रोमी 2

परमेसर गो न्याय

1 हे दोस लगाणाळा, तूं दूसरा गी गलती देखगे न्याय करै है। पण तेरै कनै न्याय करण गो कोई हक कोनी। झिकै गो तूं न्या करै है बिंया ई अपणै आपगो बी करै है। हे मेरा मित्र, थे चावै कोई बी हो थारै कनै कोई भानो कोनी है। 2 आपां सारा जाणा हा कै परमेसर सच्चो है अर गलत काम करण आळा नै सजा देवै है। 3 हे मेरा मित्र, तनै पतो है कै परमेसर गलत करण आळा नै सजा देवै है, तू के सोचो है कै जे तू आप गलत करसी तो परमेसर गी सजा ऊं बच ज्यगो के? 4 तू ओ जाणै कोनी है कै परमेसर दयालु है अर तनै पछतावो करण खातर अगुवाई करै है। फेर बी तूं बिंगी किरपा, सेहन सकती अर धीरज नै तुछ जाणै है।

5 पण अपणै आपनै पथर बरगो अर कदी पछतावो ना करण आळो मन गै कारण जद परमेसर गो सच्चो न्याय परगट हो'सी तो थानै भोत करड़ी सजा देवैगो। 6 परमेसर हर किनैई बिंगै करमा गै अनुसार फल देवैगो। 7 झिका लोग आपगै जीवन में आच्छा काम हरदम करता रेवै है अर बे लोग परमेसर ऊं आदर समान अर कदी ना मुकण आळो जीवन मिलण गी इच्छा राखै है। बा लोगां नै परमेसर अनन्त जीवन देगा। 8 पण दूसरा लोग आपणै बारै में ई सोचगे बुरा काम करण गी सोचे है अर परमेसर गी इच्छा नै कोनी मानै है। इसा लोगां नै परमेसर भोत करड़ी सजा देसी। 9 झिका लोग बुराई करै बानै पतो होणो चईयै बां लोगां नै बोळो दुख अर कस्ट जरूर आवैगो। पेला यहुदी लोगा नै जरूर मिलसी पण फेर गेर यहुदी लोगा नै बी मिलसी। 10 पण झिका लोग आच्छा काम करसी बानै परमेसर ऊं आदर मान अर सांती मिलसी। पेला यहुदी लोगा नै मिलसी पण गेर यहुदियां नै बी मिलसी। 11 क्यूंकै परमेसर किंगी पक्सपात कोनी करै है।

12 झिका लोगा नै परमेसर गै नेम गो पतो कोनी बे लोग पाप करसी तो बानै परमेसर सजा देसी अर झिका लोग परमेसर गै नेम नै मानगे पाप करसी तो बानै परमेसर आपगै नेम गै अनुसार न्याय देवैगो। 13 क्यूंकै परमेसर गै नजर में परमेसर गै नेम नै सुणण आळो कोनी पण बि पर चालण आळो ई निरदोस है। 14 परमेसर गै नेम कोनी है तो बी गेर यहुदी लोगा गो न्याय हो'सी। क्यूंकै बो लोगा नै अपणै आप नेम गी कई बातां गो पतो चालै है। जद गेर यहुदी आपणै आप आच्छो काम करै है तो बो अपणै आप में एक नेम है। 15 अर बा लोगां गो मन बतावै है कै ठीक है या कोनी। इंगै द्वारा म्हानै पतो लागै है कै परमेसर गै नेम विधान गी बात बांगै मना में है। 16 मेरै परचार करेड़ै सुब समाचार गो मतलब ओ ई है कै झिको न्याय गो दिन आसी परमेसर यीसू मसी गै द्वारा लोगां गै मन में लुकेड़ी बातां गो न्याय करसी।

यहुदी नेम विधान

17 थे लोग केवो हो कै म्हे यहुदी हा क्यूंकै परमेसर गो नेम विधान म्हारै कनै है अर बिंगो पालण करण गो कारण म्हारो आच्छो रिस्तो परमेसर सागै है। ईं बात गो थे लोग घमण्ड करो हो। 18 थानै नेम विधान गी आच्छी सिक्सा मिली है ईंखातर थे जाणो हो कै परमेसर के चावै हो अर आच्छी अर खास बातां गै बारे में बी थानै पतो है। 19 थे लोग इयां सोचो हो, म्हे आन्धै लोगां नै परमेसर गै रा पर ल्याण आळा हा अर अंधकार में रेण आळा नै परमेसर गी जोती दिखाण आळा गी तरियां हा। 20 परमेसर गै नेम में ग्यान अर सच्चाई है। ईंखातर थे लोग सोचो हो कै झिका कनै मूसा गो नेम विधान कोनी बां लोगां नै नेम विधान गी सिक्सा दे सको हो अर टाबरां नै बी सिक्सा दे सको हो। 21 थे लोग दूसरा नै सिखाओ हो अर आपणै आपनै सिखाओ कोनी अर दूसरा नै केवो चोरी ना करो पण थे आप चोरी करो हो। 22 थे लोग दूसरा नै सिखावो हो कै बेबीचार ना करियो पण थे आप बेबीचार करो हो। थे लोग केवो हो कै मूरतियां गो आदर ना करियो पण थे आप मिन्दर में जा'गे धन भेळो करै हो। 23 थे लोग घमण्ड करो हो कै म्हारै कनै परमेसर गो नेम विधान है पण बि नेम विधान गो पालण ना कर'गे परमेसर गो निरादार करो हो। 24 क्यूंकै पवितर सासतर में इंया लिखेडो है कै “थारै कारण गेर यहुदियां में परमेसर गै नाम गी निंदा होवै है।”

25 मैं थानै ओ बोलणो चाऊं हूं कै थे लोग जे परमेसर गै नेम विधान नै मानो तो यहुदी रीति रिवाज में खतनै गो म्हत्व है। पण जे ना मानै तो कोई म्हत्व कोनी। फेर थे गेर यहुदी झिका खतनै नै कोनी मानै बांगै बरगा हो। 26 पण जे एक बिना खतनो करयो गेर यहुदी आदमी परमेसर गै नेम विधान गी सारी बाता मानै है अर बिंगी तरियां आपगो जीवन बितावै है तो परमेसर बिनै एक खतनो करेड़ो बरगो समझै है। 27 थे यहुदी लोगां कनै नेम विधान अर खतनो बी है फेर बी थे नेम विधान नै तोड़ो हो। ईंखातर झिका लोग सरीर में खतनो कोनी करयो पण नेम विधान गो पालण करयो है बा लोग थानै दोसी ठेराएगा।

28 झिका लोग आपगै सरीर में खतनो करै है अर यहुदी रीति रिवाज गो पालण करै है बे यहुदी कोनी मान सकै। 29 पवितर आत्मा गै द्वारा मन में बदलाव होण आळो ई सच्चो यहुदी है। सच्चो खतनो जद होवै जद मन गो बदलाव होवै, ओ लिखेडै़ नेम विधान ऊं कोनी होवै पण ओ परमेसर गी आत्मा गै द्वारा होवै है। इसै आदमी नै लोगां कानू कोनी पण परमेसर कानू बडाई मिलै है।