रोमी 1

रोमी सैहर गै मसी लोगा गै नाम

यीसू मसी गै खास चेलै पौलुस गो खत

पौलुस गो स्वागत

1 मैं पौलुस यीसू मसी गो दास हूं, मनै एक खास चेलो होण खातर परमेसर गी ओर ऊं बुलायो अर परमेसर गी बि सुब समाचार सुणाण खातर चुण्यो गेयो। 2 परमेसर भोत साला पेला, ईं सुब समाचार गी बातां नै बताण आळा गै द्वारा पवितर सासतर में लिख दी। 3-4 ओ सुब समाचार परमेसर गै बेटै अर आपणै प्रभु यीसू मसी गै बारै में बतावै है, झिको मिनख गी तरियां राजा दाऊद गै घराणै में पैदा होयो। पण पवितर आत्मा गी सकती ऊं मरेडा ऊं जी उठगे परमेसर गो बेटो ठेरायो गयो, बो ई यीसू मसी आपणो प्रभु है। 5 परमेसर यीसू मसी गै द्वारा मनै सारी दुनियां गै लोगां में बिंगै बारे में बोलण गी किरपा दी कै सारा लोग परमेसर गी बात पर बिस्वास कर'गे मानल्य। 6 बामै थे लोग बी यीसू मसी में होण खातर बुलाया गेया हो।

7 ईंखातर मैं ओ खत थारै सारां खातर लिखण लागरयो हूं झिका रोम में परमेसर गा प्यारा अर पवितर जन होण खातर बुलाया गेया है।

ईंखातर आपणै पिता परमेसर अर प्रभु यीसू मसी गी ओर ऊं थानै किरपा अर सांती मिलती रेवै।

पौलुस गी धन्यवाद गी पराथना

8 सारा ऊं पेला मैं यीसू मसी गै द्वारा थारै सारा खातर आपणै परमेसर गो धन्यवाद करणो चाऊं। क्यूंकै परमेसर पर थे किंया बिस्वास करयो बिंगै बारे में सारै संसार में लोग बातां करै है। 9 परमेसर गै बेटै गै सुब समाचार गो उपदेस देवतां होया मैं परमेसर गी सेवा अपणै पूरै दिल ऊं करूं हूं। मैं थारै खातर हर रोज बिनै याद करतो रेंऊं हूं अर बिंगै बारे में परमेसर मेरो गवा है। 10 मैं परमेसर ऊं बिनती करूं हूं कै कोई बी तरिका ऊं परमेसर गी इच्छा है तो मैं थारै कनै जरूर आऊंगा।

11 क्यूंकै मैं थारै कनै आण गी भोत इच्छा राखूं कै परमेसर गी आत्मा मनै के सिखायो इंगै बारे में थानै सिखाऊं अर ईंखातर थारो भरोसो ओर बोळो हो जावै। 12 मेरो केण गो ओ ई मतलब है कै मैं थारै बिचाळै आऊं तो आपां एक दूसरै गै सागै बिस्वास में ओर आ'गे बदण में मदद कर सकां। 13 हे भाईयो अर भेनों, मैं चाऊं हूं कै थानै पतो हो कै मैं जियां थारै कनै आण गी भोत योजना बणाई पण अजे तांई पूरी कोनी होई। मैं थारै कनै ईंखातर आणो चाऊं हूं कै जियां मैं दूसरै गेर यहुदी लोगां में यीसू मसी गा चेला बणाया बियां ई रोम में बी आ'गे चेला बणा सकूं।

14-15 मैं तेज अर भोळै, अणपड़ अर पडेड़ै सारै लोगा गो करजदार हूं ईंखातर झिका थे रोम में रेण आळा हो थानै बी मैं सुब समाचार सुणाण खातर पूरो तैयार हूं।

यीसू मसी गै सुब समाचार गी ताकत

16 सुब समाचार सुणाण खातर मनै सरम कोनी आवै। क्यूंकै ईं सुब समाचार गै द्वारा परमेसर गी ताकत लोगां नै बचावै है। बिमै पेला यहुदी फेर गेर यहुदी बी सामिल है। 17 क्यूंकै ओ सुब समाचार इंया बतावै है कै परमेसर आपगी नजर में आदमी नै किंया सई बणावै है। ओ आदी अर अंत तांई बिस्वास पर टिकेडो है जियां कै पवितर सासतर में लिखेडो है, कोई बी झिको परमेसर गै उपर भरोसो राखै है बिनै परमेसर सई समझेगो अर बे जीमता रेवैगा।

मिनख जाती गो पाप

18 परमेसर नै ना मानण आळा अर बुराई करण आळा पर परमेसर गी सजा सुरग ऊं आवै है क्यूंकै आ लोगां गी बुराई गै कारण दूसरै लोगा नै सच्चाई नै जानणै में रुकावट पैदा होवै है। 19 परमेसर गी सजा ईंखातर आवै क्यूंकै परमेसर गै ग्यान गै बारे में बानै पेलां बी बतायो अर आ बाता नै बे जाणै बी है। 20 जद परमेसर संसार गी रचना करी बि टेम ऊं ईं लोगां नै पतो है परमेसर धरती अर आकास बणायो है। क्यूंकै जद ऊं संसार गी रचना होई है। लोगां नै परमेसर गै बिना देखेड़ा गुण मतलब बिंगै दिव्य रूप अर म्हान सकती गै बारै में पतो लागै है। ईंखातर लोगा कनै परमेसर नै म्हे कोनी जाणा आ बात केण गो कोई भानो कोनी है।

21 बां लोगां नै पतो होवंता होया बी बे परमेसर नै आदर कोनी देवै अर ना बिंगो धन्यवाद करै। अर ना'ई परमेसर गै बारै में ठीक ऊं सोच बिचार राखै ईंखातर बांगी बुद्धी खराब होगी। 22 बे लोग अपणै आपनै भोत ग्यानी अर समझदार समझ गै जमाई मूरख बण गया। 23 अर कदी ना मरण आळै परमेसर गो आदर मान करण गै बजाय बा मरण आळै आदमी, चिडिया, पसूआं अर सांपां ऊं मिलती मूरतियां गो आदर मान करणो सरू कर दियो है।

24 ईंखातर परमेसर बानै मन गी बुरी इच्छा में जीण ऊं कोनी रोकै। बे लोग गंदै कामा में पड़ गया अर एक दूसरा गै सागै गंदै काम करण लागरया। 25 ऐ लोग परमेसर नै जाणै है पण फेर बी मानै कोनी। बे सरसटी करण आळै नै छोड़गे बिंगी बणाएड़ी चिजां गी उपासना करणी सुरू कर दी। पण सदा धन्यवाद गै योग्य तो बो ई सरसटी करता परमेसर है। आमीन।

26 ईंखातर परमेसर बानै बुरी इच्छा में छोड़ दिया। लुगाईयां आदमियां गै सागै सोणो छोड़ दियो अर बदले में लुगाई लुगाई गै सागै सोण लागगी। 27 ईं तरियां आदमियां बी लुगाईयां गै सागै सोणो छोडगे आदिमियां आदमियां गै सागै गंदा काम करया। ईंखातर परमेसर बानै ईं काम गो ठीक बिस्यो फळ दियो।

28 अर जद बा परमेसर नै पिछाणनो ना चायो ईंखातर परमेसर बानै बुरी काम सोचण अर करण खातर छोड़ दिया कै बे माड़ा काम करै। 29 बे हर तरियां गै अधरम, पाप, लालच अर बैर बिरोध ऊं भरिजै ग्या अर बळण, हत्या, लडाई झगड़ो, छल कपट, चुगली करण आळा ऊं भर ग्या, दूसरा गो हित खातर गळत सोचण लागै। 30 बदनाम करण आळा, आपगै जीवन में परमेसर नै ना मानण आळा, दूसरा गो आदर ना करण आळा, घमण्ड करण आळा, मोटी मोटी बात बोलण आळा, गलत बात बणाण आळा, मां-बाप गो केणो ना मानण आळा, 31 ना समझण आळा, भरोसो ना करण आळा, प्रेम ना करण आळा, दया ना करण आळा, 32 ओ सारो कीं करण आळा नै परमेसर सजा देवैगो। ओ जाणता होया बी बे ओ सारो कीं करै है। ओ बी कोनी झिका ओ सारो कीं करै है बांगै सागै खुसी बी मनावै है।