रोमी 3

1 थारै यहुदियां मूं कई आदमी इंया सोच सकै है कै, यहुदी होण गो के फायदो है? अर खतनै करण गो के मतलब है? 2 मैं थानै केऊं कै, थे यहुदी लोगां नै इमें जरूर फायदो है क्यूंकै इमै खास बात आ है कै, परमेसर गो बचन झिकै में बांगो वायदो है बो थानै दिओ है। 3 थारै मूं केई लोगां परमेसर गै वायदे नै कोनी मानै, बे लोग इंया सोचै है कै बांगै बिना बिस्वास गै कारण परमेसर गी सच्चाई कोई काम गी कोनी है। 4 आ बात बिलकुल गलत है। थे झूठ बोलो हो अर सच्चाई कोनी मानो तो बी परमेसर सच्चो है। परमेसर गै बचन में राजा दाऊद इंया केयो कै,

“हे प्रभु, थारो बचन सच्चो ई है अर जद थारो न्याय होवै तो तू जीत जावै?”

5 अपणै झूठै अर गळत काम परमेसर गी सच्चाई नै सई तरियां ऊं दिखावै है। कई लोग इंया सोचे है परमेसर आपगी रीस म्हारै पर दिखागे अन्याय करै है। इंया सोचण आळा लोग मूर्ख है के? 6 जमाई कोनी। क्यूंकै परमेसर थारो न्याय सई रीति ऊं ना करेगो तो संसार गै दूसरा लोगां गो न्याय किंया करसी? 7 पण कई लोग इंया सोचै है कै म्हारा झूठा अर गलत कामां ऊं जे परमेसर नै बडाई मिलै है तो मैं पापी लोगां गी तरियां सजा गै योग्य क्यूं ठेरायो जावूं? 8 आपां क्यूं बुराई ना करा कै बिमुं भलाई निकळै। जिंया आपणै पर ओ दोस लगायो बी जावै अर केई केवै बी कै आंगो ओ ई केणो है। पण हिसा में दोसी ठेराणो ठीक है।

कोई धरमी कोनी

9 आ सारी बाता, गो मतलब ओ कोनी कै यहुदी लोग गेर यहुदी लोगा ऊं आच्छा है। क्यूंकै यहुदी लोगा अर गेर यहुदी लोग पाप गै बस में है। 10 पवितर सासतर में इंया लिखेड़ो है कै,

“परमेसर गी निगा में कोई बी आच्छो कोनी। एक बी कोनी।

11 किन्ही पतो कोनी कै, के आच्छो है?

अर परमेसर नै खोजण आळो कोई बी कोनी।

12 सारा लोग परमेसर ऊं दूर होगे भटकग्या।

भला काम करण आळा कोई कोनी, एक बी कोनी।”

13 जिंया एक हडारोड़ी मूं बास आवै है बिंया ई जद एक पापी आपगो मू खोलै है तो

बिंगै मू ऊं धोखो देणाळी बात निकळै है। इयां कर'गे बो आपगो बांगी मू ऊं नास अर मोत होण आळी बातां बोलै है।

14 बे दूसरा गै बारे में स्राप अर बुरी बात बोलै है।

15 बे लोग हमेसा दूसरा गै सागै लडाई करै अर बानै मारण नै उतावळा रेवै।

16 बे जठै जठै जावै है दूसरा गो नास करै अर बानै दुख बी देवै।

17 बानै सांती में रेण गो पतो ई कोनी।

18 बे लोग कदी बी परमेसर गो आदर मान कोनी करै।

19 परमेसर गै नेम विधान में लिखेड़ी ऐ सारी बाता गो पालण यहुदी लोगां नै करणो चईयै। कै सारा लोगा कीं ब्हानो ना बणा सकै अर सारो संसार परमेसर गी सजा गै योग्य ठेरायो जावै। 20 नेम विधान गो पालण करण ऊं परमेसर गी नजर में आच्छो कोनी होवै क्यूंकै परमेसर गै नेम विधान में म्हे पिछाणा हा कै म्हे पापी हा।

बिस्वास अर धारमिकता

21 परमेसर आपां नै इंया दिखायो कै बिना नेम विधान गै मानण ऊं किंया परमेसर गी नजर में निरदोस बण सका। ईं बात गै बारे में नेम विधान अर परमेसर गी बात बोलण आळा बतायो हो। 22 झिका लोग यीसू मसी पर बिस्वास करसी बे लोग परमेसर गी नजर में निरदोस बण सकै है। आ बात सारा खातर एकसी है। 23 ईंखातर सारा लोग पाप करयो अर परमेसर गै सागै झिकी मेमा ही बा अब कोनी। 24 पण जद यीसू मसी बा लोगा नै छुटकारो देगे परमेसर गी नजर में निरदोस बणा दियो अर बे इंगै लायक कोनी हा फेर बी ओ परमेसर गी दया ऊं बानै मुफ्त इनाम जिसो मिल्यो है। 25-26 परमेसर पेला ऊं ई आपगी दया अर पापी लोगा नै माफ करण खातर इंया करयो झिको बिस्वास करण ऊं होवै कै झिका पाप पेला करया गया अर झिका पर परमेसर आपगै धीरज गै कारण ध्यान कोनी दियो। बिंगै बारे में बो आपगी धारमिकता परगट करै। अर ईं टेम ई बिंगी धारमिकता परगट होवै झिका ऊं बो आप ई धरमी ठेरै अर झिका लोग यीसू मसी पर बिस्वास करै है बे परमेसर गी नजर में निरदोस बणज्य।

27-28 ईंखातर किन्ही परमेसर गै नेम नै पूरी तरियां पालण करण ऊं अर आच्छै काम करण ऊं घमण्ड कोनी कर सका क्यूंकै परमेसर नेम विधान ऊं कोनी पण यीसू मसी पर बिस्वास करण ऊं आपगी नजर ऊं निरदोस मानै। 29 केई लोग इंया सोचै है कै परमेसर एकलै यहुदी लोगा गो है। आ बात बिलकुल गळत है। परमेसर सारै लोगा गो परमेसर है बिंगै मा यहुदी अर गेर यहुदी बी सामिल है। 30 क्यूंकै परमेसर एक ई है। यहुदी लोग अर गेर यहुदी लोग दोनां नै यीसू मसी गै उपर बिस्वास गै द्वारा परमेसर आपगी नजर में निरदोस मानै है। 31 के आपां नेम विधान नै बिस्वास गै द्वारा बेकार ठेरावा हा के? जमाई कोनी पण नेम नै पक्को करा हा।