। ईंखातर मनै कैसर गी मिन्नत करणी पड़ी।
20 ईंखातर मैं थानै बुलाया है, मैं थानै मिलूं अर बात करूं। इसराएलियां नै मसी पर आस ही, ईंखातर मैं सांकळा में बंधेड़ो हूं।
21 बा बिनै केयो, “म्हे ना तेरै बारे में यहुदियां कनूं चिट्टी मिली अर ना बिस्वासियां आ'गे मनै तेरै बारे में बतायो अर ना गळत केयो।”
22 पण तेरो के बिचार है? म्हे तेरै कनूं सुणनो चावां क्यूंकै म्हे जाणा हा हर जिग्यां ई मसी धरम गै बिरोध में लोग बात करै है।
23 जद बा बिंगै खातर एक दिन पक्को करयो अर भोत सारा लोग इकट्टा होया अर बो परमेसर गै राज गी गवाई देवंतो होयो अर मूसा गै नेम विधान अर परमेसर गी बात बताण आळा गी किताब ऊं यीसू मसी गै बारे में समझा समझा गै दिनगे ऊं आथण तांई बतावंतो रेयो।
24 जद कीं लोगां बिंगी बातां मान ली अर केईयां बिस्वास कोनी करयो।
25 जद बे आपसरी में एक ना होया तो पौलुस आ बात बानै बताई कै पवितर आत्मा यसयाह परमेसर गी बात बताण आळै गै द्वारा थारै बडेरां गै बारे में इंया केयो,
26 “जा'गे आ लोगां नै केयो:
कै थे सुणता रेवेगो पण समझो कोनी
अर देखता रेवेगो पण पिछाणोगा कोनी”
27 क्यूंकै ऐ लोग परमेसर गी बाता बांगो मन समझ कोनी सकै
अर बांगी बात सुण कोनी सकै
अर बा मनै पूरी तरियां इनकार करयो।
इंयां ना होवै कै बे मेरै कनूं भोत दूर हो'ग्या अर बांगो मन मेरी बात समझायो कोनी
अर मेरी बात सुणै कोनी
अर बा मनै पूरी तरियां इनकार करयो।
28 थे जाणो हो के परमेसर आपगी मुकती गेर यहुदियां नै दे दी अर बे आ बात मानैगा।
29 जद बण ओ केयो तो यहुदी आपसरी में ऊंचा नीचा होण लागग्या अर बठूं उड़ग्या।